P2 dagdag-presyo sa gasoline, P1 diesel

ni V. Reyes | June 28, 2026

Photo File

Asahan ang panibagong pagtaas sa presyo ng mga produktong petrolyo sa linggong ito kasunod ng muling pag-init ng tensyon sa Gitnang Silangan.

Ayon sa source mula sa industriya ng langis, posibleng madagdagan ng P2 kada litro ang halaga ng gasoline habang piso ang itataas sa bawat litro ng diesel.

Ang pagtataya ay ipinalabas ilang oras matapos ang pag-atake ng Estados Unidos sa Iran bilang tugon sa Iranian drone strike sa isang cargo ship sa Strait of Hormuz.

Titser nabangga, patay... Anak ng Vice Mayor, ‘wanted’ sa LTO

ni V. Reyes | June 28, 2026

Photo Circulated

Naglabas na ng Show Cause Order ang Land Transportation Office (LTO) laban sa anak ng isang bise alkalde kasunod ng insidente sa Marikina City na ikinamatay ng biktima.

Sinuspinde na rin ng 90 araw ang bisa ng lisensya ng suspek na drayber na hindi pinangalanan ng LTO.

Pinahaharap sa Intelligence and Investigation Division sa Hulyo 8, 2026 ang nakarehistrong may-ari ng sasakyan na nasangkot sa insidente.

Inatasan din ang may-ari na magsumite ng sinumpaang paliwanag kung bakit hindi ito dapat managot sa batas kaugnay ng Driving While Under the Influence of Alcohol or Narcotic Drug. 

Kasunod ito nang natukoy sa Alcohol Breath Analyzer (ABA) na may Blood Alcohol Concentration (BAC) na 0.410% na ibig sabihin ay positibo sa alak ang drayber.

“Wala tayong sinisino. Ang sinumang lumalabag sa batas ay mananagot, anuman ang kanyang katayuan sa buhay o koneksyon. Hindi natin hahayaang may buhay na kapalit ang kawalang-disiplina sa kalsada,” diin ni LTO Assistant Secretary Lacanilao.

Una nang napaulat ang pagkakasawi ng 27-anyos na senior high school teacher na si Alexander Quintos Cruz matapos na masalpok ang kanyang sinakyang motorsiklo ng SUV na minamaneho ni David Alfre Gonzaga de Guzman, 24, sa intersection ng Brgy. Concepcion Dos, Marikina City noong Hunyo 13.

Fish kill sa Magat Dam, 10 toneladang tilapia, nasayang

ni V. Reyes | June 28, 2026

Photo FB / May VIcente Dingle

Tinatayang 10 metriko toneladang tilapia ang nasayang sa mga palaisdaan sa Magat Dam, Isabela dahil sa fish kill.

Nabatid mula sa Bureau of Fisheries and Aquatic Resources (BFAR) na nakaranas ng pagbaba ng antas ng tubig sa dam at mababang oxygen, kaya namatay ang mga isda.

Partikular na apektado ng fish kill ang mga bayan ng Ramon at Cordon kung saan ay sinasabing umabot na sa mahigit milyong piso ang ikinalugi ng mga operator ng palaisdaan.

Nakahanda naman ang Isabela Provincial Fishery Office na magpaabot ng tulong sa mga naapektuhang may-ari ng mga fish pen upang makapagsimulang muli.