Ilagan na-bullseye ang kampeonato sa SouthEast Asia Tour Soft Darts

ni Eddie M. Paez Jr. @Sports | August 17, 2026

Photo: Circulated

Nasapul ni Lourence Ilagan ang "bullseye" kontra kay lokal bet Tan Jenn Ming sa huling duwelo ng paligsahan upang tanghalin ang bituin ng Pilipinas bilang kampeon ng South East Asia (SEA) Tour Soft Darts Grandfinals sa Johor Bahru, Malaysia.

Segunda na lang sa 48-anyos na Pinoy ang naging papel sa bakbakan sa Paradigm Mall Convention Center ni Ming samantalang naghati naman sa pakonsuwelong pangatlong puwesto ang mga alas ng punong-abala na sina Terry Tan at Ignatius Tan. 

Naging kontrabida si Ilagan sa planong all-Malaysian finale at sa halip ay nakuntento ang host sa isang 2-3-4 na pagtatapos. Dahil sa solidong tagumpay, bukod sa pangkampeonatong tropeo at sa SGD 2,000, napasakamay ng topseed na darter mula sa Pilipinas ang nag-iisang tiket upang makapukol sa prestihiyosong Super Darts 2027 sa Toyosu Pit ng Tokyo, Japan sa darating na Enero.

Nauna rito inilagay ni "The Gunner" Ilagan sa pedestal ang isa na namang tropeo matapos siyang magkampeon sa huling yugto ng SEA Tour noong Biyernes. Ang tagumpay ay nagbigay sa 2-time Asian Championships titlist ng kabuuang 244 puntos sa Tour bago nagsimula ang Grandfinals sa Johor Bahru.

Bago rin idinaos ang huling yugto (Stage 7) ng Tour, limang beses nang sumampa sa podium ang tanyag na anak ng Cainta habang nanguna naman sa Stage 4 at Stage 5 ang tubong Penang, Malaysia na si Tengku Shah.

Centeno runner-up sa Women's World 10-Ball C'ships sa Italya

ni Eddie M. Paez Jr. @Sports | August 7, 2026

Photo: Nagtapos na runner-up si Chezka “The Flash” Centeno matapos mabigo laban kay Belarusian Margarita Fefilova sa 2026 Banca del Fucino WPA Women's World 10-Ball Championship final sa Rome, Italy.

Naisalba ni Pinay cue artist Chezka Centeno ang 2nd place sa Women's World 10-Ball Championships na nagwakas sa billiards hall ng Rome Cavalieri sa Italya.

Bagamat nabigong maipagtanggol ang koronang napagwagian noong 2025 sa Indonesia, pinatunayan ng pambato ng Zamboanga City ang mataas na kalidad ng kanyang pagsargo dahil ilang araw pa lang ang nagdaan nang umakyat siya sa pandaigdigang trono ng women's 8-ball.

Isa rin sa may pinaka-solidong rekord sa buong daigdig ang nakadikit sa pangalang "The Flash" Centeno kung titingnan ang kanyang mga napagwagiang karangalan: World Games 2025 (2nd); World 10-Ball 2023 (1st); World 10-Ball 2025 (1st); World 8-Ball 2025 (2nd); World 8-Ball 2026 (1st); at World 10-Ball 2026 (2nd).

Malupit na 4-0, 4-3, 4-3 ang naging pasaporte ng Pinay cue star sa semis kontra kay Seo Seoa ng South Korea pagkatapos desisyunan sa quarterfinals ang Haponesang si Chihiro Kawahara, 4-3, 4-1, 3-4, 4-0, sa Roma.

Sa finals laban kay Margarita Fefilova, maagang napag-iwanan si Centeno, 1-4, 0-4, pero nakabawi agad ito, 4-1, 4-0. Sa deciding match, umaangas nang husto ang Belarusian tungo sa una nitong world title na nagkakahalaga ng $55,000. Pakonsuwelong $30,000 naman ang napasakamay ng Pinay sa paligsahang may basbas ng World Pool Billiards Association (WPA).

Del Mundo at Espedido nagpagalingan sa U.S.

ni Eddie M. Paez Jr. @Sports | July 12, 2026

Photo: Sampung taong gulang pa lamang, opisyal nang kinoronahan ang Pilipinong golf phenom na si Kamilla G. Del Mundo (kanan) bilang double world champion matapos makuha ang dalawang prestihiyosong internasyonal na titulo habang si Mavis Espedido ay USWING Mojing Jr. World Champion 9-19 girls division. (natlgolfassociationfbpix) 

Kumislap nang husto ang mga pambatong golfers ng Pilipinas na sumabak sa magkakahiwalay na mga paligsahan sa Estados Unidos, Asya at Europa sa nakalipas na mga araw.

Ipinoste nina Kamilla Del Mundo (1st) at Mavis Espedido (2nd) ang isang mabangis na 1-2 na resulta para sa bansa sa hanay ng batang babaeng may edad na 9-10 taon nang  magwakas ang Junior World Championships sa San Diego, California. Tumersera rin sa kompetisyon si Zach Guico sa Boys 7-8 years old bracket.

Samantala, nakihati naman si Sean Ramos sa runner-up honors ng Asian Development Tour (ADT): Ever Glory Open sa Dong Hua Elite Golf Club ng Taiwan. Nagwakas ang 54-hole na paligsahan na may tatlong katao sa unahan ng pulutong: Nathan Han (USA), Minhyeok Yang (Korea) at ang Pinoy parbuster na si Ramos. Isang birdie sa playoff ang nagbigay kay Han ng kampeonato. Hindi ito nasabayan nina Yang at Ramos.

Sa Ireland, nagpakita naman si Rianne Mikhaella Malixi ng solidong mga hataw sa Arnold Palmer Cup sa County Kerry, Ireland upang tulungan ang International Team na magwagi kontra sa mga pambato ng Estados Unidos. Sa "Mixed Four Ball," "Foursomes" at "Singles" nangibabaw ang dalagita sa greens ng Tralee Golf Links. Gitgitan ang naging engkuwentro at naitala ang naging pinal na iskor: 30.5 - 29.5.