P-Digong, pina-plastik lang ang mga Tsekwa, period!

ni Ka Ambo - @Bistado | September 26, 2020

Nagpatutsadahan ang US at China sa US Security Council video conference.

Puro kayo dakdak, suntukan na!

◘◘◘

Tinira ni P-Digong ang China sa Asia-Pacific online conference.

Kailan kaya niya mumurahin si Chinese Pres. Xi Jinping?

◘◘◘

Malinaw na binobola lang ni P-Digong si Xi.

Pero, sa totoo lang, binobola rin lang naman talaga siya ng Tsekwa.

Ang tawag d’yan ng mga expert ay “diplomasya” na ang katumbas sa modernong Tagalog ay “plastik”!

◘◘◘

Iniutos ni P-Digong na ipamigay na ang nalalabi pang P10 bilyon para sa COVID-19.

Tiyak na magiging “campaign fund” ito ng mga LGU executives!

◘◘◘

Kaawa-awa ang mga mahihirap na estudyante at titser na may mahinang kalidad ng kompyuter at mahinang signal ng telecom.

Anti-poor ang online class!

◘◘◘

Ipinatutupad pa rin ang modular scheme ng DepEd.

May contact pa rin ang titser, guro at estudyante.

Akala ko ba ay “online class” lang ang pinayagan ni P-Digong?

◘◘◘

Bagsak ang ekonomiya.

At tinatayang papagrabe ito nang papagrabe sa susunod pang anim na buwan!

◘◘◘

Binawasan ang interest sa credit card.

Paano ang finance charges?

Takot kuno ang mga botante sa COVID-19, ginawa pang dahilan magka-‘no elections’ lang, pwe!

ni Pablo Hernandez III - @Prangkahan | September 26, 2020

HINDI TAKOT BUMOTO ANG MGA BOTANTE, PERO TAKOT ANG MGA PUULITIKO NA MATALO—Iminungkahi ni Pampanga Rep. Mikey Arroyo na ipagpaliban ang Presidential, national at local elections sa 2022 dahil karamihan sa mga nakausap niyang botante sa kanyang distrito ay takot bomoto dahil sa COVID-19.

Ganu’n? Eh, baka naman ang mga pulitikong nasa poder ngayon ang takot matalo sa eleksiyon kaya ginagawang dahilan ang pandemya para manatili pa sila sa puwesto sa pamamagitan ng no-el o no elections sa 2022? Pwe!

◘◘◘

3 BESES NAKANSELA ANG BGY. AT SK ELECTIONS, BAKA GANYAN DIN ANG MANGYARI SA 2022 ELECTIONS—Ayon sa mga opisyal ng Comelec, wala sa kanilang kapangyarihan ang pagkansela ng eleksiyon kundi nasa pagpapasya ni P-Duterte at ng Kongreso.

Dahil sa sinabing ‘yan ng Comelec, posibleng wala na namang maganap na eleksiyon sa 2022 kasi tatlong beses nang ginawa ng Duterte gov’t. at mga kaalyado niya na i-postponement ang barangay at SK (Sangguniang Kabataan) elections noong October 2016, October 2017 at May 2020, tsk-tsk-tsk!

◘◘◘

KAPAG IDINAAN SA KOREO ANG PAGBOTO NG MGA SENIOR CITIZENS, MAY GARAPALANG DAYAAN NA MANGYAYARI RIYAN—May ilang lawmakers ang nagsusulong na idaan sa koreo (mail) ang gagawing pagboto ng mga senior citizens sa Presidential, national at local elections sa 2022.

Nakupo, tiyak may garapalang dayaan mangyayari riyan kasi baka pati ang mga senior citizens dead na ay makapagpadala ng sulat sa Comelec para bomoto, boom!

◘◘◘

WALANG PANG-AYUDA, PERO MAY PAMBILI NG PRESIDENTIAL PLANE WORTH P2-B—Sabi ni P-Duterte noong Agosto 2020, nang magdeklara siya ng dalawang linggong MECQ, base sa kahilingan ng mga health workers sa Metro Manila, Cavite, Rizal, Laguna, Batangas at Bulacan ay wala na raw pang-ayuda ang kanyang gobyerno sa mga mahihirap na residente sa mga lugar na ito.

Wala na raw pang-ayuda, pero kamuka’t-mukat n’yo, bumulaga ang presidential plane na binili ng Duterte gov’t. sa halagang P2 bilyon, buwisit!

Panahon ng pandemya, panahon din ng adiksiyon sa social media, trolls at fake news!

ni Fr. Robert Reyes - @Kapaayapaan | September 26, 2020

Reklamo at tanong ng maraming magulang, “Paano kaya namin madidisiplina ang aming anak sa paggamit ng gadget at internet?”

Hindi simple ang tanong ng mga magulang. Maraming magulang ang seryosong nababahala sa labis na pagka-adik ng kanilang anak sa gadget.

Marami tayong nadalaw na bahay at nakita ang sitwasyon ng mga ito pagdating sa tama at maling paggamit ng gadget at internet.

Isang karaniwang halimbawa, hindi mo halos makausap ang mga bata dahil bawat isa ay may hawak ng cellphone at todong nakatutok dito. Minsan, kumpleto na ang trahedya dahil pati ang mga magulang ay hindi na rin nakikipag-usap dahil nakatutok din sa kanilang gadget. Samakatwid, hindi lang ito problema ng kabataan kundi problema ng maraming pamilya.

Maraming ang tutok sa iba’t ibang computer o mobile games, meron ding adik sa social media platforms at nariyan din ang mga suki ng gambling websites at dating sites, at marami pang iba.

Ano ang nangyari sa nagdaang anim na buwan hanggang sa kasalukuyan? Napakaraming libreng panahon para sa buong pamilya sa bahay. Gintong pagkakataon sana na matutong gamitin nang tama ang internet, sa halip na ang internet ang gumamit o umalipin sa atin.

Samantala, kung paano naipanalo ng Facebook ang maraming kandidato noong nakaraang halalan 2016, tila ngayon ay nagsisimula na naman itong gamitin para sa nalalapit na eleksiyon. Kaya’t ngayon pa lamang, maaaring gamitin ang social media upang pasikatin ang kandidato at siraan naman ang iba.

Noong Martes, ika-22 ng Setyembre 2020, tinanggal ng Facebook ang mahigit 100 na pekeng domestic accounts na may kaugnayan sa PNP at AFP, na tumutugis sa mga aktibista at disidente. Tinanggal din nito ang mahigit sa 150 accounts na sumusuporta sa Pangulo at sa “pagtakbo” ng anak nito bilang pangulo sa 2022.

Ayon sa Facebook, ipinamalas ng mga ito ang “Coordinated Inauthentic Behavior” o CIB.

Ito ang tahasang pagtutulungan ng iba’t ibang indibidwal sa pagpapalaganap ng mga balita o impormasyon na walang katotohanan upang makapanira lamang.

Madaling itanggi ng pamahalaan ang maling paggamit sa Social Media. Subalit, malinaw sa karanasan ng marami kung paano manira ang mga trolls na patuloy na nagpapalaganap at nagpapalakas sa Coordinated Inauthentic Behavior.

Sa mga magulang na inaalalayan ang kanilang anak sa pagsuong ng mga ito sa remote, blended learning, napakahalagang tutukan at tulungan ninyong matutuhan ng mga ito ang tamang paggamit ng gadget. Napakahalagang ituro ang etika sa social media. Napakahalagang ituro ang disiplina o pagkontrol ng sarili sa adiksiyon sa gadgets at internet.