Emergency vehicle, laging bigyan ng daan

ni Leonida Bonifacio-Sison @Boses | September 21, 2026

Sa bawat segundong nasasayang sa kalsada, may buhay na maaaring nakasalalay. Kaya hindi simpleng usapin ng traffic violation ang pagharang o hindi pagbibigay-daan sa mga fire truck na rumeresponde sa isang emergency. Kapag may sasakyang kailangang makadaan agad, ang ilang segundong pagkaantala ay maaaring maging malaking kawalan para sa mga taong naghihintay ng saklolo.

Sinuspinde ng Land Transportation Office (LTO) ang mga lisensya ng dalawang motorista na nasangkot sa magkahiwalay na insidenteng na-video at kumalat online. Pareho silang pinatawan ng kaparusahan matapos ang imbestigasyon at pagdinig kaugnay ng mga paglabag sa batas-trapiko.

Sa unang insidente sa Makati, isang motorista ang nahuling naka-double parking sa Macabulos Street sa Barangay Bangkal at nakaharang sa daanan. Ipinaliwanag niyang inaayos noon ang kanyang sasakyan, nakapatong ito sa jack at natanggal ang isang gulong, kaya hindi agad nailipat. Gayunman, napatunayang lumabag siya sa traffic obstruction at pagbabawal sa pagparada sa mga itinakdang lugar. Dahil dito, sinuspinde ang kanyang lisensya ng tatlong buwan.

Sa ikalawang insidente sa Guadalupe Nuevo, isang motorista naman ang nakitang hindi agad nagbigay-daan sa paparating na fire truck. Bagama’t sinabi niyang wala siyang intensiyong humarang at wala siyang makitang lugar na mapaparaanan, ipinakita ng video na may espasyo sa kanang bahagi ng kalsada kung saan maaari sana siyang tumabi. Dahil sa paglabag sa right of way ng emergency vehicle at obstruction of traffic, isang taong suspensyon ang ipinataw sa kanyang lisensya.

Mahalaga ang ganitong pagpapatupad dahil hindi lamang ang mga motorista ang apektado ng traffic obstruction. Kapag nahuli ang fire truck, maaaring maantala ang pag-apula ng sunog at pagligtas sa mga taong nasa panganib. Ang mga residente, pamilya, negosyo at buong komunidad ang maaaring direktang makaramdam ng epekto.

Hindi rin sapat na maging maingat lamang kapag may camera o kapag alam nating may nagbi-video. Ang pagbibigay-daan sa emergency vehicles ay dapat maging awtomatikong responsibilidad ng bawat motorista.

Ang disiplina sa kalsada ay hindi lamang tungkol sa pag-iwas sa multa o suspensyon ng lisensya. Tungkol ito sa paggalang sa buhay ng kapwa. Maaaring hindi natin kilala ang taong nangangailangan ng saklolo sa kabilang kalsada, pero tulad natin, may pamilya rin siyang umaasa na makauwi siyang ligtas.

Kaya sa bawat tunog ng sirena, huwag nating isipin na istorbo ito sa biyahe. Paalala ito na may emergency na kailangang tugunan. Ang pagbibigay-daan ay maliit na kilos para sa motorista, pero maaaring malaking tulong para sa isang buhay na naghihintay ng saklolo.