Iwas COVID: Boxing at MMA fights limitado sa 5 laban

ni Gerard Arce - @Sports | July 13, 2020

Lilimitahan lang sa limang laban ang papayagan sa mga gaganaping professional boxing at Mixed Martial Arts events sakaling payagan na ng Inter-Agency Task Force (IATF) na maiangat ang pagbabawal ng mga ito sa bansa.

Inihayag ni Games and Amusement Board (GAB) chairman Abraham “Baham” Mitra na papayagan lamang ng IATF ang 10 katao na lumaban para sa boxing at MMA, habang inaasahang hindi na lalagpas pa ang bilang ng mga ito hangga’t hindi pa naibababa ang mga bagong klasipikasyon ng task force sa buong bansa.

Idinagdag niya na kasama ang professional boxing sa mga naunang inirekomenda nilang bigyan ng pagkakataon na magbukas sa gitna ng pananalasa ng coronavirus disease (Covid-19) pandemic kasama ang professional sports na Philippine Basketball Association (PBA) at Philippine Football League (PFL) para umano maipagpatuloy ng mga manlalaro nito ang kanilang pangkabuhayan; samantalang ang MMA ay maghihintay pa na aprubahan sa IATF.

“Hindi na dapat lalampas sa 10 laban, siguro mga lima na lang, kase kapag 10 laban, eh di 20 katao na agad yun, eh di ba ang usapan 10 tao lang sa isang venue,” wika ni Mitra sa TOPS:Usapang Sports, noong Huwebes ng umaga. “Of course pagkatapos ng dalawa alis na agad, sunod-sunod iyon hanggang matapos iyong 5 laban kasama yung mga trainers at managers nila. Kase kung mahigit sa 10 laban mahirap na yan baka magkaroon na ng transmission. In the end alam natin yung priority ng gobyerno, buhay muna bago ang hanapbuhay. Kailangan itulay mo yan kase nag-iingat ang gobyerno,” paliwanag nito.

Aniya, maaaring makapagsimula na ang sparring at laban ng boxing sa oras na ilagay sa Modified General Community Quarantine (MGCQ) ang kanilang lugar. Subalit, niliwanag nitong hindi maaaring lumaban o dumayo ang mga taga-GCQ areas sa MGCQ areas, gayundin ang MGCQ patungong GCQ areas. Tanging ang parehong boxers lang na may parehong klasipikasyon ang maaring maglaban.

“You cannot fight in Manila na under ng GCQ kung galing ka ng MGCQ areas, or vice versa. No inter-zonal travel,” wika ng dating Palawan governor. “Uso naman ngayon yun eh, wala munang dayo-dayo, gaya ng nangyayari sa Thailand at Japan, sila-sila lang muna,” dagdag nito.

Daraan ang bawat manlalaro sa mahigpit na Reverse Transcription Polymerase Chain Reaction (RT-PCR) test or swab testing at health protocols, ganun din sa mga referees; sunod na ihihiwalay ang mga boxers sa isang pasilidad. Mayroon lamang tatlong hurado at dalawang media personnel sa loob ng venue na bakante sa mga manonood. Samantala, hiniling din Mitra na hindi na kailangang umabot pa sa 3 testing ang bawat manlalaro upang hindi gaanong malugi ang mga promoters.

“Sana sa isang lugar na lamang para ‘di na lumayo at iwasang magkahawahaan and also kahit huwag ng magpatest pagkatapos; so we can find a way para makatipid naman iyong promoters natin, medyo masakit din kase mawawalan ng audience,” wika ni Mitra.

Umaasa naman si Universal Reality Combat Championship (URCC) president Alvin Aguilar na mabibigyan na sila ng aprobasyon ng IATF upang mabigyan na ng pagkakataon ang mga MMA fighters na makalaban.

“We are still waiting for the new guidelines from the IATF and hoping na matuloy na kase malaking bagay na mawalan ng laban ang isang fighter ng isang taon,” pahayag ng 46-anyos promoter at martial arts enthusiast sa panayam ng Bulgar mula sa text messages.

Mayroon namang nakalatag na MMA event sa darating na Agosto 14 ang ONE Championship na pinamagatang A New Breed sa Mall of Asia Arena; ngunit sinabi ni Mitra na hiningan na nila ito ng safety protocols para isumite sa IATF.

Thurman, may mga reklamo sa naging laban kay Pacman

ni Gerard Arce - @Sports | July 13, 2020

Inamin ni dating welterweight titlist Keith “One Time” Thurman na malaki ang naging epekto sa pagkatalo niya ng first round knockdown na natamo laban kay eight-division world champion Manny “Pacman” Pacquiao para sa kanilang World Boxing Association (WBA) title fight noong isang taon.

Sinisisi rin ng 31-anyos mula Clearwater, Florida ang pagkawala umano ng disiplina nito sa sarili at mga tinamong injuries na naging dahilan ng pagkawala ng kanya ng titulo at malinis na rekord; samantalang, inamin nitong wala siya sa tamang kondisyon para labanan ang 41-anyos na fighting Senator. Iniinda umano nito ang injury sa kamay at siko sapol ng matapos ang unification fight nito noon kay Danny Garcia para sa WBA at WBC 147-lbs title noong Marso 4, 2017 sa Barclays Center sa New York City sa US.

“There were a lot of variables,” sambit ni Thurman sa panayam ng PepTalkUK. “The number one thing that I blame is my weight control. When it comes to self discipline, I failed at that. My hand was a little bit of an issue as well. I had to cut sparring short many times. My preparation and where I was at in my sparring, I was not happy. Normally I’m turning it up on my sparring partners but I was just not at a certain level. It was just a rough year for me, I can admit that. I just wasn’t 100 percent.”

Inamin ng dating undefeated boxer na kahit hindi siya ganoon kaprepara laban sa Pambansang Kamao ay naging mahigpit pa rin ang kanilang bakbakan. Gayunpaman, naging malaking hadlang sa kanyang pagkapanalo ang hindi magandang pag-uumpisa ng bumagsak ito sa unang round pa lang mula sa kanang suntok ni Pacquiao , na siyang naging dahilan upang matalo sa scorecards.

“The fight wasn’t lost in that first round,” ani Thurman. “The fight was lost somewhere around the tenth. I kinda saw the fight as a draw with two rounds to go and that’s where I lost the fight. I believe that if I would’ve pushed and convinced myself that I needed a knockdown that maybe it would’ve led to something other than a one point decision in his favor.”

Masakalap man umanong isipin, ngunit, mahirap umanong umasa na magkakaroon pa ito ng rematch sa Filipino boxing icon sa mga darating na panahon, kung kaya’t marami naman itong mapagpipiliang labanan sa malalim na welterweight division.

“It’s really about what doors open up. I can fight Shawn Porter, Mikey Garcia or Danny Garcia. I would be surprised if a fight with Errol Spence popped up right away but there is so many Opportunities.”

Ancajas, planong itapat sa WBA Super Flyweight Champ

ni Gerard Arce - @Sports | July 13, 2020

Nakahanap ng panibagong itatapat si Top Rank boss Bob Arum para kay International Boxing Federation (IBF) junior bantamweight champion Jerwyn Ancajas sa oras na matapos nito ang susunod na asignatura para sa pagdepensa sa korona.

Interesado ang American promoter na iharap ito kay newly-crowned World Boxing Association (WBA) Regular super flyweight titlist Joshua “El Profesor” Franco (17-1-2, 8KOs) na matagumpay na nakuha ang titulo sa pamamagitan ng unanimous decision victory laban kay Andrew Maloney ng Australia nitong nakalipas na Hunyo 23 sa MGM Grand sa Paradise, Las Vegas, Nevada.

“This kid Franco who beat Andrew Moloney, he and Ancajas would be a tremendous fight,” saad ni Arum, na tila humanga sa kakayanan ng San Antonio, Texas-native na ma-upset ang noo’y undefeated na si Maloney (21-1, 14KOs), na kumatay na ng 11 Filipinong boksingero. “Golden Boy and ourselves interchange fighters, we did this even before the coronavirus. We have a good relationship with them,” dagdag ni Arum sa panayam ng RingTV.com.

Ngunit bago maganap ang pagtatapat ng dalawa ay kinakailangan muna nilang idepensa ang kani-kanilang mga titulo. Idedepensa ni Franco ang kanyang titulo laban kay Maloney para sa kanilang rematch sa hindi pa nababanggit na petsa at lugar, habang kailangan munang matapos ng 28-anyos mula Panabo City ang kanyang hindi matuloy-tuloy na laban kay Jonathan Javier “Titan” Rodriguez (21-1, 15KOs), na dalawang beses ng nauudlot.

Minsan nang naunsyami ang laban sa pagitan nina Ancajas at Rodriguez para sa 12-round title fight sa Carson City, California noong Nobyembre ng isang taon dahil sa pagkakaroon umano ng problema sa Visa ng Mexican challenger bago pa man ito magtungo sa Carson, kung kaya’t napilitang ikansela ng naturang promotional outfit ang laban dahil sa pagkadelay ng approval nito.

Patuloy pa ring nag-eensayo si Ancajas sa Survival Camp compound sa Imus, Cavite sa ilalim ni trainer Joven Jimenez, kung saan napanood niya ang laban nina Franco at Maloney na nagpahanga sa kan ya sa bagong kampeon. “If ever we are going to fight I won’t let my guard down,” sambit ni Ancajas.