Malinis na tubig, ‘wag ipagdamot sa taumbayan

ni Leonida Bonifacio-Sison @Boses | October 24, 2026

Sa gitna ng banta ng El Niño, hindi dapat balewalain ang pangangailangan ng bawat pamilyang Pilipino sa malinis at ligtas na inuming tubig. Hindi lamang ito simpleng pang-araw-araw na pangangailangan, kundi mahalagang bahagi ng pangangalaga sa kalusugan, paghahanda sa tagtuyot at pagpapanatili ng maayos na pamumuhay.

Kaya mahalagang hakbang ang paglalagay ng community-based water filtration system sa Tondo, Maynila, upang matulungan ang mga residenteng maaaring maapektuhan ng kakulangan sa suplay ng tubig.

Sinimulan na ng Department of Social Welfare and Development (DSWD) ang pagtatayo ng pasilidad sa Barangay 105, Zone 8. Sa pamamagitan ng community water depot, inaasahang mas mapadadali ang pagkuha ng malinis na tubig ng mga residente, lalo na kung lumala ang epekto ng tag-init sa kanilang lugar.

May kapasidad na 2,000 litro ang tangke ng pasilidad at kaya nitong magpuno ng isang lalagyang may 20-litro na kapasidad sa loob ng humigit-kumulang 20 minuto. Malaking tulong ito sa mga pamilyang kailangang mag-ipon ng sapat na tubig para sa kanilang pag-inom at iba pang pangunahing pangangailangan.

Gayunman, hindi dapat matapos sa pagtatayo ng isang pasilidad ang paghahanda sa El Niño. Ang ganitong mga proyekto ay kailangang mapanatili, masubaybayan at mapalawak sa mga komunidad na higit na nangangailangan. Dapat ding matiyak na ligtas ang tubig na ipinagkakaloob, maayos ang pagpapatakbo ng sistema at may malinaw na paraan upang makakuha nito ang mga residente nang hindi nadaragdagan ang kanilang gastusin.

Ang El Niño ay nagdudulot ng mas mainit at mas tuyong kondisyon na maaaring magpababa sa dami ng ulan, magpahirap sa suplay ng tubig at makaapekto sa agrikultura. Kapag nagkulang ang tubig, hindi lamang pang-araw-araw na gawain ang naaapektuhan. Maaari ring madagdagan ang gastusin ng mga pamilya, malagay sa panganib ang kalusugan at maapektuhan ang kabuhayan ng mga umaasa sa pagsasaka.

Dahil dito, mahalagang kumilos nang maaga ang pamahalaan sa halip na maghintay na maramdaman muna ng taumbayan ang matinding epekto ng tagtuyot. Dapat palakasin ang mga programang nagbibigay ng malinis na tubig, tiyakin ang sapat na suplay at unahin ang mga lugar na posibleng makaranas ng kakulangan.

Ang tunay na sukatan ng paghahanda ay hindi lamang ang dami ng proyektong naitatayo, kundi kung gaano karaming pamilya ang aktuwal na natutulungan. Ang malinis na tubig ay hindi dapat maging pribilehiyo ng iilan, kundi serbisyong dapat maabot ng bawat mamamayan. Sana, sa pamamagitan ng maagap na pagkilos at pagtutulungan ng pamahalaan at mga komunidad, lahat ay magkaroon na ng solusyon sa paparating na tag-init.