17 patay kay ‘Inday’ at habagat

ni Jeff Tumbado @News | July 12, 2026

Photo: MDRRMO Mataasnakahoy

Nasa 17 na ang bilang ng mga nasawi habang siyam pa ang nawawala dahil sa pinagsamang epekto ng pinalakas na Habagat at Bagyong Inday, na patuloy na nagdudulot ng malalakas na pag-ulan at pagbaha sa iba't ibang bahagi ng bansa, ayon sa pinakahuling disaster monitoring report na inilabas nitong Sabado ng umaga.

Sa ulat ng Office of Civil Defense (OCD), ang mga nasawi ay kabilang sa mga sanhi ng pagkalunod at pagguho ng lupa kung saan ang pinakamarami ay sa bayan ng Malapatan, Sarangani na may 10, sinundan ng Calanogas, Lanao del Sur na may lima, at Bukidnon na may dalawa.

Naitala rin ang apat na nasugatan dahil sa landslide, kabilang ang tig-isang biktima sa Torrijos, Marinduque at Malapatan, Sarangani, at dalawa sa Calanogas, Lanao del Sur.

Samantala, siyam katao ang nananatiling nawawala, kabilang ang tatlo sa Malapatan, Sarangani at anim sa Calanogas, Lanao del Sur.

Patuloy pa ring bineberipika ng mga awtoridad ang lahat ng naiulat na casualty.

Hayskul, buking sa droga

ni Maeng Santos @News | July 12, 2026

Photo: File / Oplan Sita sa Valenzuela / Cirulated

Timbog ang 17-anyos na senior high school student nang mabisto ang dalang marijuana makaraang tangkain takasan ang mga pulis sa ‘Oplan Sita’ habang sakay ng motorsiklo sa Valenzuela City.

Sa ulat ni Police Sub-Station 3 Commander P/Capt. Joan Dorado kay Valenzuela Police Chief P/Col. Joseph Talento, alas-11:40 ng tanghali, nagsasagawa sila ng ‘Oplan Sita’ sa Sampaguita Street corner Dama De Noche, Brgy. Marulas nang parahin ng kanyang mga tauhan ang binatilyo na sakay ng motosiklo para sa beripikasyon.

Gayunman, sa halip na huminto ay pinaharurot umano ng rider ang kanyang motorsiklo kaya hinabol siya ng mga pulis hanggang sumemplang umano ito.

Nang makorner nina PCpl. Darren Mari Pinili at Pat Edgar Clark De Ocampo Cinco, nakita nilang inihagis umano ng binatilyo ang isang transparent plastic sachet na naglalaman ng hinihinalang pinatuyong dahon ng marijuana na kanilang kinumpiska.

Matapos nito, inisyuhan ang driver ng Traffic Violation Receipt (TVR) bago tinurnover siya sa pangangalaga ng CSWD habang in-impound naman ang kanyang motorsiklo.

Koreano, walang pang-upa sa apartment, nag-suicide

ni Levi Gonzales @News | July 12, 2026

Photo: File

Patay ang isang hindi pa nakikilalang Korean national matapos magpatiwakal sa loob ng kanyang inuupahang apartment sa The Cambridge Village, Brgy. San Andres, Cainta, Rizal.

Batay sa imbestigasyon, pasado alas-10 ng umaga, bago ang insidente ay kinausap umano ng caretaker kasama ang officer-in-charge ng naturang village ang dayuhan upang paalisin sa inuupahang unit dahil sa tinatayang tatlong taong hindi nabayarang upa.

Lumabas din sa imbestigasyon na gumamit umano ang biktima ng monoblock chair upang maabot ang bintana ng ikalawang palapag ng apartment bago ito umano tumalon.

Sa isinagawang scene investigation, napag-alaman din na mag-isang naninirahan ang dayuhang biktima at sumasailalim pa ito sa gamutan para sa sakit.