Daan-daan, nawawala... 157 patay sa flash flood sa Nepal

by Info @Overseas News | August 27, 2026

Photo: AP / AFP

Pumalo na sa 157 katao ang kumpirmadong patay habang daan-daan pa ang nawawala matapos salantain ng halimaw na baha ang hilagang bahagi ng Nepal nitong Miyerkules.

Ayon sa ulat, nanggaling ang rumagasang tubig sa Tibet at mabilis na nanalasa sa Bhote Koshi River bago tuluyang niyanig ang mga lugar ng Timure at Syabrubesi hanggang sa Trishuli River.

Kabilang sa mga nawawala ang mga dayuhang turista, pilgrims, mga sundalo ng Nepal Army, pulis, at mga lokal na manggagawa.

Todo-kayod na ang mga helicopter at drone sa search and rescue operations. Gayunman, paralisado ang mga rescuer dahil sa mga nawasak na kalsada, ginitingang mga tulay, at bagsak na linya ng kuryente at komunikasyon.

Patuloy namang sinisiyasat ng mga eksperto kung pagguho ng yelo o pagbabara ng tubig sa boundary ng China ang nag-trigger sa biglaang trahedya.

Init sa Death Valley, French tourist dedo

ni Justine Berganio @Overseas News | August 26, 2026

Photo: Ang Death Valley sa California ang isa sa mga lugar na may mainit na temperatura na kayang umabot sa 49°C - AP

Patay ang isang 68-anyos na French tourist matapos ma-stranded sa Death Valley, California, kung saan umabot sa 46.6°C (116°F) ang temperatura.

Kinilala ang biktima na si Pierre Michel Formosa, na natagpuan ng mga pulis matapos ma-stuck sa putik ang kanilang sasakyan sa West Side Road.

Kasama ang isang French travel companion, naglakad si Formosa upang humingi ng tulong. Ngunit matapos ang tinatayang 1.3 milya o mahigit 2 kilometro, hindi na niya kinayang magpatuloy dahil sa matinding init.

Nakapagpa-hinto ng isang motorista ang kanyang kasama at nakahingi ng tulong. Kalaunan, natagpuan ng mga ranger at pulis si Formosa, na idineklarang patay sa lugar.

Ayon sa National Park Service, coroner ang tutukoy sa sanhi at paraan ng kanyang pagkamatay.

Kasalukuyang may extreme heat warning sa Death Valley, na kilala bilang “hottest place on Earth.” Naitala rito ang temperaturang 57°C (134°F) noong 1913.

Samantala, nagbabala ang National Weather Service na mararanasan ng Southern California ang pinakamainit na linggo ng tag-init ngayong taon.

Magdamag umatake... 47 patay, 22 pa sugatan sa gang raid sa Haiti

ni Justine Berganio @Overseas News | August 26, 2026

Photo: Ang insecurity protest sa Haiti matapos ang madugong pag-atake ng armadong gang sa Kensoff, kabisera ng Haiti na Port-au-Prince. Reuters / Fildor Pq Egeder

HIndi bababa sa 47 katao ang nasawi at 22 iba pa ang nasugatan sa magdamagang pag-atake ng armadong gang sa Kenscoff, isang komunidad sa kabundukan na nakatanaw sa kabisera ng Haiti na Port-au-Prince, ayon sa United Nations (U.N.).

Ayon sa United Nations Integrated Office in Haiti, maaari pang magbago ang bilang ng mga nasawi habang nagpapatuloy ang imbestigasyon. Nagsimula ang pag-atake bandang 10:30 ng gabi, lokal na oras.

Sinabi naman ng Haitian human rights group na RNDDH na nasa 30 hanggang 40 katao ang namatay at 15 hanggang 20 ang nasugatan sa insidente.

Ilang residente ang nanawagan sa pagbibitiw ng lokal na hepe ng pulisya, dahil umano sa kabiguang maprotektahan ang mga residente kahit malapit lamang sa himpilan ng pulisya ang lugar ng pag-atake.

Kinondena ng pamahalaan ng Haiti ang insidente at nangakong palalakasin ang seguridad sa Kenscoff.

Matagal nang nakararanas ng karahasan ang komunidad. Sa mga pag-atake noong unang bahagi ng 2025, mahigit 260 katao ang napatay, 200 bahay ang nawasak o sinunog, at nasa 3,000 residente ang napilitang lumikas, ayon sa UN.

Mula noon, halos isang dosenang pag-atake pa ang naitala, kabilang ang panggagahasa, kidnapping, panununog at pagnanakaw ng mga alagang hayop.

Ayon sa lokal na media, ilang bahay ang sinunog, kabilang ang tahanan ng kilalang public health expert na si Jean William Pape.

Samantala, patuloy ang operasyon ng U.N.-backed Gang Suppression Force, na target na magkaroon ng mahigit 5,500 tauhan ngayong taglagas upang tumulong sa pulisya sa paglaban sa mga armadong gang.

Dahil sa patuloy na karahasan, nababahala rin ang mga awtoridad sa kakayahan ng Haiti na magsagawa ng halalan sa Disyembre, na magiging unang halalan sa bansa matapos ang isang dekada.