Malaysian, arestado... 50 Star Tortoises, naharang sa NAIA

ni Gina Pleñago @News | June 14, 2026

Photo: PNP-AVSEGROUP

Kalaboso ang pasaherong Malaysian national nang dumating sa bansa makaraang matuklasan ng mga awtoridad na may dalang 50 piraso ng buhay na Indian Star Tortoises sa loob ng kanyang bagahe noong Biyernes ng gabi sa NAIA Terminal 1 sa Pasay City.

Nabuko ang laman ng maleta ng mga elemento ng Bureau of Customs nang sumailalim sa X-ray machine ang bagahe ng dayuhan sa Arrival Customs X-Ray Area, kaya isinagawa ang pagsusuri sa BOC Inspection Room kung saan nabuko ang kanyang dalang mga buhay na pagong.

Dahil dito, agad nagbigay ng seguridad sa paligid ang mga tauhan ng PNP Aviation Security Group at NAIA Police Station 1, bago ipinaalam  sa Department of Environment and Natural Resources (DENR) ang nadiskubre upang tumulong sa imbestigasyon.

Sinabi ni AVSEGROUP Director P/Brig.Gen. Dionisio Batolome, Jr., hinuli nila ang banyaga nang walang maipakitang kaukulang permiso para sa pagdadala ng mga wildlife specimen nang dumating sa bansa sakay ng eroplanong galing sa Bangkok, Thailand.

Surrogacy hub ni-raid, 15 nanay na-rescue

ni Gina Pleñago @News | June 13, 2026

Photo: DTI-PH

Nasagip ang 15 surrogate mother habang tatlo ang nahuli sa surrogacy hub nang salakayin ng mga operatiba ng National Bureau of Investigation-Human Trafficking Division ang dalawang pasilidad na nagsisilbing surrogacy hubs sa Porac, Pampanga noong Hunyo 10.  

Nag-ugat ang operasyon sa reklamo ng isang surrogate mother laban sa House of Surrogacy PH na sinasamantala umano ang mga kakabaihang salat sa pera. Sinasabing isang mapanlinlang na kasunduan umano ang pinapipirmahan sa mga biktima para ipagbuntis ang anak ng adoptive parents at kabilang din ang birth certificates ng mga sanggol ay nilalagyan ng pinalsipikang detalye. 

Sa beripikasyon sa Department of Health, nakumpirma na hindi lisensyado o accredited ang HOS PH bilang healthcare facility. 

Sa pakikipag-ugnayan sa NBI-Central Luzon Regional Office (NBI-CELRO) at Municipal Social Welfare and Development Office (MSWDO) ng Porac, Pampanga, isinagawa ang magkasabay na operasyon sa dalawang pasilidad ng HOS PH at nadatnan ang 15 surrogate mothers. 

Inaresto naman ang tatlong indibidwal na nagpapatakbo o namamahala ng dalawang pasilidad. 

Sinabi ni NBI Director Melvin Matibag na hindi dapat ituring na kalakal ang sinumang indibidwal o pagsamantalahan ang kalagayan at kahirapan sa buhay.

22 biktima ng human trafficking, balik-'Pinas na

ni Gina Pleñago @News | June 12, 2026

Photo: DMW

Nakauwi nang ligtas sa bansa ang 22 biktima ng human trafficking mula sa Cambodia matapos mapadali ng iba't ibang ahensiya ng gobyerno ng Pilipinas ang kanilang repatriation.

Dumating ang mga biktima sa NAIA Terminal 1 kasama si Department of Migrant Workers Undersecretary Felicitas Q. Bay, lulan ng Philippine Airlines flight PR 2622 mula sa Techo International Airport sa Phnom Penh.

Nagtulung-tulong ang DMW Rapid Response Team sa Cambodia, Migrant Workers Office sa Singapore, at Philippine Embassy sa Phnom Penh.

Nagbigay din ang OWWA ng transportasyon at pansamantalang matutuluyan, habang ang DMW Migrant Workers Protection Bureau at mga miyembro ng Inter-Agency Council Against Trafficking ay magbibigay ng legal assistance at suporta upang makabangon muli.