Dawit sa flood control scandal... Rep. Yap, nag-resign

ni Madel Moratillo @News | February 5, 2025

Photo File: Edvic Yap / FB Circulated

Nagbitiw na si Cong. Edvic Yap bilang kinatawan ng ACT-CIS Partylist. 

Sa sesyon ng Kamara kahapon, inanunsyo ni Deputy Majority Leader at Leyte Rep. Anna Victoria Veloso-Tuazon na nakatanggap sila ng liham mula kay Yap kung saan ipinaalam nito ang “resignation”. 

“Mr. Speaker, for the information of the body, we are in receipt of a letter from Rep. Edvic Yap of the ACT-CIS Partylist informing the House of Representatives of his resignation as member of the House,” pahayag ni Veloso-Tuazon. 

Dahil dito, tinanggal na rin si Yap sa roll of members ng House of Representatives. Si Yap, ay kapatid ni Benguet Rep. Eric Yap, isa sa mga mambabatas na binanggit ni Ombudsman Jesus Crispin Remulla na tumanggap umano mula sa mag-asawang contractor na sina Curlee at Sarah Discaya.

Cong. Barzaga, 60 days suspended ulit

ni Madel Moratillo @News | February 5, 2025

Photo File: Kiko Barzaga / FB

Muling sinuspinde ng Kamara si Cavite Rep. Kiko Barzaga. 

Sa botong 238-pabor, 10-tutol, at 9-abstain muling pinatawan si Barzaga ng 60 araw na suspensyon. 

Present sa sesyon ng Kamara si Barzaga kung saan inaprubahan ang Committee Report 102 ng House Committee on Ethics and Privileges. Ito ay dahil umano sa “repeated misconduct” at mga paglabag sa kondisyon ng nasabing mambabatas mula sa panahon ng unang suspensyon sa kanya noong Disyembre 1, 2025 hanggang Enero 30, 2026. 

Kasama sa rekomendasyon na habang suspendido, hindi siya tatanggap ng sweldo at allowance. 

Matatandaang muling nagsagawa ng pagdinig ang Ethics Panel, kasunod ng panibagong reklamo laban kay Barzaga. 

Isa rito ang naging privilege speech ni Manila Rep. Rolando Valeriano, kung saan

humirit siya na patawan ulit ng suspensyon si Barzaga dahil sa patuloy na pagpo-post sa social media na nakakasira sa imahe ng Kamara at mga opisyal ng gobyerno.

Hirit ni Quiboloy na piyansa, ibinasura

ni Madel Moratillo @News | July 22, 2025

Photo File: Senate of the Philippines

Ibinasura ng Pasig City Regional Trial Court Branch 159 ang hiling ni Kingdom of Jesus Christ leader Pastor Apollo Quiboloy at mga kapwa akusado nito na makapagpiyansa sa kinakaharap na qualified human trafficking cases. 

Sa resolution ng korte, nakasaad na ibinasura ang petition for bail dahil nakapagprisinta ang prosekusyon ng mga ebidensya ng malakas na guilt ng mga akusado. 

"Thus, given these pieces of evidence against all the accused at this point which establish a great presumption of guilt for purposes of bail, the court must deny their petitions for bail," bahagi ng nakasaad sa resolusyon ni acting Presiding Judge Rainelda Estacio-Montesa.  

Nilinaw naman ng korte na hindi ito nangangahulugan ng determinasyon sa ultimate outcome ng kaso.