Delikado, perhuwisyo... Container yard, iba-ban sa Valenzuela

ni Maeng Santos @News | October 12, 2026

Photo: Container yard sa Valenzuela - Mayor Wes Gatchalian

Posibleng ipagbawal ang operasyon ng mga container yard sa Valenzuela City bago matapos ang taon dahil sa panganib na dulot ng mga ito sa mga residente.

Sa pakikipagpulong ni Mayor Wes Gatchalian sa mga residente at operator ng container yard sa Brgy. Paso de Blas, inireklamo ang mga container na umaabot sa walong patong, matinding ingay, at pagsisikip ng trapiko.

Iniutos ng alkalde na ilayo ang mga container sa kabahayan, limitahan sa limang patong ang pagkakasalansan, at ilagay ang mga ito sa gitna ng compound.

Kaugnay nito, nagsasagawa na ng pampublikong pagdinig ang Sangguniang Panlungsod para sa ordinansang tuluyang magbabawal sa mga container yard sa lungsod, na inaasahang maipapasa sa Disyembre.

Edad 23, kulong sa baril

ni Maeng Santos @News | October 11, 2026

Photo: File

Kulong ang 23-anyos na kelot na nag-iingat umano ng hindi lisensyadong baril nang salakayin ng pulisya ang kanyang bahay sa bisa ng isang search warrant sa Navotas City.

Sa ulat ng tanggapan ni NPD Director P/BGen. Benliner Capili, nakatanggap ng impormasyon ang mga tauhan ni Navotas Police Chief P/Col. Renante Pinuela na ilegal umanong nag-iingat ng baril si alyas Timoy kaya nag-apply sila ng search warrant sa korte.

Nang mag-isyu ng search warrant ang Navotas Regional Trial Court (RTC), Branch 288, agad sinalakay ng pinagsamang mga operatiba ng Navotas CPS Intelligence Section, at SWAT Team ang bahay ng suspek.

Ala-1:25 ng hapon nang halughugin ng mga pulis sa bisa ng nasabing search warrant ang loob ng bahay ng suspek sa Brgy. NBBS Proper kung saan nasamsam ang isang kalibre .38 revolver na kargado ng dalawang bala na walang kaukulang mga dokumento.

Valenzuela, walang NCAP

ni Maeng Santos @News | October 5, 2026

Photo: File / Valenzuela highway traffic - CC3 - Valenzuela City Command, Control and Communication Center

Pansamantalang sinuspinde ni Valenzuela City Mayor Wes Gatchalian ang nakatakdang pagpapatupad ng Metropolitan Manila Development Authority (MMDA) sa No Contact Apprehension Policy (NCAP) sa lungsod ngayong araw, October 5.

Ayon kay Mayor Wes, nauunawaan niya ang layunin ng NCAP bagamat sa sitwasyon aniya ngayon ng lungsod ay hindi pa ito tamang panahon dahil sa sunud-sunod na road construction, rehabilitasyon, at pagkukumpuni ng mga pangunahin nilang lansangan.

Dagdag pa niya, uunahin muna nila ang maayos at ligtas na daloy ng trapiko para sa mga Valenzuelano saka na nila ito ipatutupad hanggang sa susunod na paglalabas nila ng abiso.