₱5K multa sa motor na walang plaka o 'di nababasa

ni PAO Chief Persida Rueda-Acosta @Magtanong Kay Attorney | October 30, 2026

Dear Chief Acosta,

Pinahihintulutan po ba ang pagmamaneho ng motorsiklong walang plaka o may plakang hindi mabasa? Minsan kasi kapag bumibiyahe ako ay nakakakita ako ng iilang motorsiklo na walang plaka o minsan naman ay hindi na mabasa ang kanilang plaka. Sana masagot ang aking katanungan. Salamat sa iyo. — Jao, Jr.

---

Dear Jao, Jr.,

            Ang kasagutan sa iyong katanungan ay matatagpuan sa Seksyon 7 ng Republic Act No. (R.A.) 11235 o ang “Motorcycle Crime Prevention Act,” na inamyendahan ng R.A. No. 12209, kung saan nakasaad na:

“Section 7. Driving Without a Number Plate or Readable Number Plate. - Driving without a number plate or a readable number plate, as provided in this Act, is prohibited. The driver of a motorcycle without a number plate or readable number plate shall be punished with a fine of not more than Five thousand pesos (P5,000.00).

A motorcycle driver without a number plate or a readable number plate shall be stopped and seized by law enforcers, and immediately surrendered to the Philippine National Police (PNP): Provided, That no seizure shall be made upon showing proof of ownership and registration and that the owner is not at fault for the non-installation of a number plate or readable plate. Any apprehension must be reported immediately to the LTO, the PNP, and the Department of Information and Communications Technology (DICT) through the Joint LTO and PNP Operations and Control Center. The owner of such motorcycle may redeem the seized motorcycle from the PNP with the required clearances from the LTO upon proof of ownership, payment of the costs of seizure, and compliance with the requirement for a number plate or readable number plate.”

Base sa nabanggit na probisyon ng batas, ipinagbabawal ang pagmamaneho nang walang plaka o hindi nababasa ang plaka, gaya ng nakasaad sa R.A. No. 11235. Kung kaya, ang nagmamaneho ng motorsiklong walang plaka o hindi nababasa ang plaka ay maaaring maparusahan ng multang hindi hihigit sa limang libong Piso (P5,000.00). Dagdag pa rito, ang nagmamaneho ng isang motorsiklo na walang plaka o hindi nababasa ang plaka ay dapat pahintuin at kumpiskahin ng mga tagapagpatupad ng batas, at agad na isusuko sa Philippine National Police (PNP). Ngunit hindi maaaring maisagawa ang pagkumpiska kapag nakapagpakita ng patunay ng pagmamay-ari at rehistrasyon, at ang may-ari ay walang kasalanan sa hindi pagkabit ng plaka o hindi nababasang plaka. 

Sana ay nabigyan namin ng linaw ang iyong katanungan. Ang payong aming ibinigay ay base lamang sa impormasyong iyong inilahad at maaaring magbago kung mababawasan o madaragdagan ang mga detalye ng iyong salaysay. 

Maraming salamat sa iyong patuloy na pagtitiwala. 

PBBM, Senate majority at 257 cong., malamang kinabahan sa aksyon ng SC sa petisyon nina Robin at Bong Go

ni Pablo Hernandez @Prangkahan | October 30, 2026

BINASH NA NAMAN NG MGA DDS SI PBBM TUNGKOL SA SINABI NIYANG 'HUWAG MAG-PANIC' SA PAGHINA NG PISO KONTRA DOLYAR — Binash na naman ng mga Duterte Diehard Supporters (DDS) si President Ferdinand Marcos Jr. (PBBM) sa kanyang sinabi na huwag daw mag-panic ang publiko sa patuloy na paghina ng halaga ng piso kontra dolyar.

Dapat bago magbitaw ng salita si PBBM ay pinag-iisipan niya muna kung maba-bash siya kasi sa totoo lang, ang laging inaabangan ng mga DDS ay 'yung may mali siyang masasabi sa publiko, ‘eh sablay 'yung statement niyang huwag mag-panic sa paghina ng piso kontra dolyar, kaya ang resulta, nagkaroon na naman ng pagkakataon ang mga Duterte supporters na i-bash siya sa social media, boom!

XXX

KAPAG KINATIGAN NG SC ANG PETISYON NINA SEN. BONG GO AT SEN. ROBIN PADILLA TIYAK HINDI NA MAKO-CONVICT SI VP SARA, TULOY ANG LABAN NIYA SA 2028 PRESIDENTIAL ELECTION — Pinagkokomento ng Supreme Court (SC) ang Senate Impeachment Court at House of Representatives kaugnay sa petisyon nina Sen. Bong Go at Sen. Robin Padilla na kumukuwestyon sa ibinabang voting threshold sa conviction ni Vice President Sara Duterte, na ayon sa dalawang senador ay dapat ang botohan ay ibabase sa lahat ng 24 senator-judges, kabilang ang dalawang nakakulong, isang nagtatago at isang “nagpapagamot” sa France at hindi 'yung sa mga present lang ibabase ang boto.

Kaya kapag ang petisyon na ito nina Sen. Bong Go at Sen. Padilla ay kinatigan ng SC ay tiyak malabo nang ma-convict si VP Sara sa kasong impeachment kasi nga, sa ngayon ay 14 lang ang miyembro ng majority o Gatchalian bloc sa Senado, abangan! 

XXX

TIYAK KINABAHAN SI PBBM, 'GATCHALIAN BLOC' AT 257 CONG. NANG AKSYUNAN NG SC ANG PETISYON NINA SEN. BONG GO AT SEN. PADILLA — Hindi man aminin, ay tiyak kinabahan si PBBM, "Gatchalian bloc" sa Senado at ang 257 na mga kongresistang bomoto sa impeachment ni VP Sara sa pag-aksyon ng SC sa petisyon nina Sen. Bong Go at Sen. Padilla patungkol sa impeachment voting threshold sa Bise Presidente.

May posibilidad kasi na katigan ng SC ang petisyon nina Sen. Bong Go at Sen. Padilla at kapag nangyari ito, hindi na mai-impeach si VP Sara, tuloy na tuloy na ang pagkandidato niya sa 2028 presidential election, at kapag nanalo, lagot si PBBM, ang "Gatchalian bloc" at ang 257 cong. na nagpa-impeachment sa Bise Presidente, boom! 

XXX

DAPAT BAGO UMEPAL SI MAYOR MAGALONG SA NATIONAL ISSUE, TUTUKAN DIN NIYA ANG MGA MANGRARAKET NA NAMBIBIKTIMA SA MGA TAGA-BAGUIO CITY — Nanawagan si Baguio City Mayor Benjamin Magalong sa Ombudsman at COA na imbestigahan at kasuhan ang mga sangkot sa unconstitutional na mga probisyon sa 2024, 2025 at 2026 national budgets.

Tama naman ang panawagang ito ni Mayor Magalong, kaya lang dapat bago siya umepal sa mga isyung pang-national, ay tutukan din niya ang isa sa problema sa Baguio City, ang dami na kasing nabibiktima sa raket na mini-casino sa Legarda Road at Bokawkan Road at drop ball-color games sa Kayang Market ng mga loyalistang sina "Patrick" at "Nestor," pero hanggang ngayon ay wala pang aksyon, hindi pa ipinahuhuli ng alkalde ang dalawang mangraraket na ito sa nasasakupan niyang lungsod, period!

Maruming terminal at pabayang drayber, huwag palampasin

ni Leonida Bonifacio-Sison @Boses | October 30, 2026

Sa pagdagsa ng mga biyahero tuwing Undas, hindi dapat maging bahagi ng nakasanayang paglalakbay ng mga Pilipino ang maruruming palikuran, kulang na pasilidad, at panganib mula sa mga iresponsableng drayber. 

Panahon ito ng pag-alala sa mga yumaong mahal sa buhay, kaya nararapat lamang na tiyaking ligtas, maayos, at makatao ang serbisyong matatanggap ng bawat pasahero.

Sa inspeksiyon sa tatlong terminal ng bus sa Maynila, dalawa ang natukoy na may hindi maayos na palikuran dahil sa kakulangan ng espasyo at suplay ng tubig. Kabilang dito ang Ohayami Trans at Victory Liner. Binigyan ang mga kompanya ng 60 araw upang ayusin ang kanilang mga pasilidad, habang inatasan din ang Victory Liner na palawakin ang lugar na hinihintayan ng mga pasahero. Nagbabala ang pamahalaan na maaaring ipasara ang mga kompanyang hindi susunod sa kautusan.

Makatarungan ang mahigpit na pagpapatupad nito sapagkat hindi luho ang malinis na palikuran at komportableng hintayan. Pangunahing pangangailangan ang mga ito, lalo na para sa mga bata, nakatatanda, buntis, at mga pasaherong ilang oras na naglalakbay. Hindi dapat pagtiisan ng publiko ang kapabayaan ng mga negosyong kumikita mula sa kanilang pamasahe.

Kasabay nito, mahalaga rin ang pagbabantay sa kalusugan ng mga mamamayan. Ilalagay sa code white alert ang mga ospital sa Metro Manila mula Oktubre 31 hanggang Nobyembre 2 upang maging handa sa posibleng pagdami ng nangangailangan ng medikal na atensiyon.

Nakaalerto rin ang mga pangkat na tumutugon sa mga emerhensiya ng Department of Health at ng 17 lokal na pamahalaan sa Kamaynilaan. Hindi rin dapat ipagwalang-bahala ang kaligtasan sa kalsada.

Sa isinagawang pagsusuri sa 251 drayber ng bus sa Parañaque Integrated Terminal Exchange (PITX), isang drayber ng DLTB Co. na biyaheng Bicol ang nagpositibo sa paunang pagsusuri para sa ilegal na droga. Isinailalim siya sa confirmatory testing. Ipinakikita ng insidenteng ito ang kahalagahan ng tuloy-tuloy na pagsusuri at mahigpit na pagpapatupad ng mga patakaran laban sa pagmamaneho sa ilalim ng impluwensiya ng ipinagbabawal na sangkap.

Mula Oktubre 25 hanggang 27, umabot sa 556,995 ang naitalang dumaan sa PITX, at inaasahang aabot sa 1.9 milyon ang mga pasahero hanggang Nobyembre 4. 

Hindi sapat ang mga inspeksiyon, babala, at pansamantalang paghahanda kung walang tuluy-tuloy na pananagutan.

Dapat tiyakin ng mga awtoridad na naipatutupad ang mga ipinag-uutos na pagkukumpuni at napapanatili ang kaligtasan ng mga terminal, ospital, at pampublikong transportasyon.

Karapatan ng bawat Pilipino ang ligtas na biyahe at maayos na serbisyong katumbas ng kanilang pamasahe. Sa tunay na diwa ng Undas, ang pag-alala sa mga yumao ay dapat samahan ng malasakit sa mga buhay na patuloy na naglalakbay pauwi sa kanilang pamilya.