Sumalubong, sumalpok sa trak... 3 Estudyanteng sakay ng motor, patay

ni Mai Ancheta @News | August 27, 2026

Photo: MhaiJosh Motorparts - CCTV / Circulated

Dedo ang tatlong estudyante makaraang sumalpok sa kasalubong na oil tanker ang kanilang sinasakyang motorsiklo sa Tiniguiban National Highway, Puerto Princesa City, Palawan nitong madaling-araw ng Agosto 25.

Dead-on-the-spot ang mga sakay ng motorsiklo na kinilala ng mga awtoridad na sina Carl Assie Abajo,  Princess Lara Padon at Dominic Ladica.

Lumitaw sa imbestigasyon na galing sa birthday party ang mga biktima at pauwi na nang mangyari ang trahedya.

Batay sa dash cam ng oil tanker, pinasok ng motorsiklo ang linya ng kasalubong na oil tanker kaya sinalpok ang sasakyan.

Dahil dito, hindi na magsasampa ng reklamo ang pamilya ng mga biktima sa driver ng oil tanker at pinalaya na ito mula sa kustodiya ng  pulisya.

Misis at 3 anak, hinostage ng mister

ni Mai Ancheta @News | August 27, 2026

Photo:PNP-PIO

Nailigtas ng mga awtoridad ang mag-iina matapos i-hostage ng sariling ama sa isang barangay sa Bugallion, Pangasinan.

Batay sa report ng Bugallon Municipal Police Office, nakatanggap sila ng report ng umano'y hostage incident kaya agad na nagpadala ng responde at naabutan ang suspek na armado ng itak at hino-hostage ang kanyang asawa at tatlong menor-de-edad na anak.

Sa pamamagitan ng pakikipag-usap ay napahupa ang tensiyon at inihagis ng suspek ang kanyang itak sa labas ng bahay.

Gayunman, makalipas ng ilang saglit ay bigla na naman umanong nagwala ang suspek at sinaktan ang isa sa kanyang mga anak.

Muling napahinahon ng mga pulis ang suspek at nailigtas ang mag-iina.

Dinala sa presinto ang suspek at lumitaw sa imbestigasyon na nakararanas umano ito ng emotional distress dahil sa pagkamatay ng dalawa nitong anak na lalaki.

Bag, tsinetsek ng guard sa iskul... College student nag-bomb joke, kinasuhan

by Jeff Tumbado @News | August 27, 2026

Photo: PNP

Sa halip na silid-paaralan ay diretso sa kulungan ng pulisya ang isang college student makaraang magbiro ito na may bomba sa kanyang bag habang kinakapkapan sa gate ng pinapasukang unibersidad sa Argao City, Cebu, Martes ng hapon.

“Baka may bomba d'yan at sumabog,” ang pabirong sinabi ng 20-anyos na estudyante sa security guard na nagsasagawa ng inspeksyon.

Gayunman, hindi nagbiro ang guwardiya at itinuring na seryosong banta ang sinabi ng estudyante kaya agad ipinaalam sa Student Affairs Office (SAO) ang pangyayari.

Tumawag naman ang Dean of Student Affairs sa pulisya.

Kalaunan, isinuko sa pulisya ang estudyante para sa kaukulang imbestigasyon.

Ayon kay Police Staff Sergeant Mark Anthony Dicdican, naisampa na kahapon ang reklamo laban sa estudyante.

Sinabi ni Dicdican na kinasuhan ang estudyante dahil sa paglabag sa Presidential Decree No. 1727, na nagpaparusa sa malisyosong pagpapakalat ng maling impormasyon hinggil sa mga bomba at pampasabog.