Hustisya sa kalalakihang biktima rin ng sexual abuse

ni Leonida Bonifacio-Sison @Boses | November 1, 2026

Sa bawat kaso ng pang-aabusong seksuwal, hindi dapat maging hadlang ang kasarian upang kilalanin ang isang biktima at bigyan siya ng hustisya. 

Hindi lamang kababaihan ang maaaring makaranas ng ganitong karahasan dahil maaari ring maging biktima ang mga kalalakihan, lalo na ang mga batang walang sapat na kakayahang ipagtanggol ang kanilang sarili. Kaya mahalagang tiyaking pantay ang pagtingin ng batas sa lahat ng nakararanas ng pang-aabuso.

Binigyang-diin ito ng Korte Suprema sa isang desisyon na kumikilala sa posibilidad na maging biktima rin ng seksuwal na karahasan ang mga lalaki. 

Ayon sa Korte, bagama’t hindi dapat kalimutan ang makasaysayang diskriminasyon at karahasang dinanas ng kababaihan, kailangang maging sapat ang saklaw at interpretasyon ng batas upang maprotektahan ang lahat. Hindi dapat ikahon sa paniniwalang babae lamang ang biktima at lalaki lamang ang salarin ang usapin ng pang-aabuso.

Ipinaliwanag din ng Kataas-taasang Hukuman na hindi lamang kasarian ang dapat isaalang-alang sa mga kasong ito, kundi higit sa lahat ang hindi pantay na kapangyarihan ng mga sangkot. 

Maaaring magmula ang ganitong kalamangan sa pagkakaiba ng edad, katayuang pang-ekonomiya, edukasyon o posisyon sa trabaho. Ginagamit ito ng isang mapagsamantala upang pilitin, manipulahin o alisin sa biktima ang kakayahang tumanggi.

Makikita ang kahalagahan nito sa kasong kinasasangkutan ng isang 11-anyos na batang lalaki na inabuso ng sarili niyang tiyahin. Inutusan umano siya nitong maghubad at humiga sa kama bago isagawa ang seksuwal na gawain. Kalaunan, natukoy sa pagsusuri na nakaranas ang bata ng post-traumatic stress disorder. Nakaramdam din siya ng hiya at umabot sa puntong naisip niyang magpakamatay.

Hindi tinanggap ng Korte Suprema ang katuwirang pumayag ang bata sa ginawa sa kanya. Noong 2018, 12 taong gulang pa ang itinakdang edad ng sexual consent, bago ito itinaas sa 16 sa ilalim ng Republic Act No. 11648 noong 2022. Dahil 11 taong gulang lamang ang biktima, wala siyang legal na kakayahang magbigay ng pahintulot.

Nahatulan ang babae sa kasong statutory acts of lasciviousness sa ilalim ng Article 336 ng Revised Penal Code. Pinatawan siya ng siyam hanggang 16 na taong pagkakakulong at inutusang magbayad ng P250,000 bilang civil indemnity at danyos.

Mahalagang paalala ito sa mga pamilya at komunidad na walang kasarian ang pagiging biktima ng pang-aabuso. Dapat pakinggan at seryosohin ang bawat nagsusumbong, sa halip na husgahan batay sa nakasanayang paniniwala tungkol sa lalaki at babae. 

Ang tunay na hustisya ay hindi namimili ng kasarian. Pinoprotektahan nito ang dignidad, kaligtasan at karapatan ng bawat tao, lalo na ng mga batang higit na nangangailangan ng pag-aaruga at pagtatanggol.