Socmed, ‘di dapat ginagamit sa pang-aabuso

ni Leonida Sison @Boses | July 18, 2026

Hanggang saan dapat umabot ang pananagutan ng isang tao kapag ginamit ang social media bilang sandata upang manakit at mang-api? 

Sa panahon na halos lahat ay konektado sa internet, hindi na lamang salita ang maaaring makasakit—mas mabilis na rin itong kumalat at magdulot ng matinding emosyonal na pinsala. Ang pinakahuling desisyon ng Korte Suprema ay malinaw na paalala na ang pang-aabuso sa online platforms ay may mabigat na kapalit at hindi dapat balewalain.

Pinagtibay ng Korte Suprema (SC) ang hatol laban sa isang lalaking napatunayang nagkasala ng psychological violence laban sa kanyang dating kinakasama. Kasabay nito, itinaas ng SC ang kanyang parusa ng isang antas matapos mapatunayan na isinagawa ang krimen sa pamamagitan ng social media.

Sa 20-pahinang resolusyon na inilabas noong Hunyo 2026, ibinasura ng First Division ng SC ang motion for reconsideration ng akusado. Ayon sa hukuman, wala itong naipakitang sapat na batayan upang baligtarin ang naunang desisyon.

Batay sa rekord ng kaso, nagkaroon ng tatlong taong relasyon ang dalawa at nagkaroon sila ng isang anak. Bagama’t inalok ng lalaki ang babae ng kasal, hindi ito natuloy dahil sa kanilang mga personal na alitan. Kalaunan ay namuhay ang babae kasama ang kanyang mga magulang habang siya lamang ang nagpalaki sa kanilang anak.

Sa isa sa mga pagbisita ng lalaki sa kanilang anak, bigla nitong hinipuan ang babae nang walang pahintulot. Dahil dito, agad siyang ibinlock ng biktima sa lahat ng kanyang social media accounts. Makalipas ang ilang taon, nagpadala ang lalaki ng pribadong mensahe sa mga kapatid ng babae at isinisi rito ang umano’y pagkakaatake sa puso ng kanyang ina. Hindi naglaon ay nag-post din siya sa Facebook ng mga mapanirang pahayag, pang-iinsulto, at pagbabanta laban sa biktima.

Dahil dito, nagsampa ng kaso ang babae sa ilalim ng Anti-Violence Against Women and Their Children Act of 2004. Parehong hinatulang guilty ng Family Court at Court of Appeals ang akusado, na kalaunan ay pinagtibay rin ng Korte Suprema.

Ipinaliwanag ng SC na ang paggamit ng Facebook at Facebook Messenger ay sapat na patunay ng paggamit ng information and communications technology (ICT), kahit hindi mismo binanggit ang terminong “ICT” sa isinampang impormasyon. Dahil dito,

ipinatupad ang mas mabigat na parusa sa ilalim ng Cybercrime Prevention Act of 2012. Mula sa dating anim na buwan hanggang walong taong pagkakakulong, itinaas ang sentensiya sa anim hanggang 14 na taong pagkabilanggo, bukod sa multang P100,000 at obligasyong sumailalim sa psychological counseling o psychiatric treatment.

Mahalaga ang desisyong ito hindi lamang para sa biktima kundi para sa bawat Pilipinong gumagamit ng social media. Ipinapakita nito na ang internet ay hindi ligtas na kanlungan para sa pananakot, paninirang-puri, at anumang uri ng pang-aabusong emosyonal. Ang bawat post, komento, at mensahe ay may kaakibat na pananagutan sa ilalim ng batas.

Ang naging pasya ng Korte Suprema ay isang matibay na babala na hindi dapat gawing sandata ang teknolohiya upang manakit ng kapwa. Sa halip, dapat itong gamitin nang may paggalang, pananagutan, at malasakit. Mas nagiging ligtas ang lipunan kung ang batas ay patuloy na umaayon sa makabagong paraan ng paggawa ng krimen at matatag na pinoprotektahan ang dignidad at karapatan ng bawat mamamayan.