Kaligtasan ng mga estudyante, ‘di dapat isugal

ni Leonida Bonifacio-Sison @Boses | September 20, 2026

Nakababahala na naman ang panibagong pamamaril sa loob ng isang pampublikong paaralan sa Banga, South Cotabato. Tatlong katao ang nasawi, kabilang ang hinihinalang gunman na estudyante rin, habang may iba pang iniulat na nasugatan. Sa isang lugar na dapat ay ligtas para sa pag-aaral at paghubog ng kinabukasan, muling pumasok ang karahasan sa loob ng paaralan.

Hindi na ito dapat tingnan bilang isang insidenteng lilipas lamang matapos ang ilang araw ng balita. Ayon sa ulat, ito na ang ikatlong insidente ng pamamaril sa paaralan kasunod ng mga naunang kaso sa Tacloban City at Zamboanga City. Kapag nauulit ang ganitong pangyayari, malinaw na kailangan ng mas seryosong pagtingin sa seguridad ng mga paaralan at sa paraan ng pag-iwas sa karahasan.

Agad na sinuspinde ang klase sa lahat ng antas sa Banga matapos ang insidente. Isinugod naman sa mga pagamutan ang mga nasugatan upang mabigyan ng agarang lunas. Patuloy din ang imbestigasyon upang mabuo ang buong pangyayari at matukoy ang motibo sa pamamaril.

Mahalaga ang imbestigasyon, pero hindi dapat doon nagtatapos ang tugon. Kailangang suriin ang seguridad sa mga paaralan, access sa mga armas, emergency response at kakayahan ng mga guro at school personnel na makapaghanda kapag may banta ng karahasan.

Muling isinusulong ang panukalang Safe Schools and Violence Prevention Bill, na naglalayong magtatag ng pambansang safety framework para sa mga paaralan.

Anuman ang magiging kapalaran ng panukalang ito, malinaw na kailangan ng konkretong sistema upang maprotektahan ang mga estudyante at kawani.

Hindi sapat ang paglalagay lamang ng seguridad pagkatapos may mangyaring trahedya. Mas mahalaga ang pag-iwas bago pa may mapahamak. Kailangan ding tiyakin ang psychological first aid at psychosocial support para sa mga estudyante, guro at pamilyang naapektuhan dahil hindi agad nawawala ang takot matapos ang isang karahasang ganito.

Sa bawat batang pumapasok sa paaralan, may pamilyang umaasang makakauwi siyang ligtas. Kaya ang seguridad sa paaralan ay hindi lamang usapin ng DepEd, pulisya o pamahalaan. Pananagutan ito ng buong komunidad.

Ang paaralan ay dapat na lugar ng kaalaman, pangarap at pag-asa—hindi lugar na kinatatakutan ng mga bata. Kapag ligtas ang paaralan, mas panatag ang pamilya at mas may pagkakataong maabot ng kabataan ang kinabukasang ipinaglalaban ng buong bayan.