Abangan, tune-up game ng Gilas Pilipinas vs. South Korea

by Anthony Servinio @Sports News | September 2, 2026

Photo: Bola PH

Laro ngayong Biyernes - Suwon 6 PM Pilipinas vs. Timog Korea

Magsisilbing huling paghahanda ng Gilas Pilipinas para sa Aichi-Nagoya Asian Games ang Hana Bank Invitational. Ito ay dalawang laban sa maglalaro rin sa Asiad na Timog Korea ngayong Biyernes at Linggo sa Suwon KT Sonicboom Arena sa South Korea.

Asahan ang bagong anyo ng mga Pinoy at tanging sina Justine Baltazar, Justin Arana at RJ Abarrientos lang ang babalik mula sa katatapos na FIBA World Cup Qualifiers kontra Jordan at Iran.

Sasamahan sila nina Robert Bolick, Adrian Nocum, Sedrick Barefield, Jerrick Ahanmisi, Don Trollano, Zavier Lucero, Brandon Bates, Brandon Ganuelas-Rosser, Sean Quitevis, Geo Chiu at kung siya ay malusog, Justin Brownlee. Kabaligtaran ang kaso ng mga Koreano at itatapat nila ang koponan na sumalang din sa World Cup Qualifiers laban sa Lebanon at Saudi Arabia.

Gagabayan sila ni Coach Nikolaj Mazurs ng Latvia ang pinakauna nilang banyagang coach sa kasaysayan.

Kung gagamiting batayan ang mga numero sa qualifiers, sasandal sa opensa ang mga Koreano sa mga forward Lee Hyun Jung at Yeo Jun Seok at gwardiya Lee Jung Hyun. Noong Hangzhou 2022 ay umabot ang Korea sa quarterfinals pero natalo sa host Tsina, 70-84.

Hindi muna maghaharap ngayon ang Gilas at Korea dahil nabunot ang mga Koreano sa Grupo A kasama ang host Japan, Saudi Arabia at Indonesia. Nasa Grupo C ang Gilas kasama ang Tsina, Bahrain at Kazakhstan habang ang Grupo B ay Jordan, Iran, Qatar at Chinese-Taipei.

Samantala, asahan ang malupit na kinatawan sa Asiad Men's 3x3 sa pangunguna nina Luis Pablo, Doy Dungo at Koji Buenaflor. Sina Kacey dela Rosa, Kennan Ka, Louna Ozar at Amyah Espanol sa Women's.

Makakalaro ng mga kalalayang Mongolia, Kazakhstan at Sri Lanka sa Grupo A. Ang mga Pinay ay nasa Grupo C laban sa Mongolia, Malaysia at Macau.

Ibang klaseng Gilas ang babanat sa Asian Games

by Anthony Servinio @Sports News | September 1, 2026

Photo: Sina Justine Baltazar, Justin Arana at RJ Abarrientos ang magpapalakas sa Gilas Pilipinas sa darating na Aichi-Nagoya Asian Games nitong Setyembre sa Japan. (fbpix)

Ipinatikim ni Coach Tim Cone kung ano ang maaasahan sa defending gold medal Gilas Pilipinas sa nalalapit na Aichi-Nagoya Asian Games. Hindi gaanong matangkad pero idadaan sa bilis kaya magiging masaya sila panoorin, ayon sa batikang coach.

Idinagdag sa rosters sina RJ Abarrientos, Justin Arana at Justine Baltazar ang magbabalik mula sa katatapos na matagumpay na FIBA World Cup Qualifiers noong nakaraang linggo.

Bago pumunta ng Japan at maglalaro ang Gilas ng dalawang exhibition kontra sa Timog Korea. Inamin ni Coach Cone na tumutok sila ng 10 araw para sa World Cup at hindi niya nasubaybayan masyado ang paghahanda para sa Asiad. Itinalaga si assistant coach Richard del Rosario para patakbuhin ang ensayo.

Ang mga kasama sa listahan ay sina Robert Bolick, Adrian Nocum, Jerrick Ahanmisi, Don Trollano, Zavier Lucero, Geo Chiu, Brandon Ganuelas-Rosser, Sean Quitevis, Brandon Bates at Sedrick Barefield.

Magtatabi ng isang upuan para kay Justin Brownlee at titingnan kung naghilom na ang kanyang mga pilay sa paa at binti habang malabong mahahabol ang papeles ni Bennie Boatwright. Nabunot ang Gilas sa Grupo C. Ang kanilang mga laro ay laban sa Bahrain (Setyembre 11), Kazakhstan (12) at Tsina (14).

Season 102 NCAA bubuksan ng host San Beda sa MOA Arena

by Anthony Servinio @Sports News | August 31, 2026

Photo: Nagkakaisang hawak ang bola sa pangunguna ni Atty. Rico Paolo R. Quicho, ang NCAA Season 102 Basketball Commissioner kasama ang sampung team head coaches na sina San Beda Yuri Escueta, EAC Jerson Cabiltes, Mapua Cardinal's Chito Victolero, Arellano Chico Manabat, JRU Heavy Bombers Nani Epondulan, San Sebastian Rodney Santos, Letran - Asst coach Mike Buendia, Benilde Paolo Layog, Lyceum Jamike Jarin at Perpetual coach Olcen Racela sa idinaos na press conference ng Season 102 sa MOA Arena, Pasay City kahapon na magsisimula ang opening game sa Set. 13 sa MOA Arena, Pasay City. (Reymundo Nillama)

Magbubukas ngayong Setyembre 13 ang ika-102 NCAA sa tradisyonal na palabas sa MOA Arena. Itinalagang host ngayong taon ang San Beda University na may temang "Strive, Believe, Unite."

Tututukan ng pansin ang Red Lions na hahanapin ang kanilang ikalawang sunod na kampeonato kasabay ng kanilang pagiging punong-abala.

Tinalo ng SBU ang malupit na karibal Letran para sa titulo noong nakaraang taon. Ipapatupad muli ang parehong sistema noong nakaraang taon kung saan inihati ang 10 paaralan sa dalawang pangkat. Subalit may kaunting pagbabago at ngayon ay magiging twice to beat ang play-in sa pagitan ng ika-apat at ika-limang koponan sa bawat grupo.

Nasa Grupo A ang SBU kasama ang Saint Benilde, Mapua, Jose Rizal at Lyceum. Ang Grupo B ay binubuo ng Letran, Perpetual Help, Arellano at Emilio Aguinaldo.

Nanatiling mabigat na paborito ang SBU. Pero ayon kay Coach Yuri Escueta, malaking hamon ang paano nila tatakpan ang pagkawala ng ilang beterano subalit tiwala siya sa mga nakuha nilang baguhan tungo sa ika-25S tropeo sa Seniors Basketball ng paaralan.

Ayon kay NCAA Management Committee Chairman Atty. Jonas Cabochan ng SBU, may inihandang sorpresa sa seremonya katuwang ang Cignal. Ngayon magsisimula ang dalawang taong kasunduan ng liga at ayon Cignal VP Miguel Vea, maaaring habaan ito.

Maliban sa mga kinagawiang sports, magbabalik muli ang Aerobic Gymnastics at palakasin ang Golf. Pinag-aaralan din ang palaro sa Weightlifting at Boxing at isang fun run.