PDEA, sa socmed lang daw nalaman ang tangkang pagpupuslit ng tone-toneladang droga, jusko po!

ni Ka Ambo @Bistado | October 12, 2026

Usap-usapan ang tone-toneladang shabu na tinangkang ipuslit papasok sa Maynila. Hindi motorsiklo, hindi dyip, hindi trak at hindi container van ang gamit, bagkus ay barko mula sa Thailand at jet mula sa Laos.

Sosyal, hindi bagahe sa eroplano—isang charter jet!

----$$$--

Ayon sa PDEA, nalaman lang daw nila sa “news at social media” at wala silang detalye.

Jusko po! Ngayon lamang ba ipinanganak ang mga Pinoy?

Malinaw na nawalan na ng kredibilidad ang mismong PDEA, dahil sa kaduda-dudang pahayag sa media at kawalan ng aksiyon.

-----$$$--

Magkakambal na aksyon ang isinampal sa ICC kapwa ng US at Russia.

May financial sanctions ang US laban sa  ICC.

May hatol at may warrant of arrest mula sa Russia ang matataas na opisyal ng ICC.

Tulad ni Sen. Bato, kailangang magtago ang mga ICC officials dahil puwede silang maaresto ng mga kaalyado ng Russia.

----$$$--

NAKABABAD pa rin sa eksena si Sen. Ping Lacson.

Ngayon, saan naman kaya siya patungo?

-----$$$--

MARAMI ang nanghihinayang kay Lacson.

Imbes na magkaroon ng disposisyon tulad ng sa pinakamagagaling na senador, hindi siya maaaring ihanay sa mga ito, kahit magretiro, nawawalan siya ng direksiyon.

-----$$$--

GUMIMIK pa siya na tumanggi siya sa pork barrel o hindi siya pabor.

Pero, hindi kinagat ng publiko, dahil hindi naman niya nai-expose at kinalaban ang kapwa niya senador na inaakusahan ng bilyones na pork barrel.

----$$$--

HIGIT  sa pork barrel, ang kabulastugan ngayon, mismo ang annual budget ang nilantakan ng mga loko.

Nasaan si Lacson habang pinagpipiyestahan ang annual budget sa mga nagdaang administrasyon?

-----$$$--

HINDI natin alam kung ano ang agenda ng kanyang mga expose.

Pinakahuli ay nang magpalabas si Lacson ng video ukol sa ginagawang inspeksyon ng Ombudsman, PRA, LRA at DPWH sa sinasabing ilegal na reclamation. 

-----$$$--

IKINABIT niya agad ang “impunity” sa Taguig City, gayung hindi pa tapos ang imbestigasyon.

Eh, baket may hatol na?

----$$$-

LUMILITAW ngayon na may evidentiary gap o kulang-kulang na ebidensya si Ping. 

Malinaw ang pahayag ng lungsod: hindi sa kanila ang lupang nasa video, wala silang inilabas na permit sa mga sinasabing pribadong indibidwal, at hindi nila pagmamay-ari ang aktibidad. 

------$$$--

DAPAT manindigan ang lahat: “The fight against corruption must always be a fight for truth, not a contest of accusations.” 

Dapat lang na tandaan ito ni Lacson. 

Siya mismo ay ilang beses nang nabaha ng mabibigat na akusasyon sa nagdaang panahon.

-----$$$--

MAALALA sana ni Lacson nang tabunan siya ng kaliwa’t kanang akusasyon hanggang sa maging pugante siya.

Inakusahan siya sa “Kuratong Baleleng,” Dacer-Corbito murder case at maging ang pagiging miyembro niya ng MISG sa panahon ng matandang Marcos.

-----$$$--

MABIBIGAT ang akusasyon kay Lacson, pero binigyan siya ng due process at napatunayang wala siyang kasalanan.

Pero, sa gitna ng proseso, inilalarawan siyang “guilty,” kahit tuluyan siyang maabsuwelto.

-----$$$---

SA totoo lang, tulad sa iba pang opisyal ng gobyerno, pinagdududahan din ang datos sa kanyang SALN.

Siyempre, tulad din ng katwiran ng iba, nagmula sa lehitimong income ang halaga nito, hiwalay sa kanyang suweldo.

-----$$$--

SA hukuman, mas malinaw ang proseso.

Lulutang dito ang espesipikong transaksyon: sinu-sino ang nagbenta at bumili, magkano, petsa  at anong bangko, iyan ang pagbabayaran ng huwes!

----$$$--

SA totoong laban sa korupsiyon, walang sacred cow, hindi si Cayetano, hindi ang Taguig, at lalong hindi si Ping Lacson.

Mulat na ang taumbayan, sila ang huhusga!

---

Kung may reaksyon, sumbong o katanungan, sumulat sa ASINTADO ni Judith Sto. Domingo sa BULGAR Bldg., 538 Quezon Ave., Quezon City o mag-email sa asintado.bulgar@gmail.com.

Romualdez pinayagan sa virtual hearing; Estrada at Marcoleta, puwede rin online sa impeachment trial ni VP Sara?

ni Pablo Hernandez @Prangkahan | October 12, 2026

DAHIL PINAYAGAN NG SANDIGANBAYAN SI ROMUALDEZ SA VIDEO CONFERENCING SA KANYANG KASO, MARAHIL PUWEDE NA RIN HUMILING SINA SEN. ESTRADA AT SEN. MARCOLETA NA MAKADALO SA IMPEACHMENT PROCEEDINGS SA PAMAMAGITAN DIN NG VIDEO CONFERENCING — Pinayagan ng Sandiganbayan ang hiling ni former Speaker Martin Romualdez na dumalo ito sa kanyang hearing sa kasong plunder sa pamamagitan ng video conferencing.

Dahil dito, puwede na rin marahil humiling sa Sandiganbayan sina Sen. Jinggoy Estrada at Sen. Rodante Marcoleta, kapwa nakakulong sa kasong plunder din, na makadalo sila sa impeachment proceeding kay Vice President Sara Duterte sa pamamagitan din ng video conferencing, boom! 

XXX

KAPAG SABLAY ANG MAGIGING BOTO NG MGA RE-ELECTIONIST SENATORS SA IMPEACHMENT KAY VP SARA, MAAARING IKATALO NILA ITO SA 2028 ELECTION — Para sa House prosecution panel ay naglabasan na raw ang mga matitibay na ebidensya laban kay Vice President Sara Duterte, pero ayon naman sa depensa ay mahina raw ang mga ebidensya laban sa Bise Presidente.

Sa totoo lang, hindi naman tanga ang mayorya ng mamamayang Pinoy na nakatutok sa impeachment proceedings laban kay VP Sara.

Ang nais nating ipunto rito ay dapat maging maingat ang mga senator-judge sa ibababa nilang hatol kay VP Sara, lalo na sa mga re-electionist senators sa 2028 election kasi kapag nakita ng taumbayan na sablay ang naging boto, maaaring magdulot ito ng pagkatalo sa kanila sa darating na halalan, period!

XXX

DAPAT PATUNAYAN NI VP SARA NA WALA SIYANG NATATANGGAP NA PONDO SA CHINA AT KAPAG NANGYARI 'YAN, MALAMANG ANG GALIT NG MGA MANGINGISDA KAY TRILLANES MABALING — Nagalit ang mga mangingisda kay VP Sara kaugnay sa ibinulgar ni former Sen. Antonio Trillanes na tumatanggap ng pondo mula sa China ang bise presidente.

Sa isyung ito, dapat harapin ni VP Sara ang mga lider na mangingisda sa bansa at ibigay ang kanyang panig. Kapag nakumbinsi ng Bise Presidente na fake news ang ibinulgar ni Trillanes, maaaring mabaligtad ang sitwasyon, mawala ang galit nila sa Bise Presidente, at ang galit nila ay mabaling sa dating senador. Boom!

XXX

DAPAT DUMALO SI LEVISTE SA ARRAIGNMENT NG KANYANG KASO SA OCT. 26 PARA HINDI SIYA MAIDEKLARANG PUGANTE SA ‘PINAS — Hindi na muna idineklara ng Department of Justice (DOJ) na pugante si Batangas 1st Dist. Rep. Leandro Leviste kaugnay sa kinakaharap nitong kasong paglabag sa Public Service Act na may kaugnayan sa pagkabigo ng kongresista na makapag-supply ng solar energy sa pamahalaan.

Ayon kasi sa DOJ, may due process naman silang ibinibigay kay Leviste, na dapat daw dumalo ito sa arraignment ng kanyang kaso sa Oct. 26, 2026.

Kumbaga, parang sinabi na rin ng DOJ na kapag inisnab ni Leviste ang pagharap sa kanyang kaso, ay doon na siya puwedeng ideklara ng gobyerno bilang pugante sa bansa, period!

Delinquent member, ano ang mga karapatang mawawala?

ni PAO Chief Persida Rueda-Acosta @Magtanong Kay Attorney | October 12, 2026

Dear Chief Acosta,

May-ari ako ng bahay at lupa sa isang village at miyembro ng aming homeowners’ association. Ngunit dahil halos isang taon na akong hindi nakapagbabayad ng membership dues, idineklara akong “delinquent member” matapos akong bigyan ng abiso at pagkakataong magpaliwanag tungkol sa hindi ko pagbabayad sa tamang oras. Ano ang ibig sabihin ng pagiging delinquent member ng isang homeowners’ association? Tama pa rin ba na singilin ako ng asosasyon ng buwanang dues kahit na ako ay itinuturing na delinquent member? — Mima 

---

Dear Mima,

Patakaran ng pamahalaan na kilalanin at itaguyod ang mga karapatan ng mga homeowners bilang mga indibidwal, bilang mga kasapi ng lipunan at bilang mga miyembro ng homeowners’ association. Kaya’t naisakatuparan ang Republic Act (R.A.) No. 9904 o ang “The Magna Carta for Homeowners and Homeowners Associations.” Ayon sa Sections 4(w) at 16 ng 2024 Revised Implementing Rules and Regulations ng nasabing batas:

“Section 4. Definition of Terms. As used in this Revised Implementing Rules and Regulations, the following terms shall mean: 

X X X

w. Delinquent member or Member not in good standing shall refer to a member who has been declared as such after due notice and hearing on the basis of the grounds and in accordance with the procedures set forth under the bylaws and/or existing policies of the association or, in lieu thereof, under these Rules.”

Section 16. Delinquent member or member not in good standing. A member may be declared delinquent or not in good standing by the Board of Directors on any of the following grounds:

1. Failure to pay at least three (3) cumulative monthly dues, fees and/ or other assessments despite repeated demands by the association;

A member who has been declared delinquent or not in good standing in accordance with the procedure in the succeeding Section is not entitled to exercise the rights of a member, except the right to inspect association books and records, but is nevertheless obliged to pay all fees, dues, and other assessments charged the members in good standing.

Ayon sa nasabing mga probisyon ng batas, ang “delinquent member” o “member not in good standing” ay isang miyembro na opisyal na idineklara ng homeowners’ association gaya ng nabanggit matapos siyang mabigyan ng abiso at pagkakataong magpaliwanag. Ang deklarasyong ito ay ibinabatay sa mga dahilan at alituntunin na nakasaad sa bylaws, mga umiiral na polisiya, o mga pamamaraang itinakda ng asosasyon alinsunod sa batas.

Kaugnay nito, ang isang miyembro ng homeowners’ association na idineklarang delinquent o member not in good standing ay hindi maaaring gamitin ang mga karapatan at pribilehiyo ng isang miyembrong nasa mabuting katayuan, maliban sa karapatang siyasatin ang mga libro at rekord ng asosasyon. Gayunman, obligado pa rin siyang bayaran ang lahat ng fees, dues, at iba pang assessments na ipinapataw sa mga miyembrong nasa good standing o mabuting katayuan.

 Sana ay nabigyan namin ng linaw ang iyong katanungan. Ang payong aming ibinigay ay base lamang sa impormasyong iyong inilahad at maaaring magbago kung mababawasan o madaragdagan ang mga detalye ng iyong salaysay. 

Maraming salamat sa iyong patuloy na pagtitiwala.