Hindi talaga sisibakin si ‘Ante Kler’ kasi taklesa, sanay makipagbardagulan sa mga anak ni FPRRD at sa DDS vloggers

ni Pablo Hernandez @Prangkahan | October 25, 2026

MALABONG TANGGALIN SA PUWESTO SI 'ANTE KLER’ KASI TAKLESA ITO, SANAY ITONG MAKIPAGBARDAGULAN SA MGA ANAK NI FPRRD AT SA MGA DDS VLOGGERS — Bilang respeto kay Sec. Lino Cayetano bilang bagong head ng Presidential Communications Office (PCO), ay nag-courtesy resignation ang mga undersecretaries at assistant secretaries ng departamento upang makapagpasya ito kung sino sa mga nag-resign ang tatanggapin ang resignation at pananatilihin sa puwesto, kabilang si PCO spokesperson, Usec. Claire Castro sa mga nag-resign, pero hindi tinanggap ang kanyang resignation at pinanatili siya sa posisyon dahil ayon kay Sec. Lino ay "treasure in this government" daw si Ante Kler.

Hindi talaga maaalis sa kanyang puwesto bilang PCO spokesperson si ‘Ante’ kasi taklesa ito, sanay o bihasa itong makipagbardagulan sa social media sa mga anak ni former President Rodrigo Roa Duterte (FPRRD) at sa mga Duterte Diehard Supporters (DDS) vloggers, boom! 

XXX

ANG PAGSASAMPA NG KASO NI CONG. PULONG SA GMA NETWORK AY INDIKASYONG GALIT SILA SA NETWORK KAYA'T SINUMAN SA MGA DUTERTE ANG MAGING NEXT PRESIDENT MALAMANG TANGGAL-PRANGKISA ANG ABUTIN NG KAPUSO NETWORK — Una si Vice President Sara Duterte na nagsabing nais niyang idemanda ang GMA Network dahil eksklusibong ibinalita nito ang sinabi ni ex-Pat. Rodulfo Gracioso na sa utos daw ng dati niyang amo na si former Speaker Lord Allan Velasco ay nagdeliber siya ng male-maletang pera sa Bise Presidente at kapatid nitong si Davao City 1st Dist. Rep. Paolo Duterte, at kamakalawa, ang kuya ng VP na si Cong. Pulong ay nagsampa na ng kasong cyber libel sa Kapuso Network.

Sa totoo lang, sa ipinakikitang galit nina VP Sara at Cong. Pulong sa GMA Network ay parang nakikita na natin na sinuman sa mga Duterte ang maging presidente ay tanggal-prangkisa ang abutin ng Kapuso network, matutulad ito sa ABS-CBN network na sa galit dito ng noo'y President Duterte ay pinatanggalan daw nito sa Kongreso ng prangkisa ang Kapamilya network, period!

XXX

'PLAN B' NG HOUSE PROSECUTION KAKASUHAN NG PLUNDER SA OMBUDSMAN SI VP SARA KAPAG HINDI ITO NA-CONVICT SA IMPEACHMENT CASE — Sinabi ni House prosecutor, Manila 3rd Dist. Rep. Joel Chua na hindi naman daw masasayang ang mga ebidensyang nakuha nila sa mga iniatras nilang Article 1 (misuse of confidential funds) at Article 3 (bribery)sa impeachment court kasi dadalhin naman daw nila ang mga ito (mga ebidensya) sa Ombudsman upang makasuhan ng plunder si VP Sara.

Kung ganun, parang inamin na si Cong. Joel Chua na kapag hindi na-convict sa impeachment case si VP Sara, ay meron silang "plan b" at ito ay ang pagsasampa ng kasong plunder sa bise presidente, boom!

XXX

NAKULTA NA YATA UTAK NI SEC. JONVIC SA KAIISIP KAY SEN. DELA ROSA KAYA'T MAGKAKASALUNGAT NA ANG SINASABI NIYA SA PUBLIKO PATUNGKOL SA KUNG PAANO MAHUHULI ANG SENADOR — Inanunsyo ni Department of Interior and Local Government (DILG) Sec. Jonvic Remulla ang P50 million reward sa sinumang makapagtuturo sa pinagtataguan ni Sen. Ronald Dela Rosa na may kasong crimes against humanity sa International Criminal Court (ICC).

Aba teka, kamakailan lang ay sa presscon sinabi ni Sec. Jonvic, na alam na nila ang kinaroroonan ni Sen. Dela Rosa at nakikipag-negotiate na lang daw ang pamahalaan sa mga armadong grupo na nagkakanlong sa senador para mapayapang pasukuin ito upang maiwasan daw ang pagdanak ng dugo, pero ngayon iba naman ang kanyang sinasabi na may P50M reward daw ang makapagtuturo sa pinagtataguan ng senador.

Hay naku! Tila yata nakukulta na ang isip ni Sec. Jonvic sa kaiisip kay Sen. Dela Rosa kung paano ito mahuhuli kaya magkakasalungat na ang sinasabi niya sa publiko, period!