Filipinas U17, 3rd time qualified sa Asian Cup

ni Anthony Servinio @Sports | October 13, 2026

Photo: Makasaysayan ang ikatlong beses na pagpasok sa AFC U17 Women's Asian Cup ng mga batang Filipina booters. (Phlfootball) 

Pasok na sa pangatlong sunod na pagkakataon ang Philippine Team sa AFC U17 Women's Asian Cup China 2027. Binigo ng mga Batang Filipinas ang Bangladesh, 3-0, at walisin ang Grupo H ng qualifiers sa Do'stlik Stadium sa Uzbekistan.

Bunga ng 2-0 panalo ng Bangladesh sa host Uzbekistan, sapat ang tabla para itulak ang mga Pinay subalit naniguro na sila. Papunta na sa tabla at inabot ng ika-70 minuto bago nahanap ni defender Maya Rose Bascara ang goal.

Matapos niyan ay bumira ng dalawang pandiin na goal si Noelle Granger sa ika-90 at 91 bago pumito ang reperi para wakasan ang laban. Umakyat sa lima ang kanyang goal kasama ang tatlo sa 4-0 tagumpay sa Uzbekistan noong Oktubre 5 sa parehong palaruan.

Maliban sa Pilipinas, pasok din sa Asian Cup ang mga kampeon sa ibang mga grupo na Timog Korea, Vietnam, Indonesia, Chinese-Taipei, India, Thailand at Myanmar.

Sasamahan nila ang defending champion Hilagang Korea, Japan, Australia at host Tsina.

Ang U17 Asian Cup ay tatakbo mula Marso 31 hanggang Abril 17. Ang unang apat ay kakatawanin ang Asya sa FIFA U17 Women's World Cup Morocco 2027.

Magkikita muli ang mga bansa sa Oktubre 14, petsa sa Pilipinas. Bahagi ito ng paghahanda ng Filipinas para sa FIFA Women's World Cup Brazil 2027.

NCAA: Nitura ng Cardinals bumira, Knights pinasuko

ni Anthony Servinio @Sports | October 13, 2026

Photo: Libreng naibuslo ni #26 Ivan Lazarte ng Mapua Cardinals ang bola sa depensa ni #4 Kevin Santos ng Letran Knights sa NCAA Season 102 men's basketball sa Filoil EcoOil Centre San Juan City kahapon. Wagi rito ang Cardinals, 69-67. (Ben Maniclang) 

Laro ngayon - FilOil 

3:00 PM Lyceum vs. Perpetual 

5:00 PM Arellano vs. SBU

Kumapit ng todo ang Mapua Cardinals para manaig sa Letran Knights sa overtime, 69-67, sa umiinit na NCAA Season 102 Men's Basketball sa FilOil Centre kahapon. Humaba sa apat ang sunod-sunod na panalo ng Cardinals matapos ang 0-3 simula.

Nag-shoot ng higanteng 3-points si Lance Nitura para bigyan ang Mapua ng 68-64 bentahe papasok sa huling 2 minuto. Nakahinga lang ng maluwag ang Cardinals nang hindi pumasok ang pukol ni Justin Cargo sabay ng busina na magpapanalo sana sa Knights.

Sinayang ng Mapua ang 53-38 lamang sa pangatlong quarter hanggang inagaw at ipinasok ni Cargo ang bola para sa pinakaunang lamang ng Letran, 59-58, at 3:25 sa huling quarter. Nagdagdag ng dalawang free throw si Cargo pero nakumpleto ni Ivan Lazarte ang foul-counted para pumantay, 61-61, at parehong hindi na pumuntos ang mga koponan para maglaro ng 5 pang minuto.

Tunay na balanse ang atake ng Cardinals at limang kakampi ang nanguna na lahat ay may 11 puntos na sina Nitura, Yam Concepcion, Cyrus Cuenco at mga reserba Lazarte at Jamal Diaz. Humakot din si Concepcion ng 11 rebounds.

“Dy-Incredible” nakadepensa ng korona sa Bare Knuckle

by Gerard Arce @Sports News | October 12, 2026

Photo: It's okey boy! Tila ibinubulong ni Pinoy Gabriel Dy sa tinalo niyang Briton pagkatapos ng Bare Knuckle fight nila. (dyfbpix)

Napanatili ni Rolando Gabriel “Dy-Incredible” Dy ang kanyang korona sa bisa ng 3d round technical knockout kontra British boxer Scott McHugh para sa Bare Knuckle Boxing super welterweight championship kahapon sa BKB 60: Newcastle sa Tyne and Wear, England.

Mabibigat na solidong patama ang ibinigwas ng 36-anyos mula Dasmariñas City, Cavite sa ikalawang title defense at ika-5 sunod na panalo, kabilang ang 4 na knockout victories para iangat sa 7-1 na kartada kasama ang 6 na panalo mula sa knockouts.

Matapos mapasakamay ang titulo kontra Liam Reese noong 2025, unang beses nadepensahan ng dating mixed martial arts champion ang korona kontra sa dating two-time world boxing champion Paulie “Magic Man” Malignaggi nitong Mayo 16 na nagtapos sa 2nd round KO sa BKB 54 sa Manchester, United Kingdom.

Tuluyang tinapos ni Dy ang bakbakan sa third round kasunod ng dumadagundong na kaliwang hook upang tuluyang ipatigil ng referee ang laban sa 47 segundo kasunod ng paghagis ng tuwalya sa corner ng Briton. Tinuldukan ni McHugh ang karera kasunod ng 22 na laban, na tatlong beses ring nabigo para sa world title na may 16-6 rekord kasama ang anim na KOs.