Tindero, dinedbol ng kaalitan

@Balitang Probinsiya | September 29, 2023

QUEZON -- Isang tindero ang namatay nang pagbabarilin ng kanyang nakaalitan kamakalawa sa Bgy. Lalig, Tiaong sa lalawigang ito.

Kinilala ng pulisya ang biktimang nagtamo ng mga tama ng bala sa ulo at katawan na si Christopher Magbayao, samantalang ang suspek ay si Ryan dela Rosa, kapwa nasa hustong gulang, at pawing nakatira sa naturang bayan.

Ayon sa ulat, habang lulan ng tricycle si Magbayao ay biglang sumulpot si Dela Rosa at agad pinagbabaril ang biktima.

Isinugod agad ng mga saksi ang biktima sa ospital, pero idineklara itong dead-on-arrival.

Nahaharap si Dela Rosa sa kasong murder, illegal possession of firearms and ammunitions at paglabag sa Comelec gun ban.

Ex-convict, arestado sa boga

@Balitang Probinsiya | September 29, 2023

AKLAN -- Isang ex-convict ang dinakip ng pulisya nang makumpiskahan ng isang baril at mga bala kamakalawa sa tapat ng tanggapan ng korte sa bayan ng Mambusao sa lalawigang ito.

Ang suspek ay kinilala ng pulisya na si Jeriel Olog, 23, at residente ng Bgy. Roxas, Tapaz, Capiz.

Nabatid na papasok sana si Olog sa tanggapan ng korte para dumalo sa hearing sa kaso ng kanyang pinsan, at nang tingnan ng mga awtoridad ang dala nitong bag ay dito nakita ang isang kalibre .45 pistola at mga bala na walang kaukulang dokumento, at dahil dito ay agad inaresto ng mga operatiba ang suspek.

Nang alamin ng pulisya ang pagkakakilanlan ni Olog, nabatid na dati itong nakulong sa iba’t ibang kaso noong 2022.

Nakapiit na ang suspek na nahaharap sa kasong illegal possession of firearms and ammunitions at paglabag sa Comelec gun ban.

2 Komunistang NPA, patay sa engkuwentro

@Balitang Probinsiya | September 29, 2023

MASBATE -- Dalawang miyembro ng New People’s Army (NPA) ang napatay sa naganap na engkuwentro sa pagitan ng tropa ng pamahalaan at mga komunista kamakalawa sa Bgy. Nainday, Placer sa lalawigang ito.

Sa ngayon ay inaalam pa ng mga awtoridad ang pagkakakilanlan ng mga napatay na miyembro ng NPA na nag-o-operate sa lalawigan.

Nabatid na may tinanggap na impormasyon ang mga awtoridad na may mga miyembro ng NPA na gumagala sa naturang barangay.

Dahil dito, agad rumesponde ang tropa ng pamahalaan, pero bigla silang pinagbabaril ng mga komunista kaya napilitan ang mga awtoridad na gumanti ng putok at napatay ang dalawang NPA.

Nang makita ng ibang rebelde na napatay ang dalawa nilang kasamahang NPA ay mabilis silang tumakas at sa ngayon ay tinutugis pa sila ng tropa ng pamahalaan.