Pagsunod kay Kristo sa landas ng katotohanan

ni Fr. Robert Reyes @Kapaayapaan / Patakbo-takbo | April 18, 2026

“Ipinahayag ng galing sa itaas ang kanyang nakita at narinig!” (Huan 3:31–36)

Ganito ang naging buong buhay ng ating Panginoon. Anumang tinanggap Niya mula sa Kanyang Ama ay Kanyang ipinahayag at ibinahagi sa iba—walang itinatago, walang sinasarili, at walang ipinagkakait. Higit sa lahat, hindi Niya itinago ang liwanag ng katotohanan.

Ngunit ayon sa ebanghelyo, “dumating ang liwanag ngunit hindi ito tinanggap” (Huan 3:16–21). Mula sa mga unang propeta hanggang sa mga sumunod pa, bagama’t kanilang ipinahayag ang katotohanan, marami sa kanila ang pinahirapan at pinatay sa halip na pakinggan. Sa kabila nito, nanatili silang matatag at tapat sa kanilang bokasyon ng pagpapatotoo. Ganoon din ang buhay ni Kristo—mula simula hanggang wakas, nanatili Siyang tapat sa katotohanan.

Sa kasalukuyang panahon, tila may panibagong “hanapbuhay” na mataas ang kita—ang pagsisinungaling at pagpapakalat ng “fake news.” Ito ang gawain ng mga “troll” na gumagamit ng social media upang baluktutin at baguhin ang katotohanan. Batid ito ni Papa Leo XIV, kaya’t patuloy ang kanyang walang sawang panawagan na itigil ang digmaan at bumalik sa diyalogo at mapayapang pag-uusap.

Habang nababahala ang mundo sa lumalalang tensyon sa pagitan ng Estados Unidos at Iran, nagpapatuloy naman ang paghahanap ng katotohanan sa pamamagitan ng impeachment process sa Kongreso. Kamakailan, dininig ang pahayag ni Ramil Mariaga hinggil sa kanyang umano’y papel bilang “bagman” ng dating Pangulo at ng Bise Presidente.

Kasabay nito, kinatigan ng Commission on Audit (COA) ang “Notice of Disallowance” laban sa Office of the Vice President kaugnay ng P73.28 milyong ginamit noong 2022. Ayon sa COA, ang naturang pondo ay napunta sa mga proyektong walang malinaw na kaugnayan sa itinakdang layunin, tulad ng surveillance, intelligence gathering, at peacekeeping. Sa inilabas na dokumento noong Agosto 8, 2024, nabanggit din ang kakulangan ng sapat na batayan upang mapatunayang naging epektibo ang mga proyektong pinondohan.

Ipinaliwanag ng COA na ang Notice of Disallowance ay ibinibigay sa mga transaksyong itinuturing na ilegal, irregular, hindi kailangan, labis, maluho, o labag sa konsensiya. Gayunpaman, nilinaw din ng ahensya na hindi nito tinutukoy na “fraudulent” o imbento ang mga ulat, kundi kulang at hindi umaayon sa umiiral na patakaran ang pagsusumite ng dokumentasyon.

Dagdag pa ni Mariaga, inutusan umano siya ng Bise Presidente na maghatid ng mga bag na naglalaman ng P30 hanggang P35 milyon sa iba’t ibang lugar sa Laguna at Quezon City, na sinasabing nagmula sa Department of Education sa Pasig City.

Dahil dito, umani si Mariaga ng matinding batikos mula sa kampo ng Bise Presidente—isang hindi na rin nakapagtataka, lalo na sa harap ng malawak na network ng mga tagasuporta at online trolls. Sa ganitong sitwasyon, mahalaga ang katatagan at pag-iingat ng mga nagsasalita ng katotohanan, gayundin ng mga nagbibigay sa kanila ng proteksyon.

Hindi madali ang landas ng katotohanan. Ngunit ito ang bokasyon ni Kristo—at ito rin ang bokasyon ng sinumang pumipiling sumunod sa Kanya: ang magsabi ng totoo, sa kabila ng panganib at pagtutol.

Mga benepisyo at insentibo ng barangay micro business enterprise?

ni PAO Chief Persida Rueda-Acosta @Magtanong Kay Attorney | April 18, 2026

Dear Chief Acosta,

Ano ba ‘yung tinatawag na barangay micro business enterprises at ang mga rekisito upang maituring na isa? Totoo ba na may insentibo sa pagpapasahod ang isang barangay micro business enterprise? — Cheska

---

Dear Cheska, 

Ang sagot sa iyong katanungan ay matatagpuan sa ating mga batas, espesipiko sa Republic Act (R.A.) No. 9178, o mas kilala sa tawag na “Barangay Micro Business Enterprises (BMBE's) Act of 2002.”  Nakasaad sa Seksyon 3 (a) ng nasabing batas ang kahulugan ng barangay micro business enterprise (BMBE), na nagsasaad:

“Section 3. Definition of Terms – As used in this Act, the following terms shall mean:

(a) "Barangay Micro Business Enterprise," hereinafter referred to as BMBE, refers to any business entity or enterprise engaged in the production, processing or manufacturing of products or commodities, including agro-processing, trading and services, whose total assets including those arising from loans but exclusive of the land on which the particular business entity's office, plant and equipment are situated, shall not be more than Three Million Pesos (P3,000,000) The Above definition shall be subjected to review and upward adjustment by the SMED Council, as mandated under Republic Act No. 6977, as amended by Republic Act No. 8289.

For the purpose of this Act, "service" shall exclude those rendered by any one, who is duly licensed (sic) government after having passed a government licensure examination, in connection with the exercise of one's profession.” 

Hinggil sa nabanggit, ang BMBE ay tumutukoy sa isang negosyo na ang kabuuang halaga ng mga ari-arian, kabilang ang mga nagmula sa utang, ngunit hindi kasama ang lupang kinatatayuan ng negosyo, ay hindi lalampas sa P3 milyon. 

Upang maituring na BMBE, kinakailangang taglayin ng negosyo ang mga sumusunod na rekisito:

1. Uri ng Negosyo – ang negosyo ay dapat na nakikibahagi sa produksyon ng mga produkto o kalakal, pagpoproseso ng mga produkto, pagmamanupaktura o paggawa ng mga kalakal, agro-processing, kalakalan (trading), o pagbibigay ng serbisyo;

2. Halaga ng Ari-arian – ang kabuuang mga ari-arian ng negosyo, kabilang ang mga nagmula sa utang, ngunit hindi kasama ang lupang kinatatayuan ng opisina, planta, o kagamitan, ay hindi lalampas sa P3,000,000;

3. Hindi Saklaw ang Ilang Propesyonal na Serbisyo – hindi kabilang sa BMBE ang mga serbisyong ibinibigay ng mga taong lisensyado ng pamahalaan matapos makapasa sa government licensure examination kaugnay ng pagsasagawa ng kanilang propesyon; at

4. Rehistrasyon – ang negosyo ay dapat nakarehistro sa lungsod o munisipalidad at nakatanggap ng certificate of authority bilang BMBE upang mapabilang sa talaan ng BMBE at makinabang sa mga pribilehiyong ibinibigay ng batas.

Dagdag din sa nasabing batas, binibigyan ng insentibo ang isang BMBE, sa anyo ng eksepsiyon mula sa saklaw ng batas ukol sa minimum wage (Seksyon 8 ng Republic Act No. 9178). Gayunpaman, ang nasabing eksepsiyon ay tumutukoy lamang sa minimum na sahod sa kadahilanan na ang lahat ng empleyadong sakop ng nasabing batas ay may karapatan sa parehong mga benepisyong ibinibigay sa sinumang regular na empleyado, tulad ng mga benepisyong ukol sa sosyal na seguridad at pangangalagang pangkalusugan.

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay. 

Maraming salamat sa iyong patuloy na pagtitiwala.

Publiko, nananawagan na ilabas ang pangalan ng 26 cong-tractors

ni Pablo Hernandez @Prangkahan | April 18, 2026

YEAR 2000 O PANAHON NG NOO'Y PRES. GMA NAG-UMPISA ANG RAKET DAW NI ZALDY CO SA FLOOD CONTROL PROJECTS – Batay sa impormasyong nakasaad sa Wikipedia, noong taong 2000, sa panahon ng administrasyon ni dating Pangulong Gloria Macapagal-Arroyo, umano’y nagsimulang lumawak ang mga kontrata sa flood control projects na nakuha ng construction firm ni dating Ako Bicol party-list Rep. Zaldy Co na Sunwest Corporation.

Ayon sa mga ulat, kung mapapatunayan ang mga paratang na may kaugnayan sa kanya, mahalagang masuri ang buong saklaw ng mga proyektong naugnay sa kanya, hindi lamang ang mga isyung sumasaklaw sa taong 2023 hanggang 2025.

Nanawagan ang ilang sektor na kung magpapatuloy ang imbestigasyon ng Senate Blue Ribbon Committee sa pamumuno ni Sen. Lacson, dapat saklawin nito ang mas mahabang panahon mula 2000 hanggang 2025 upang matukoy kung may iregularidad sa mga flood control projects na naugnay sa kanya at kung may posibleng pinsalang nagawa sa pondo ng pamahalaan sa loob ng naturang panahon. Boom!

XXX

DAPAT IKANTA NA NI ZALDY CO LAHAT NG MGA KASABWAT NIYA SA FLOOD CONTROL SCAM PARA MABAWASAN GALIT SA KANYA NG TAUMBAYAN – Kapag naisalang si Zaldy Co sa Senate Blue Ribbon Committee, para mabawasan ang galit ng taumbayan sa kanya, inaasahan ng ilan na isiwalat na niya ang lahat ng mga umano’y kasabwat sa mga isyu ng flood control projects mula taong 2000 hanggang 2025.

Ayon sa ganitong pananaw, hindi lamang siya dapat managot kung mapatunayang may pagkakasala, kundi pati na rin ang iba umanong sangkot sa anumang iregularidad sa paggamit ng pondo ng bayan. Period!

XXX

26 CONG-TRACTORS, DAPAT HUBARAN NG MASKARA NI OMBUDSMAN BOYING REMULLA – Binigyang-linaw ni Deputy Ombudsman Mico Clavano na ang 26 na kongresistang iniimbestigahan ng Office of the Ombudsman ay tinaguriang “cong-tractors” o mga mambabatas na may kaugnayan umano sa mga kontraktor at sa kontrobersiya sa flood control projects.

Nanawagan ang ilang sektor na isapubliko ang pagkakakilanlan ng mga naturang kongresista upang malaman ng publiko kung sino-sino ang sangkot sa isyu. Boom!

XXX

KUNG HINDI HAHARAPIN NI VP SARA ANG KASO NIYANG IMPEACHMENT, BAKA ITO PA ANG IKATALO NIYA SA 2028 PRESIDENTIAL ELECTION – Matapos umanong hindi dumalo si Vice President Sara Duterte sa impeachment hearing ng House Justice Committee, nagsagawa ng survey ang OCTA Research.

Batay sa resulta, nasa 7 sa bawat 10 Pilipino ang nagsasabing mas mainam na harapin na ng Bise Presidente ang impeachment case na isinampa laban sa kanya sa Kamara.

Sa nakatakdang impeachment hearing sa Abril 22, 2026, inaasahan ng ilang sektor na personal siyang dadalo upang sagutin ang mga akusasyon. Period!