Eala pumaldo sa P4.97-M, Bencic target sa Round-of-16

ni Nympha M. Ang @Sports News | August 8, 2026

Photo: WTA

Isang matinding laban ang ipinakita ni Pinay tennis ace Alex Eala kontra American Caty McNally at nakapasok sa round of 16 ng 2026 Toronto Open (National Bank Open) ngayong Sabado.

Nangamba ang mga Pilipinong manonood sa arena matapos tumawag ng medical timeout si Eala sa kalagitnaan ng laro nang matapilok ang kanang bukung-bukong. Ngunit nilabanan niya ang lahat ng 3-sets upang talunin si McNally sa score na: 6-3; 5-7; 6-4.

Pasok na si Eala sa susunod na yugto ng torneo at nakatakdang sagupain si Belinda Bencic ng Switzerland. Sa kabila ng pagkatalo kay Eala sa isang kapana-panabik na 3-set na laban, walang ibang sinabi kundi papuri ang Amerikanang tennis star na si McNally dahil sa pagiging pamoso ng Pinay.

Binigyang-diin ni McNally ang hindi kapani-paniwalang suporta na nakapalibot kay Eala, lalo na ang mga sold-out tickets sa stadium, at nagsabing, "Ang ginagawa niya para sa tennis ay nakakabilib parang hindi totoo at nauubos ang mga upuan sa stadium.

Parang nasa isipan ko na tanggapin na ang nangyayari sa paligid at tamasahin ito dahil isa itong magandang karanasan." Hindi lang basta nananalo si Alex Eala—isinasama niya ang isang buong bansa.

Samantala, paldong-paldo naman si Eala sa kanyang kinita sa natapos na dalawang laro. Nakakuha si Eala ng $81,800 na premyong pera matapos manalo sa kanyang unang dalawang laban sa National Bank Open, na katumbas ng humigit-kumulang ₱4.97 milyon.

Ipinagpapatuloy ng Filipina tennis star ang kanyang kahanga-hangang kampanya habang sumusulong siya sa torneo na dumaragdag sa kanyang gantimpala sa kanyang lumalaking tagumpay sa WTA Tour.

Makakaharap ng Filipina tennis star Eala si WTA #14 Belinda Bencic ng Switzerland sa Round of 16 ng National Bank Open sa Agosto 10.

Eala yumuko sa Russian rival sa Abu Dhabi Open

ni Nympha Miano-Ang @Sports | February 6, 2026

• 

Photo: Alex Eala at Russian Ekaterina Alexandrova / WTA

Hindi gumana ang mahika ni Alex Eala sa kanyang pagbabalik nang yumuko siya laban kay Russian Ekaterina Alexandrova, 3-6, 3-6 sa kanilang quarterfinal match sa WTA 500 Abu Dhabi Open sa UAE kagabi, Peb. 5.

Sa halos wala pang 24 oras na pahinga at tatlong oras na humarap sa bakbakan, matinding pagod na rin marahil ang nakapagpasuko sa 20-anyos dahil humahabol ito sa likod ng mga iskor ng No. 2 seed na si Alexandrova sa magkasunod na sets.

Nagawa pang dumikit ng WTA no. 45 na si Eala sa agwat ng marka, pero nanatili ang lakas ng world no. 11 at tiniyak na hindi makakahabol ang Filipina netter.

Si Alexandrova ang unang pumasok sa semifinals at makakatapat sinuman kina no. 5 seed Russian Liudmila Samsonova o American Hailey Baptiste.

Eala nakausad sa qfinals ng Abu Dhabi Open

ni Nympha Miano-Ang @Sports | February 5, 2026

• 

File Photo: Ang maaksiyong laro ni Alex Eala sa WTA 125. (Reymundo Nillama)

Nagmartsa na si Pinay tennis ace Alex Eala sa quarterfinals ng Abu Dhabi Open kagabi.

Nagawa pang habulin ni Eala ang 0-4 deficit sa 3rd set upang talunin si Aliksandra Sasnovich ng Belarus sa iskor na 2-6,6-4,7-6 (7-5).

Ilang ulit pang nagmintis ang mga serve ng world no. 45 laban kay Sasnovich lalo na sa opening set.

Bagamat malalakas ang bigwas ng Belarusian sa kaliwa at kanan kay Eala, nakahugot naman ng lakas ang Pinay sa Pinoy crowd upang itarak ang dalawang diretsong panalo at kaldagin ang 6th serve ni Sasnovich para sa 4-2.

Dito na nagsimulang makuha ni Eala ang momentum at isinelyo sa dulo ang panalo.

Haharapin ni Eala si World no. 11 Ekaterina Aleksandrova sa quarterfinals.

Nagwagi rin si Eala sa doubles katambal si Janice Tjen ng Indonesia at makakatapat sa quarterfinals sina Zhang Shuai at Cristina Bucsa.