Simula Nov. 1 hanggang Dec. 23... Road excavation sa M. Mla., stop

ni Gina Plenago @News | November 1, 2026

Photo: File / MMDA

Pansamantalang ipatitigil ng Metropolitan Manila Development Authority (MMDA) ang mga paghuhukay sa national at city roads sa Metro Manila simula Nobyembre 1 hanggang Disyembre 23 upang maibsan ang trapiko ngayong Kapaskuhan.

Ayon sa MMDA, layunin nitong mapagaan ang biyahe ng mga motorista sa inaasahang pagdami ng sasakyan sa mga pangunahing lansangan.

Gayunman, hindi sakop ng suspensyon ang mga flagship infrastructure project ng pamahalaan, pagkukumpuni at konstruksyon ng mga tulay, flood control projects at emergency repairs.

Ang hakbang ay alinsunod sa Memorandum Circular No. 20, Series of 2026.

2 bus driver, postibo sa droga

ni Gina Plenago @News | October 28, 2026

Photo: Random drug testing. PITX / MMDA

Dalawang bus driver ang nagpositibo sa paunang random drug test ng Metropolitan Manila Development Authority (MMDA) sa PITX at tatlong bus terminal sa Cubao noong Oktubre 26, bilang paghahanda sa Undas 2026.

Sa 118 driver na sinuri, 116 ang negatibo. Pansamantalang pinagbawalang bumiyahe ang dalawa habang hinihintay ang confirmatory test. Kapag nakumpirmang positibo, babawiin ng Land Transportation Office (LTO) ang kanilang lisensya.

Sinuri rin ng mga awtoridad ang fire extinguishers at emergency equipment ng mga bus upang matiyak ang kaligtasan ng mga pasahero.

Indian, initak ng holdaper, utas

ni Gina Plenago @News | October 28, 2026

Photo: Circulated

Patay ang isang Indian national matapos pagsasaksakin ng itak nang manlaban sa holdaper sa Brgy. Alabang, Muntinlupa City nitong Lunes ng umaga.

Naaresto sa follow-up operation ng Southern Police District (SPD) ang 50-anyos na suspek na si alyas Jun, na kamakailan lamang nakalaya sa bilangguan.

Narekober sa suspek ang duguang itak at sling bag ng biktima na naglalaman ng P750.

Nanawagan si SPD Director P/BGen. Rodel Pastor sa publiko na agad iulat ang anumang kahina-hinalang aktibidad.