Karapatan ng mga bata sa masustansyang pagkain sa ilalim ng Republic Act No. 11037

ni PAO Chief Persida Rueda-Acosta @Magtanong Kay Attorney | September 20, 2026

Sa ilalim ng Republic Act (R.A.) No. 11037, idineklarang polisiya ng Estado na kinikilala nito ang mahalagang papel ng kabataan sa pagbuo ng bansa at itataguyod at pangangalagaan nito ang kanilang kapakanang pisikal, moral, espirituwal, intelektuwal, at panlipunan. Bilang pagkilala sa napatunayang ugnayan ng pagkain at nutrisyon sa kakayahan ng mga mag-aaral na luminang at matuto, magtatatag ang Estado ng isang komprehensibong pambansang programa sa pagpapakain na tutugon sa suliranin ng kakulangan sa nutrisyon sa mga batang Pilipino.

Kaugnay sa polisiyang ito ay ang pagbuo ng Pambansang Sistema ng Impormasyon kung saan pag-uugnayin ng National Nutrition Council (NNC) ang lahat ng umiiral na pambansa at lokal na database ng nutrisyon mula sa mga National Government Agencies (NGA), Local Government Units (LGUs), at iba pang kaugnay na ahensya ng pamahalaan upang matukoy ang mga indibidwal, grupo, at lugar na may pinakamataas na antas ng kagutuman at kakulangan sa nutrisyon. Gagamitin ang sistemang ito sa pagsubaybay sa kalusugan at nutrisyon ng lahat ng batang Pilipino, lalo na ang mga saklaw ng programa.

Para sa partikular na batas na ito, ang Department of Education (DepED) at ang Department of Social Welfare and Development (DSWD) ang mga pangunahing ahensya sa pagpapatupad ng programang ito para sa mga pampublikong paaralang kindergarten at elementarya at mga pampublikong day care center, ayon sa pagkakabanggit. Upang bigyan ng katuparan ang polisiya ng batas, itatatag ang programang magbibigay ng kalutasan sa undernutrition ng mga batang Pilipino. Ang nasabing programa ay magkakaroon ng mga sumusunod na saklaw at bahagi:

(a) Supplemental Feeding Program for Day Care Children. - Ang DSWD, sa pakikipag-ugnayan sa mga kinauukulang LGU, ay magpapatupad ng programang supplemental feeding para sa mga batang may edad tatlo (3) hanggang limang (5) taon na kulang sa nutrisyon. Ang programa ay isasagawa sa mga daycare centers o sa alinmang pasilidad na maaaring gamitin para sa nasabing layunin: Sa kondisyon na ang programa ay magsasama ng pagbibigay ng kahit isang (1) pagkaing may dagdag na nutrisyon (fortified meal) sa loob ng panahong hindi bababa sa isang daan at dalawampung (120) araw sa isang taon: At sa karagdagang kondisyon na sa paghahanda ng mga nasabing pagkain, ang DSWD ay makikipagtulungan sa mga kinikilalang organisasyon ng mga magulang.

(b) School-Based Feeding Program. - Magpapatupad ang DepED ng programang pagpapakain sa paaralan para sa mga batang kulang sa nutrisyon sa mga pampublikong paaralan, mula kindergarten hanggang Grade 6, sa kondisyong ang programa ay magsasama ng pagbibigay ng kahit isang (1) pagkaing may dagdag na nutrisyon (fortified meal) sa lahat ng batang kulang sa nutrisyon sa mga pampublikong paaralang elementarya sa loob ng panahong hindi bababa sa isang daan at dalawampung (120) araw sa isang taon. 

(c) Milk Feeding Program. - Makikipag-ugnayan ang mga NGA sa Department of Agriculture (DA), National Dairy Authority (NDA.), Philippine Carabao Center (PCC), at Cooperative Development Authority (CDA) para sa pagsasama ng sariwang gatas at mga produktong pagkain na gawa sa sariwang gatas sa mga pinatibay na pagkain (fortified meals) at cycle menu, alinsunod sa Republic Act (R.A.) No. 8172, na kilala rin bilang "Philippine Food Fortification Act of 2000"; gagamitin dito, hangga't maaari, ang gatas na lokal na ginawa upang mapataas ang nutrisyonal na halaga nito at, kasabay nito, ay makatulong sa pagpapalakas ng mga oportunidad sa kabuhayan para sa mga lokal na magsasaka ng gatas at sa lokal na industriya ng pagawaan ng gatas.

(d) Micronutrient Supplements. - Ang mga NGA, sa pakikipag-ugnayan sa DOH, ay magkakaloob ng mga micronutrient supplement sa mga benepisyaryo ng programa, kabilang ang paggamit ng iodized salt alinsunod sa Republic Act (R.A.) No. 8172, na kilala rin bilang batas na "salt iodization o asin."

(e) Health Examination, Vaccination and Deworming. - Ang mga NGA, sa pakikipag-ugnayan sa DOH at mga kinauukulang LGU, ay magsasagawa ng sabay-sabay na pagsusuring pangkalusugan—kabilang ang, ngunit hindi limitado sa, pagpapatanggal ng bulate at pagbabakuna, depende sa pangangailangan—para sa mga benepisyaryo ng programa;

(f) Gulayan sa Paaralan. - Hihikayatin ng mga NGA ang kani-kanilang mga yunit na maglaan ng bahagi ng kanilang lupain o espasyo para sa pagtatanim ng mga gulay at iba pang halamang mayaman sa nutrisyon na tinukoy ng NNC, sa kondisyon na ang mga yunit na kulang sa lupain ay gagamit ng mga makabagong teknolohiya sa paghahalaman sa tulong ng DA, Department of Science and Technology (DOST), at ng mga opisyal sa agrikultura ng lungsod o munisipalidad. Hihikayatin din ang mga magulang na magpatupad ng katulad na programa sa kanilang sariling mga bakuran.

(g) Water, Sanitation, and Hygiene (WASH). - Ang mga NGA, sa pakikipag-ugnayan sa DOH at LGUs ay dapat magtatag at magpanatili ng mga pasilidad ng tubig at kalinisan, magsusulong ng mabuting kalinisan at ligtas na paghahanda ng pagkain sa lahat ng mga bahaging yunit nito lalo na sa mga lugar na nakatuon para sa paghahanda ng mga pinatibay na pagkain sa ilalim ng programa.

(h) Integrated Nutrition Education, Behavioral Transformation, and Social Mobilization. - Ang programa ay pupunuan ng isang kampanya sa pampublikong kalusugan, nutrisyon, at pagbabago ng mga pagpapahalaga upang isulong ang isang buo at pinagsama-samang pamamaraan sa edukasyon sa kalusugan at nutrisyon. Magsasagawa ng kasanayan hinggil sa mga layunin at mekanismo ng programa para sa mga kawani ng mga kinauukulang NGA at LGU, mga boluntaryong magulang, at mga parent-teacher association (PTA) upang makakuha ng suporta para sa programa. Sisikapin din ng mga kinauukulang NGA na pakilusin ang mga organisasyon sa komunidad upang ipagpatuloy ang edukasyon sa nutrisyon sa labas ng paaralan.