Inatras ng prosekusyon... Bribery vs. VP Sara, tuloy sa DOJ, Ombudsman

by Mervin Reyes @News | October 11, 2026

Photo: Sara Duterte / FB

Posibleng iendorso ng House prosecution panel sa Department of Justice (DOJ) at Office of the Ombudsman ang mga alegasyon ng panunuhol laban kay Vice President Sara Duterte.

“Huwag kayong mawalan ng pag-asa dito sa bribery,” pahayag ni House lead prosecutor Rep. Gerville Luistro sa isang news forum sa Quezon City nitong Sabado.

Kasunod ito ng paghahain ng House prosecution team ng manifestation sa Senate impeachment court upang bawiin ang Article III, na tumatalakay sa alegasyon ng panunuhol, sa impeachment trial ng Bise Presidente.

“Kung kailangan, we will be making the necessary endorsement so that the Ombudsman or the DOJ can conduct the preliminary investigation for the possible filing of the case of bribery against respondent [Duterte] and officials [of] DepEd [Department of Education],” ani Luistro.

Sa ilalim ng Article III, inakusahan si Duterte ng pagbibigay umano ng pera sa mga opisyal ng DepEd upang hikayatin silang labagin o iwasan ang mga batas sa procurement at iba pang kaugnay na regulasyon.

2 estudyanteng babae, natusta sa boarding house

by Jeff Tumbado @News | October 11, 2026

Photo: Circulated

Nasawi ang dalawang babaeng estudyante makaraang ma-trap sa nasusunog nilang boarding house sa isang residential compound sa Brgy.Nazareth, Cagayan de Oro City.

Nabatid na ang sunog ay naganap nitong umaga ng Biyernes, Oktubre 9 na tumagal ng ikatlong alarma.

Batay sa inisyal na ulat, isa sa mga nasawi ay anak mismo ng may-ari ng boarding house.

Una umanong tinawagan ng may-ari ang kanyang anak na nasa loob ng nasusunog na gusali subalit hindi na ito sumasagot sa cellphone nito.

Alas-11 ng umaga nang mailabas ang mga sunog na labi ng mga biktima.

Hindi pa tukoy ng mga awtoridad ang pinagmulan ng sunog na patuloy na iniimbestigahan pa.

45-km CALAX, malapit nang makumpleto

ni Gina Plenago @News | October 11, 2026

Photo: CALAX / FB

Malapit nang makumpleto ng MPCALA Holdings, Inc. ang 45-kilometrong Cavite-Laguna Expressway (CALAX), na mag-uugnay sa Cavite at Laguna.

Patuloy ang konstruksyon sa natitirang 18.5 kilometrong Subsections 1 at 2, kabilang ang mga kalsada, tulay, drainage system at interchange ramps.

Sa kasalukuyan, bukas na ang CALAX mula Mamplasan, Biñan hanggang Governors Drive, General Trias.

Kapag natapos, aabot ito mula Open Canal hanggang Kawit at kokonekta sa CAVITEX, na magpapabilis sa biyahe at transportasyon ng mga produkto patungong Metro Manila.