Graft vs. Gov. Sol Aragones

by Jeff Tumbado @News | September 29, 2026

Photo: Sol Aragones / FB

Isang graft complaint ang inihain sa Ombudsman laban kay Laguna Gov. Sol Aragones at iba pang provincial officials kaugnay ng umano’y iregularidad sa review program na naglaan ng P15,500 bawat benepisyaryo.

Ayon sa reklamong inihain ni Board Member Lorenzo Zuñiga Jr., hindi umano dumaan sa tamang bidding at procurement process ang pagpapalabas ng pondo. May ilang benepisyaryo rin umanong nagsumite ng kuwestiyonableng dokumento at inutusang isauli ang P15,500 bilang pambayad sa pribadong review center.

Kinukuwestyon din ang umano’y paggamit sa ilang job order media personnel ng kapitolyo para sa pagpapakalat ng fake news laban sa mga kritiko ng gobernador.

Mariin namang itinanggi ni Aragones ang anumang iregularidad at sinabing ang P15,500 ay pambayad sa review center, hindi personal na allowance. Hihintayin umano niyang matanggap at masuri ang opisyal na reklamo bago maglabas ng pormal na tugon.

Pastor at Korean missionary, dedo sa ilog

by Jeff Tumbado @News | September 27, 2026

Photo: Circulated - Boliney PNP

Nasawi ang 69-anyos na South Korean missionary at kasamang edad 49 na pastor matapos silang malunod sa Ikmin River sa Sitio Bani, Poblacion, Boliney, Abra noong Biyernes, Setyembre 25.

Nakilala ang mga biktima na sina Hye Sook Byeon at ang pastor na si Zosimo Gaano ng Jesus Our Banner Church.

Ayon sa Municipal Disaster Risk Reduction and Management Office (MDRRMO), tinangay si Byeon ng malakas na agos ng ilog.

Sinubukan naman siyang sagipin ni Gaano, ngunit tinangay rin ito ng rumaragasang tubig.

Narekober ang katawan ni Byeon alas-2:39 ng hapon sa Sitio Paak, Poblacion habang natagpuan naman ang labi ni Gaano alas-6:30 ng gabi sa Bantay, Sallapadan, Abra, matapos ang search and rescue operation sa bahagi ng ilog na nasa pinakaibabang lugar.

Sinasabi sa imbestigasyon na ang dalawang biktima ay nagkaayaan umanong maligo sa nabanggit na ilog.

Jeep, TNVS, taxi, UV Express... Taas-pasahe, tuloy

by Jeff Tumbado @News | September 26, 2026

Photo: File

Inaprubahan ni Acting Transportation Secretary Giovanni Lopez ang rekomendasyon ng Land Transportation Franchising and Regulatory Board (LTFRB) na ipatupad ang mga dagdag-pasahe sa mga pampublikong sasakyan na inaprubahan noong Marso.

Inaprubahan din ni Lopez ang rekomendasyon ng LTFRB para sa provisional fare increase sa UV Express at taxi services.

Batay sa inaprubahang dagdag-pasahe, P1 ang dagdag sa kasalukuyang minimum fare ng mga jeepney, habang P2 naman ang dagdag sa bawat susunod na kilometro.

Para sa mga traditional jeepney, magiging P14 na ang minimum fare para sa unang apat na kilometro, mula sa dating P13. Ang dagdag-pasahe sa bawat susunod na kilometro ay magiging P2, mula sa dating P1.80.

Samantala, magiging P17 na ang minimum fare para sa mga modern jeepney sa unang apat na kilometro, mula sa dating P15. Ang bawat susunod na kilometro ay may dagdag na P2.40, mula sa dating P2.20.

Samantala, may dagdag-flagdown sa TNVS na P20, sa taxi naman ay P10 habang sa UV Express ay P0.40-P0.60/KM.