Labis na singil sa mga ospital, dapat agad aksyunan at mapanagot!

ni Leonida Sison @Boses | April 13, 2026

Kung tutuusin, hindi lamang sakit ang kalaban ng mga Pinoy kapag nagpupunta sa ospital kundi pati na rin ang bill na maaaring magpahina ng kanilang pag-asang gumaling.

Sa gitna ng hirap ng buhay, maraming pamilya ang hindi lang takot sa emergency kundi pati sa posibleng babayarang singil pagkatapos ng gamutan. Kaya panawagan ng isang opisyal ang mahigpit na pagbabantay ng gobyerno sa umano’y sobrang taas na singil ng ilang pribadong ospital, lalo na sa emergency room.

Ayon sa mga ulat, madalas ang tinatawag na “bloated” o pinalolobong singil sa ER. Sa halip na gumaan ang kalagayan ng pasyente, nadaragdagan pa umano ang pasanin dahil sa laki ng bayarin.

Hindi lingid sa kaalaman ng marami na sa mga emergency, wala nang oras ang pamilya para mamili ng ospital o magkumpara ng presyo. Ang pangunahing iniisip ay mailigtas ang buhay ng pasyente, kaya may pangamba na may ilang institusyong maaaring nakikinabang sa ganitong sitwasyon.

Sinang-ayunan ito ng isa pang mambabatas na nagsabing dapat masusing tingnan ng Department of Science and Technology’s Health Technology Assessment Council (HTAC) ang presyuhan ng ilang pribadong ospital. Giit niya, nandiyan ang PhilHealth upang tumulong sa gastusin ng mamamayan, ngunit kung may sobrang dagdag-singil sa iba pang bayarin, nababawasan ang bisa ng benepisyo.

Binigyang-diin din ang pangangailangan ng mas malinaw na legal na batayan laban sa malpractice at iba pang maling gawain sa larangan ng medisina. Kulang din umano ang judicial precedents o mga naunang desisyon ng korte na maaaring maging gabay sa ganitong mga usapin.

Binanggit din ang halimbawa ng pneumonia case rate na sakop dapat ng PhilHealth, ngunit patuloy umanong lumalaki ang kabuuang billing dahil sa iba pang kaakibat na singil.

Samantala, tumangging magbigay ng komento ang PHAP sa detalye ng mga alegasyon dahil hindi pa umano nila lubos na nalalaman ang buong pangyayari. Hinihikayat din ang publiko na magsampa ng pormal na reklamo sa DOH hotline 1555 kung may sapat na ebidensya.

Hindi ito simpleng usapin ng presyo kundi usapin ng tiwala. Kapag may sakit ang tao, paggaling ang dapat isipin, hindi pagkakautang.

Kung may mga ospital na patas maningil, nararapat silang kilalanin. Ngunit kung may mga nananamantala, dapat silang papanagutin.

Ang serbisyong pangkalusugan ay hindi dapat maging luho. Sa bansang maraming naghihirap, ang ospital ay dapat lugar ng pag-asa, hindi ng panggigipit. Hangga’t may pamilyang mas nanginginig sa bill kaysa sa diagnosis, malinaw na may kailangang ayusin sa sistema.