ni Mylene Alfonso @News | October 20, 2026
Photo: Supreme Court PH
Opisyal nang inilunsad ng Supreme Court (SC) ngayong Lunes, Oktubre 19, ang eNotarization, na nagbibigay-daan sa mga Pilipino na magpanotaryo ng electronic documents sa pamamagitan ng online platforms.
Maaaring magparehistro sa mga unang SC-accredited facilities na Twala, QLegal, at NotarizeIT, at pumili ng awtorisadong electronic notary public.
Layunin nitong gawing mas madali at accessible ang pagpapanotaryo ng mga dokumento.
ni Mylene Alfonso @News | October 19, 2026
Photo: Chinese Ambassador Jing Quan - Chinese Embassy Manila
Nanawagan si Dr. Jose Antonio Goitia ng masusing pagbabantay sa mga pagkilos ng Tsina sa West Philippine Sea kasunod ng pahayag ni Chinese Ambassador Jing Quan na madaling mananalo ang Beijing kung gagamit ito ng puwersa laban sa Pilipinas.
Itinuring ni Pangulong Ferdinand Marcos Jr. na tila banta ang pahayag, habang inilarawan naman ito ng Department of Foreign Affairs (DFA) bilang hindi direktang banta ng paggamit ng puwersa.
Binanggit din ni Goitia ang mga ulat tungkol sa barkong pandigma ng Tsina na namataan malapit sa Ambulong at Diwaran noong Oktubre 14, gayundin ang presensiya umano ng Chinese maritime militia malapit sa Panatag Shoal.
Kinuwestiyon din niya ang pagtawag sa Pilipinas bilang “troublemaker” at nanawagang linawin ang hindi pa kumpirmadong mga ulat tungkol sa umano'y “Operation Rising Dragon.”
Iginiit ni Goitia, na dapat patuloy na ipagtanggol ng Pilipinas ang soberanya nito at gamitin ang ASEAN Summit sa Nobyembre upang palakasin ang suporta sa mga karapatan ng bansa sa karagatan.
ni Mylene Alfonso @News | October 16, 2026
Photo: Bodjie Dy at Inday Sara Duterte - FB
Hindi pa tinatalakay ni Pangulong Ferdinand Marcos Jr. ang posibleng ipapalit kay Vice President Sara Duterte sakaling mahatulang guilty sa impeachment trial.
Ito ay kasunod ng mga napaulat na si House Speaker Faustino “Bojie” Dy III ang posibleng pumalit bilang susunod na bise presidente sakaling ma-convict si Duterte sa impeachment trial.
Ayon kay Palace Press Officer Undersecretary Claire Castro, nirerespeto ni Pangulong Marcos ang posisyon ng Bise Presidente.
“In fairness at pagrespeto na sa posisyon ng Bise Presidente, hindi po ito pag-uusapan at hindi pa po ito napag-uusapan. Hayaan nating gumulong ang proseso,” pahayag ni Castro sa briefing sa Palasyo.
“Respeto na lang. Kahit pa minsan-minsan ay hindi nagbibigay ng respeto ang iba pero ang Pangulo, nirerespeto ang posisyon ng Bise Presidente,” saad niya.
Binigyang-diin ni Castro na wala pang desisyon ang impeachment court at kailangan din munang hintayin ang paglalahad ng ebidensiya ng depensa.
“Wala pa pong nangyayaring pagdedesisyon ang impeachment court, so hindi po ito napag-uusapan,” dagdag ni Castro.
