Apektado ang Pinoy sa pagkuha ng ibang imports sa B.League

by Anthony Servinio @Sports News | September 9, 2026

Photo: B.LEAGUE - Japan Professional Basketball League

Laro ngayong Huwebes - MOA

7 PM Hokkaido vs. Gunma

Malaki ang naging ambag ng mga Filipino sa nakamanghang pag-usbong ng Japan B.League sa nakalipas na 10 taon. Dahil sa mga kababayan, napalapit ang liga sa isa sa pinakamalaking merkado ng laro sa Asya. Palabas sa telebisyon at internet ang mga laro.

Lalong umiinit pagsapit ng finals kung saan nagdaraos ng mga espesyal na selebrasyon ang B.League sa mga mall. Maaaring kumuha ng isang manlalarong Asyano ang mga koponan bilang import.

Noong una ay ang Pilipinas, Tsina at Timog Korea ang mga pinagkukuhanan ng mga koponan subalit sa mga nakaraang taon ay binago ang patakaran at pinayagang kumuha mula sa mga ibang bansa tulad ng Lebanon, Indonesia, Chinese Taipei at iba pa.

Sa 2026-27 torneo na magbubukas sa Setyembre 22, may pinagsamang 11 Pinoy sa Division I at II. Ito ay sina Dwight Ramos, AJ Edu, Kiefer at Thirdy Ravena, Ray Parks, Quintin Millora-Brown, Francis Lopez, Mike Phillips, Roosevelt Adams, Jamie Malonzo at Matthew Wright.

Maaaring isama sa listahan si Matthew Aquino subalit nakalista siya bilang lokal dahil may lahing Hapon ang pamilya ng kanyang nanay. Naglaro noong nakaraang taon pero wala pang koponan sa ngayon si Kai Sotto.

Masasabi na ang pagdami ng mga bansang maaaring kuhanan ng import ay nakaapekto sa pag-asa ng mga Pinoy na makakuha ng trabaho kung saan ang bayad ay napakalayo ng agwat kung nanatili sila sa Pilipinas.

Subalit may ilan na pumulot lang ng karanasan at umuwi rin tulad nina RJ Abarrientos, Justine Baltazar at Javi Gomez de Liano.

Sa kasamaang palad, ang kalendaryo ng B.League ang itinuturong dahilan kung bakit ang ilang mga kasapi ng Gilas Pilipinas lalo na sina Ramos at Edu ay hindi makakalahok sa Aichi-Nagoya Asian Games na nagkataon ay sa Japan din gaganapin.

Sa gitna nito, magiging tagahanga muna ang dalawa at sasamahan ang milyon na sumusuporta sa pambansang koponan sa layuning maidepensa ang gintong medalya.

Gascia kampeon sa Texas Open 9-Ball, De Luna runner-up sa One Pocket

ni Eddie M. Paez Jr. @Sports | September 9, 2026

Photo: Si Garcia sa harap ng kanyang tropeo. Photo credit : 77.7 billiards

Lumutang na naman ang husay ng mga bilyaristang Pinoy sa labas ng bansa nang bumida sina Roland Garcia at Jeffrey De Luna sa dalawang larangan ng Texas Open Championships sa Estados Unidos kamakailan.

Kinoronahan si "Kabuto" Garcia, tubong Minalin at naging World Pool Championships runner-up noong 2017, bilang hari ng Texas Open 9-Ball sa palaruan ng Skinny Bob's sa Round Rock, Texas.

Sinagasaan ng Kapampangan sina Josh Kondo (USA, 9-3), Joey Torres (USA, 9-1), Ryan Robinson (USA, 9-5), Gavin Ray Mathew (USA, 9-4), Marcus Hodge (USA, 9-1), De Luna (9-4), semifinalist Felix Vogel (Germany, 9-4) at Ukrainian Vitaliy Patsura noong finals sa iskor na 9-5. Lubhang impresibo ang naging tagumpay ni Garcia laban sa karibal mula sa Ukraine dahil kinailangan niyang umahon mula sa 0-4 na hukay upang maiuwi ang malaking tropeo at pumaldo ng halagang $17,500.

Ito na ang pangalawang korona ni Garcia ngayong 2026 matapos makandaduhan noong Enero ang trono ng 38th Music City Open (Tennessee).

Bukod dito, meron din siyang limang iba pang podium performances. Kasama rito ang pagsegunda niya sa Derby City Classic One Pocket, U.S. Open 8-Ball at U.S. Open One Pocket.

Samantala, runner-up honors din ang naging ambag ni "The Bull" De Luna sa maangas na atake ng mga Pinoy nang sumargo siya sa larangan ng One Pocket sa Texas Open.

Nailista sa kanyang mga naging biktima sina Chip Compton (USA) at Christopher Tevez (USA) pati na sina dating world champions Shane Van Boening (2022 - 9ball; 2023 - 8ball) at Canadian Alex Pagulayan (2004 - 9ball).

Eala, posibleng patawan ng $10,000 na multa ng WTA

by Gerard Arce @Sports News | September 8, 2026

Photo: File

Suportado ng PHILTA ang desisyon ni Pinay tennis star Alex Eala na katawanin ang Pilipinas sa Asian Games, na magbibigay sa bansa ng pagkakataong matuldukan ang 64-taong pagkagutom sa korona na huling nakuha sa 2 ginto sa singles nina Raymundo Deyro (1958 Tokyo) at Johnny Jose (1962 Jakarta) at men’s doubles nina Felicisimo Ampon at Deyro (1958 Tokyo).

“Alex herself has made it clear that representing the Philippines is an honor and that she is choosing to play for the flag." ayon sa statement na inilabas ng Philta mula kay secretary-general John Rey Tiangco.

Una nang sumaklolo ang PHILTA hinggil sa kahaharaping multa ni Eala mula sa tanggapan ng Women’s Tennis Association (WTA) upang magkaroon ito ng exemption sa paglahok sa Asian Games. Matagal na umanong ipinaalam ng pamunuan ng PHILTA sa kanilang liham sa WTA ang naturang planong pagsabak sa Asian meet ni Eala.

Minsan ng napatawan ng penalty sina tennis superstars at World No.1 Aryna Sabalenka, dating World No.1 Iga Swiatek ng Poland, World No. 4 Coco Gauff at World No.10 Amanda Anisimova ng US, habang maaaring makatanggap ng $10,000 na pagbabayaran si Eala, base sa nakasaad sa ruling ng WTA para sa mga manlalaro ng Top 25 hanggang 11 na hindi lalaro sa WTA 1000 event sa Section IV-A ng Withdrawals.