Oplan Balik Eskwela, tiyaking safe sa mga estudyante

ni Leonida Sison @Boses | May 30, 2026

Mukhang mas magiging magaan sa pakiramdam ng mga magulang kung tunay na handa ang mga paaralan sa pagbubukas ng klase at hindi mauuwi sa aberya ang unang araw ng pasukan.

Sa gitna ng paghahanda para sa School Year 2026–2027, tila mahalagang paalala ang inilunsad na Oplan Balik Eskwela ng Department of Education (DepEd) dahil hindi lamang ito simpleng preparasyon kundi konkretong hakbang upang matiyak na maayos, ligtas, at organisado ang pagbabalik ng milyun-milyong estudyante sa paaralan.

Inilunsad ng DepEd ang nationwide Oplan Balik Eskwela bilang paghahanda sa pagbubukas ng klase sa Hunyo 8, 2026. 

Ayon sa isang opisyal, isasagawa ang programa mula Hunyo 1 hanggang Hunyo 11 upang tiyaking maayos ang pagsisimula ng panibagong school year sa buong bansa. Pangunahing layunin nito na mapadali ang enrollment process, matugunan agad ang mga hinaing ng publiko, at masigurong handa ang mga paaralan sa pagbabalik ng mga mag-aaral.

Kapansin-pansin na hindi lamang DepEd ang kikilos para rito dahil may kabuuang 16 na ahensya ng gobyerno at utility partners na tutulong upang maging episyente ang school opening. Kabilang dito ang mga tanggapan na may mahalagang papel sa kaligtasan, kalusugan, trapiko, komunikasyon, at suplay ng pangunahing serbisyo sa mga paaralan.

Makikipagtulungan ang Department of the Interior and Local Government (DILG), Philippine National Police (PNP), Department of Health (DOH), at Metropolitan Manila Development Authority (MMDA) upang bantayan ang seguridad, kalinisan, kalusugan, at maayos na daloy ng trapiko sa paligid ng mga eskwelahan. Samantala, tututukan naman ng Department of Transportation (DOTr) ang transportasyon ng mga commuter habang kikilos ang Department of Information and Communications Technology (DICT) at National Telecommunications Commission (NTC) para tiyaking matatag ang komunikasyon at internet connectivity.

Nakaalerto rin ang National Disaster Risk Reduction and Management Council (NDRRMC) laban sa posibleng epekto ng masamang panahon at emergency situations kasabay ng school opening. Inatasan din ang Meralco at Metropolitan Waterworks and Sewerage System (MWSS) upang tiyakin ang tuluy-tuloy na suplay ng kuryente at tubig sa mga paaralan.

Mahalaga rin ang pagbubukas ng Oplan Balik Eskwela Public Assistance Command Center na maaaring lapitan sa pamamagitan ng hotline, text, email, at social media platforms mula national hanggang school level. Malaking tulong ito para sa mga magulang at estudyanteng may concern hinggil sa enrollment, pasilidad, at iba pang usapin sa pagbubukas ng klase.

Mahalagang masukat ang tagumpay ng Oplan Balik Eskwela hindi lamang sa rami ng naghahandang ahensya kundi sa aktuwal na karanasan ng mga estudyante at pamilya sa unang araw ng pasukan. Kung magiging maayos ang proseso, ligtas ang paligid, at kumpleto ang serbisyo, mas mararamdaman ng taumbayan na may saysay ang koordinasyon ng pamahalaan. Ang edukasyon ay hindi lamang tungkol sa pagbubukas ng paaralan kundi sa pagbibigay ng maayos at ligtas na simula para sa kinabukasan ng kabataan.