Alapag masusubok na bilang coach ng PBA NLEX vs. Macau

ni Anthony E. Servinio @Sports | July 7, 2026

Photo: NLEX Road Warriors

Laro ngayong Biyernes - Ynares Antipolo

5:15 PM Terrafirma vs. Titan

7:30 PM Macau vs. NLEX

Tututukan ng pansin ang unang sabak ni alamat Jimmy Alapag bilang head coach ng NLEX Road Warriors laban sa Macau Giant Pandas sa unang araw ng 2026 PBA Governors Cup sa Ynares Center Antipolo ngayong Biyernes. 

Pormal na bubuksan ng Terrafirma Dyip at Titan Ultra Giant Risers ang pangatlo at huling torneo ng ginintuang ika-50 taon ng liga.

Hinati ang 13 koponan at ang defending champion TNT Tropang 5G ay nasa Grupo A kasama ang Philippine Cup kampeon San Miguel Beermen, Converge Fiberxers, NLEX, Terrafirma, Titan at Macau. Binubuo ang Grupo B ng Commissioner's Cup kampeon Barangay Ginebra, Magnolia Chicken Timplados Hotshots, Meralco Bolts, Rain Or Shine Elasto Painters, Phoenix Fuel Masters at Blackwater Bossing.

Maglalaro ng double round sa loob ng kanilang grupo at ang unang apat sa bawat grupo ang papasok sa playoffs sa huling linggo ng Oktubre. Pansamantalang titigil ang elimination simula Agosto 15 at babalik sa Oktubre 7 upang magbigay daan sa FIBA World Cup qualifiers at Aichi Nagoya Asian Games.

Tulad ng inaasahan, bida muli ang mga import at malaki ang ambag nila kung gaano kalayo ang maaabot ng kanilang koponan. Nakalista sa Ginebra si Justin Brownlee subalit malaki ang posibilidad na palitan muna siya para maghilom ang mga pilay sa tuhod at hita.

Runbike unang hakbang sa batang siklista sa Olympics

by MC @Sports News | July 10, 2026

Photo: Ang mga batang pambato ng Run Bike na sina Noah Tan, Hudson Schoonmaker, Juan Dominique Uno Principe at Zoe Cruz kasama sina (dulong kanan) Sofia Genato, K2P Runbike Racing Philippines director kasama sina Jeff Cruz,  Irvin Tan, Renee Principe na ibinida ang pag-podium ng mga paslit sa Pilipinas International Race na idinaos sa TLC Park sa Taguig City nang maging panauhin sa lingguhang Tabloids Organization in Philippine Sports (TOPS) Usapang Sports Forum sa PSC Media Room, Rizal Memorial Sports Complex kahapon. (Reymundo Nillama) 

Unti-unti nang ipinakilala ang sport na runbike bilang isa sa mga sports na maaring maging unang hakbang para sa mga batang atleta upang makamit ang asam na pangarap na makalaro sa iba't ibang international competitions gaya ng SEA Games, Asian Games at Olympics. 

'Yan ang misyon ng Kick2Pedal (K2P) Runbike Racing Philippines na nago-organisa ng mga runbike competition sa iba't ibang panig ng bansa kasama na ang katatapos lang na Karera ng Pilipinas International Race na idinaos nitong weekend sa TLC Park sa Taguig City. "Runbike racing or pushbike racing started two years ago.

Parang 'yung objective po natin dahil may nakikita kaming mga malaking races para sa mga bata sa Asia pero sa Pilipinas, meron pong maliliit na races sa mga malls at parking lot, ngayon for the last 10 years, nag-grow na ang sport pero ang runbike siya po ang highest level na competitive," ayon kay Sofia Genato, K2P Runbike Racing Philippines director at pioneer sa lingguhang Tabloids Organization in Philippine Sports (TOPS) Usapang Sports Forum kahapon. 

Kasama ni Genato sa nasabing forum sina Jeff Cruz, Irvin Tan at Renee Principe at mga champion runbike racers na sina Noah Tan, Hudson Schoonmaker, Juan Dominique Uno Principe at Zoe Cruz. 

Susunod na paghandaan ng K2P ang August 8-9 na international race sa Thailand at sa September at November, pati na rin ang pagdaraos ng iba't ibang runbike races sa Mindanao.

Coleman at Ajido lalangoy sa Youth Olympic Games

by Gerard Arce @Sports News | July 9, 2026

 Photo:Ajido at Coleman

Sisisirin ng mga dekoradong swimmers na sina Riannah Chantelle Coleman at Jamesray Ajido ang kanilang kahusayan patungo sa 2026 Dakar Youth Olympic Games upang samahan ang iba pang miyembro ng Philippine national team sa ika-4 na edisyon simula Oktubre 31 hanggang Nobyembre 13 sa Senegal.

Palalakasin ng dalawang batikang manlalaro na kumamada ng husto sa Palarong Pambansa matapos masiguro ang puwesto kasunod ng pagkuwalipika sa kani-kanilang swimming events.

Makakasama nina Coleman at Ajido, na nagkuwalipika sa women’s 100 meters breaststroke at men’s 100 meters butterfly, sina taijiquan wushu athlete Angel Polo, Maritanya Krog ng cycling at tracksters Pi Durden Wangkay at Naomi Marjorie Cesar.

Naunang inihayag ni Philippine Olympic Committee (POC) president Abraham “Bambol” Tolentino na patuloy na lamang nilang inaabangan ang pagpasok ng ilang national athletes gayundin ang iba pang atleta mula sa artistic gymnastics at windsurfing matapos itong imungkahi ng kani-kanilang national sports associations (NSAs).

Pinamumunuan ng International Olympic Committee ang pag-oorganisa ng quadrennial YOG na naglaan ng siyam na University Places para sa Pilipinas, na may edad 15 hanggang 18 taon, para sa kabuuang siyam na spots sa naturang kompetisyon.

Kinabibilangan ng dalawang atleta mula sa athletics, isang woman cyclist sa road at individual time trial, tig-isang lalaki at babae sa artistic gymnastics, isa sa windsurfing, isa sa women’s taijiquan combined sa wushu at isang kinatawan sa men’s 100 meters butterfly at isa sa women’s 100 meters breaststroke sa swimming.