Christmas decor na mura nga, palpak naman

by Info @Editorial | September 7, 2026

Setyembre pa lang, pero nagsisimula nang kumalat ang murang Christmas lights, extension cords at iba pang dekorasyong de-kuryente. 

Kasabay nito, dapat ding maging mas mapanuri ang publiko dahil hindi lahat ng mura ay ligtas, lalo na kung manipis ang wiring, madaling uminit ang plug, o walang malinaw na safety certification.

Pero hindi puwedeng sa consumer lang ibagsak ang responsibilidad. Kung substandard ang produkto, bakit nakararating sa mga tindahan at online marketplaces? 

Dapat mas maaga at mas agresibo ang inspeksyon, testing at pagsita sa mga importer, retailer at seller na naglalabas ng delikadong produkto.

May pananagutan din ang online platforms na huwag gawing tambakan ng kaduda-dudang electrical products ang kanilang marketplaces. 

Kung kayang bantayan ang presyo, ads at commissions, dapat kaya rin nilang higpitan ang pagbebenta ng produktong maaaring pagmulan ng sunog.

Ang Pasko ay panahon ng mga ilaw, hindi ng sunog. Bago pa dumami ang mga mamimili, dapat kumilos na ang mga awtoridad. 

Ang tunay na consumer protection ay hindi nagsisimula pagkatapos ng aksidente—nagsisimula ito bago pa may malagay sa panganib.

Droga sa vape, hindi na simpleng bisyo

by Info @Editorial | September 6, 2026

Hindi na simpleng bisyo ang problema. Kapag vape na may marijuana at party drugs ay madaling nakakarating sa kamay ng mga kabataan, malinaw na may malaking butas sa pagpapatupad ng batas at pagbabantay sa bentahan.

Mas nakababahala kung nagiging normal na bahagi na ito ng gimikan at barkadahan. Hindi sapat ang paminsan-minsang raid at kumpiskasyon habang patuloy namang nakalulusot ang mga supplier at tulak.

Mas delikado pa, nag-iiba na rin ang paraan ng bentahan. Hindi na kailangang magtungo sa madidilim na eskinita dahil maaaring gamitin ang social media, messaging apps at delivery services para ilapit ang ilegal na produkto sa mga kabataan.

Dapat ding kumilos ang mga magulang, paaralan at komunidad. Hindi sapat ang sermon kapag huli na ang lahat; kailangan ang mas maagang edukasyon, pagbabantay at malinaw na babala tungkol sa panganib ng droga at mga produktong ipinapasa bilang ordinaryong vape.

Habang ang kabataan ang nakikitang gumagamit, dapat habulin ang mas malaking tanong: Sino ang kumikita at sino ang nagpapapasok ng droga sa kanilang mundo?

Kung seryoso ang gobyerno sa pagsugpo sa ilegal na droga, putulin ang suplay—hindi puro maliliit na gumagamit ang gawing mukha ng problema.

System loss, hindi dapat dagdag-bayarin ng konsyumer, tanggal VAT wala lang!

by Info @Editorial | September 5, 2026

Sa bansang halos buwan-buwan ay problema ang mataas na singil sa kuryente, bawat pisong mababawas sa bayarin ay malaking bagay. Kaya tama lamang ang panukalang alisin ang VAT sa system loss—kuryenteng hindi naman direktang napapakinabangan ng ordinaryong konsyumer.

Matagal nang pasan ng publiko ang samu’t saring singil sa electric bill. Mas masakit, pati ang system loss ay may buwis pang ipinapatong. Kung may paraan para bawasan ang pasanin, bakit hindi ginawa noon pa?

Pero huwag tayong magdiwang agad. Ang tunay na sukatan ng panukalang ito ay hindi ang ganda ng pangako kundi ang aktuwal na bawas sa buwanang bill. Kapag naipasa, dapat tiyaking bawat sentimong matitipid ay diretso sa konsyumer—walang palusot, walang bagong singil na ipapalit.

Sa mahal ng kuryente, hindi pabor ang bawas-singil. Karapatan ito ng konsyumer.