Problema sa baha, 4 dekada na — PBBM... Ako lang ang umaksyon

ni Mylene Alfonso @News | September 3, 2026

Photo: FB / PCO

Matagal nang may flood control master plan ang bansa, ngunit ngayon lamang ito ipinapatupad ng pamahalaan.

Ito ang iginiit ni Pangulong Ferdinand Marcos Jr. matapos inspeksiyunin ang bumagsak na Aquino Bridge sa Brgy. Cut-cut 1 at Agana Bridge sa Brgy. Cariangan sa Tarlac City, na napinsala dahil sa matinding pagbaha at pag-ulan dulot ng habagat.

"We already have a master plan. It’s just never been executed. We are only executing it now. We have had a masterplan for decades, but walang ginawa. Hanggang ngayon lang. Ngayon lang natin sinisimulan," wika ni Marcos.

Ayon sa Palasyo, bahagi ng long-term solutions ng pamahalaan kaugnay sa paulit-ulit na pagbaha sa Central Luzon ang planong pagpapatayo ng limang dam sa Nueva Ecija at 100-kilometrong dike na aabot hanggang Pilar, Bataan.

Sinabi rin ni Palace Press Officer Claire Castro na hindi mabagal ang pamahalaan sa pagtugon sa suliranin ng pagbaha dahil inaayos ng administrasyong Marcos ang mga problemang naipon sa loob ng halos apat na dekada.

“So, dapat nating ipabatid kasi mayroong ibang nais lang na sirain at maging issue itong pagbabaha; ginagamit nila laban sa administrasyon at hindi ipinapakita kung ano iyong naging trabaho na at naiayos at kung ano talaga iyong naitulong na lalong-lalo na ni Pangulong Ferdinand Marcos Jr. patungkol dito sa issue,” pagtatapos niya.

Nagpupunta sa mga binaha – Castro... Gov't. off'cls, naka-branded na damit, oks lang

ni Mylene Alfonso @News | September 2, 2026

Photo: Nasa larawan sina Atty. Claire Castro, Pampanga Governor Lilia Pineda at anak na si Vice Governor Dennis Pineda - PCO / NIA Region III - Central Luzon

Iginiit ng Malacañang na hindi nasusukat sa mamahaling kasuotan ang tunay na serbisyo ng isang opisyal, ngunit dapat pa ring maging sensitibo sa mga biktima ng kalamidad.

Ginawa ni Castro ang reaksyon matapos umani ng batikos sina Pampanga Governor Lilia Pineda at anak nitong si Vice Governor Dennis Pineda dahil sa umano’y pagsusuot ng designer na damit habang umiikot sa mga lugar na sinalanta ng baha.

Ayon kay Palace Press Officer Undersecretary Claire Castro, wala umanong direktiba si Pangulong Ferdinand Marcos Jr. sa Department of the Interior and Local Government (DILG) hinggil sa isyu.

“Wala, kasi walang mensahe ang Pangulo patungkol diyan. Ang pagseserbisyo po ay hindi po nakikita sa damit, nakikita po ito sa gawa, nakikita po ito kung visible ba iyong mga leaders at nandidiyan sila para tumulong. Maybe, ang sasabihin ng iba, bakit designer clothes pa ang suot,” wika ni Castro sa Palace briefing.

Aniya, mas mahalagang tingnan kung tunay na nakatutulong ang isang lider kaysa sa pananamit nito.

“But sabi nga natin, hindi po nakikita ang pagtulong, ang serbisyong totoo sa damit ng isang lider. Mas maganda po, mayroon pong mga iba, napakasimple ng dating, t-shirt, pants, iyong iba nagpapaulan pa, pero wala namang natutulong. So, mas maganda po na tingnan ang lider sa trabaho, sa gawa, hindi po sa damit,” paliwanag ni Castro.

Nang tanungin tungkol sa batas na nag-uutos sa mga opisyal ng pamahalaan na mamuhay nang simple at naaayon sa kanilang katungkulan at kita, sinabi ni Castro na naniniwala siyang batid ng mga opisyal ang tamang asal sa pakikisalamuha sa publiko.

“Hindi natin alam kung ang pagsusuot ng branded na iyan ay mura na sa kanila. So, depende, depende sa kanila, baka iyan ay—kung sa atin na ordinaryong tao ay napakamahal, baka sa kanila ay mura lang iyan, dahil iyan ang kanilang nakagawian,” hirit ni Castro.

Gayunman, iginiit ng Palasyo na dapat pa rin isaalang-alang ng mga lingkod-bayan ang damdamin ng mga mamamayang dumaranas ng paghihirap.

Raid sa mga planta, pinalagan... DND, dawit sa gulo sa industriya ng bakal

ni Mylene Alfonso @News | August 31, 2026

Photo: Sec. Gibo Teodoro - Department of National Defense

Umiigting ang sigalot sa industriya ng bakal sa bansa matapos kuwestiyunin ang umano’y paglahok ng isang inter-agency task force na pinangungunahan ng Department of National Defense (DND) sa ilalim ni Secretary Gilbert “Gibo” Teodoro Jr., sa mga operasyon laban sa ilang steel plants.

Nasa sentro ng usapin ang Philippine Iron and Steel Institute (PISI), na kinabibilangan ng SteelAsia, at ang Philippine Induction Smelting Industry Association (PISIA), na kumakatawan sa ilang kumpanyang gumagamit ng induction furnace sa paggawa ng bakal.

Noong 2018, hiniling ng PISI sa pamahalaan na ipagbawal ang paggamit ng induction furnace. Gayunman, pinahintulutan ng Department of Trade and Industry (DTI) ang naturang proseso basta sumusunod ang mga produktong ginagawa rito sa Philippine National Standards (PNS).

Kamakailan, nagsagawa umano ng mga operasyon ang inter-agency task force ng DND, kasama ang Presidential Anti-Organized Crime Commission, National Bureau of Investigation at Armed Forces of the Philippines, sa ilang plantang miyembro ng PISIA.

Kabilang dito ang Philippine Sanjia Steel Corporation sa Misamis Oriental, kung saan 69 dayuhang manggagawa ang inaresto at ipinasara ang planta. Kalaunan, iniutos ng Department of Justice ang pagpapalaya sa mga naaresto dahil sa kakulangan ng ebidensiya. Nanatili umanong sarado ang planta.

Kinukuwestiyon din ng PISIA camp ang paggamit umano ng radioactive materials bilang batayan sa ilang operasyon, kasabay ng pagbanggit sa naunang insidente ng zinc dust na may Caesium-137 na ibinalik ng Indonesia sa Pilipinas at iniugnayumano sa SteelAsia.

Dahil dito, may mga panawagang linawin ang papel ng DND at iba pang ahensiya sa mga operasyon at tiyaking pantay at naaayon sa batas ang mga regulasyon sa industriya.

Wala pang tugon mula sa DND, PISI o SteelAsia sa mga alegasyong inilatag sa ulat.