Presyo ng petrolyo, muling bababa next week

by Jeff Tumbado @News | November 14, 2026

Photo: File

Asahan ang panibagong pagbaba sa presyo ng petrolyo sa susunod na linggo, kung saan posibleng umabot sa P5 kada litro ang rollback sa diesel.

Ayon kay Jetti Petroleum President Leo Bellas, tinatayang bababa ng P4 hanggang P5 kada litro ang diesel, habang P3 hanggang P4 naman sa gasolina.

Nakabatay ang pagtataya sa galaw ng pandaigdigang presyo ng langis at foreign exchange. Gayunman, maaari pang magbago ang aktuwal na rollback dahil hindi pa kasama sa kalkulasyon ang gastos sa freight at insurance.

Inireklamo sa pagka-casino — Ombudsman... Rosario, Cavite Mayor Ricafrente, suspendido

by Jeff Tumbado @News | November 13, 2026

Photo: Jose Voltaire V. Ricafrente - FB

Ipinataw ng Office of the Ombudsman ang preventive suspension laban kay Rosario, Cavite Mayor Jose Voltaire Ricafrente kaugnay ng umano'y pagkakasangkot nito sa pagsusugal sa isang casino sa Bacolod City.

Ayon sa Office of the Ombudsman nitong Huwebes, nag-ugat ang kaso sa reklamong inihain ng Field I investigation Office I matapos magsagawa ng imbestigasyon sa umano'y pagsusugal ng alkalde.

Sa anim na pahinang kautusan, sinabi ng Ombudsman na may sapat na batayan para ipataw ang preventive suspension kay Ricafrente dahil sa matibay na ebidensiya laban sa kanya.

Ayon sa Ombudsman, maaaring maging dahilan ng pagkakatanggal sa serbisyo ang mga kasong Grave Misconduct at Conduct Prejudicial to the Best Interest of the Service na kinakaharap ng alkalde.

Batay sa imbestigasyon, pumasok umano si Ricafrente sa isang casino na matatagpuan sa loob ng hotel noong Marso 14, 2026, kasama ang apat na hindi pinangalanang indibidwal.

Nabatid na naglaro umano ang alkalde sa isang gaming table gamit ang casino chips na nagkakahalaga ng P30,000 at nanalo ng P10,000 bago umalis sa establisimyento.

Binigyang-diin din ng Ombudsman ang Memorandum Circular No. 06, series of 2016 na inilabas ng Office of the President, na nagbabawal sa mga opisyal at empleyado ng pamahalaan na makilahok sa anumang uri ng pagsusugal.

Nilinaw naman ng Ombudsman na hindi nangangahulugan ng pagkakaroon ng administratibong pananagutan ang preventive suspension.

Ayon sa ahensya, maaaring maimpluwensiyahan ni Ricafrente ang imbestigasyon kung mananatili ito sa puwesto dahil sa access nito sa mga rekord ng pamahalaan at posibleng impluwensya sa mga testigo.

Ang preventive suspension na walang sahod ay ipatutupad habang nakabinbin ang resolusyon sa mga kasong Grave Misconduct at Conduct Prejudicial to the Best Interest of the Service.

Agad na ipatutupad ang suspensyon at mananatili ito hanggang sa tuluyang maresolba ang administratibong kaso laban sa alkalde.

Judge niratrat ng riding-in-tandem, todas

by Jeff Tumbado @News | November 13, 2026

Photo: Circulated

Patay ang isang Regional Trial Court Judge makaraang pagbabarilin ng hindi pa batid na mga salarin na lulan sa motorsiklo sa bahagi ng Brgy. Tumaga, Zamboanga City Huwebes ng madaling-araw, Nobyembre 12.

Nakilala ang biktima na si Judge Joseph Wee Sit, Presiding Judge ng RTC Branch 2 sa Isabela City, Basilan.

Lumalabas sa imbestigasyon na sakay ng SUV ang hukom nang biglang dikitan ng riding-in-tandem bago pinagbabaril alas-5:25 ng madaling-araw.

Patungo sana sa pantalan ang hukom at sasakay ng RoRo para tumawid ng Isabela City.

Nasawi ang biktima bunsod ng tinamong anim na tama ng bala ng baril sa katawan mula sa. 45 baril.

Rumesponde ang mga awtoridad sa lugar ng pinangyarihan ng insidente at agad nagsagawa ng follow-up operation laban sa mga salarin.