Gilas Girls nakabawi vs. NZ sa FIBA Asia Cup

ni Anthony Servinio @Sports | October 7, 2026

Photo: Tinalo ng Gilas Pilipinas Girls ang New Zealand, 69–64 sa 2026 FIBA ​​U18 Women’s Asia Cup Division A sa Seremban, Malaysia kahapon. (IScorepix) 

Laro sa Huwebes - Seremban

TBA Pilipinas vs. Japan/Tsina

Nagbunga ang sipag ng Gilas Pilipinas at biniyayaan ng buwenamanong 69-64 panalo laban sa Aotearoa New Zealand sa huling araw ng group stage ng FIBA U18 Women's Asia Cup Malaysia 2026 kahapon sa Karisma Arena, Seremban.  

Ito rin ang unang panalo ng mga Pinay sa kanilang unang taon sa Division A ng torneo.

Naglabas ng nalalabing talas ang Gilas sa huling minuto simula sa matapang na saksak na may kasamang foul ni Riri Perez upang mabawi ang bentahe, 65-64, at 50 segundo sa orasan.  

Kahit minintis ni Perez ang iginawad na free throw, hindi na pinapuntos ang NZ at nagpasok ng tig-2 free throw sina Zaydhen Rosano at Grace Curley upang mapreserba ang makasaysayang resulta.

Matapos malugmok sa 30-39, lamang na ang Gilas ng 50-43 pero pumalag pa rin ang NZ sa huling 10 minuto. Umapoy si Rosano para sa 23 habang 13 si Perez.  Nag-ambag ng tig-9 sina Curley at Tifanny Reyes. Nanguna sa NZ si Keija Miringaorangi na may 17, 10 sa unang 2 quarter. 

Lalabanan na ng Gilas sa Huwebes ang magiging pangalawa mula Grupo B para sa upuan sa semifinals na ang matatalo sa pagitan ng Tsina (2-0) at Japan (2-0) na tinatapos kagabi.  Maliban sa semis, isang siguradong tiket sa FIBA U19 Women's World Cup China 2027 ang nakataya.

Generals nagpasuko para sa 1st win vs. SSC Stags

ni Anthony Servinio @Sports | September 30, 2026

Photo: Nagpumilit na tumirada ng pagbasket si Jude Bagay ng Emilio Aguinaldo Generals kahit pinagkumpulan sa mahigpit na depensa nila Markus Dimaunahan, Niel Castor at iba pang mga kakampi nito sa SSC Stags sa NCAA Season 102 Men's Basketball elimination games sa FilOil Centre, San Juan City kahapon. Wagi ang Generals kontra Recoletos, 94-87. (Reymundo Nillama)

Napulot ng Emilio Aguinaldo Generals ang pinakaunang tagumpay sa NCAA Season 102 Men's Basketball sa bisa ng 94-87 resulta sa San Sebastian Stags kahapon sa FilOil Centre. Naghahanap pa rin ng panalo ang kulelat na Stags sa Grupo B.

Nagbanta ang SSC-R, 87-90, bago ang huling 2 minuto. Hindi na pumuntos ang Stags at nagpasok ng paniguradong buslo si Best Player Wilmar Oftana at mga free throw ng mag-utol na Marvin at Harvae Raymundo.

Malakasang simula na naka-angkla kay Jacob Shanoda at Marvin at pinagpatuloy ng mga reserba Joseph Nunag at Harvae Raymundo ang nagbigay sa EAC ng 35-26 lamang matapos ang 10 minuto. Komportable pa rin ang Generals sa 78-68 papasok sa huling quarter subalit hindi basta tumiklop ang SSC.

"Kahit sino sa amin kaya pumuntos kaya ang mahalaga dumepensa," paliwanag ni Coach Jerson Cabiltes ng EAC. "Nakita ko sa ensayo na sobrang gusto na nilang manalo."

Nanguna sa Stags si Nurben Muktimar na may 12 at walang kakampi ang naka-10. Lumagpak sa 0-4 ang SSC-R na ranging koponan na hindi pa tumitikim ng panalo sa liga.

Mahalaga na umiwas na maging pinakahuli sa grupo. Ayon sa bagong patakaran ng NCAA, twice-to-beat na ang play-in ng ika-4 at ika-5 mula sa knockout lang noong nakaraang torneo.

Gilas Men 3x3 pinataob ang Mongolia at Sri Lanka sa Asiad

ni Anthony Servinio @Sports | September 21, 2026

Photo: Nagwagi ang Gilas Pilipinas 3x3 Men matapos talunin ang Mongolia, 19-12, sa men’s 3x3 basketball tournament sa 2026 Asian Games sa Nagoya, Japan. Una nila itong panalo sa kanilang kampanya sa Asian Games. : POC Media pool

Laro ngayong Martes - Kinjo-futo

11:00 AM Mongolia vs. Pilipinas (W)

1:05 PM Pilipinas vs. Macau (W)

Ginulat ng Gilas Pilipinas ang mabigat na paboritong Mongolia, 19-12, sa pagbubukas ng Aichi-Nagoya Asian Games Men's 3x3 kahapon sa Kinjo-futo Station Square.

Sinundan ito ng malupit na 21-12 pagdurog sa Sri Lanka para pamunuan ang Grupo A. Mula sa 6-6 tabla ay pumuntos sina Luis Pablo at Koji Buenaflor upang lumayo ang mga Pinoy, 9-6, at hindi na nila binitawan ito sa nalalabing 4:53.

Sumaksak si Doy Dungo para sa pandiin na buslo, 18-10, at 19 segundo sa orasan. Binuhat ang mga Pinoy buong laro ng pitong puntos ni Nic Cabanero habang anim si Buenaflor. Tig-tatlo sina Dungo at Pablo.

Hindi dumaan sa peligro ang mga Pinoy laban sa Sri Lankans at nagwakas ng maaga ang laban na may 2:48 pa. Nagtapos na may walo si Cabanero, tig-anim sina Pablo at Buenaflor at isa ang ambag ni Dungo.

May isa pang laro ang 2-0 Gilas laban sa 1-1 Kazakhstan sa Miyerkules. Dapat manalo upang walisin ang grupo, pumasok agad sa quarterfinals at umiwas sa play-in para sa ikalawa at pangatlong mga koponan.

Sisimulan ng Women's Team na sina Kacey dela Rosa, Kennan Ka, Amyah Espanol at Victoria Pasilang ang aksyon ngayong Martes kontra Mongolia at Macau. Haharapin din nila ang Malaysia sa Miyerkules.

Samantala, magtutuos ang parehong 2-0 Pilipinas at host Japan para sa solong liderato ng Women's Basketball Grupo B sa Aichi International Arena ngayong Martes din. Parehong pasok na sila sa quarterfinals subalit maaaring matapat sa mananaig ang "mas magaang" kalaro.