Hanggang kailan maaaring ipatupad ang desisyon ng korte?

ni PAO Chief Persida Rueda-Acosta @Magtanong Kay Attorney | September 21, 2026

Dear Chief Acosta,

Nanalo po ako sa isang kaso at naging pinal na ang desisyon ng korte. May takdang panahon po ba para maipatupad ang nasabing desisyon? Ano po ang mangyayari kung lumampas na ang ilang taon bago ito tuluyang maipatupad? — Sheroike

---

Dear Sheroike,

Ang sagot sa iyong katanungan ay matatagpuan sa Rule 39 ng Rules of Court, New Civil Code of the Philippines, at sa mga pasya ng Korte Suprema.

Nakasaad sa Section 6, Rule 39 ng Rules of Court:

“A final and executory judgment or order may be executed on motion within five (5) years from the date of its entry. After the lapse of such time, and before it is barred by the statute of limitations, a judgment may be enforced by action.”

Samakatuwid, ang isang pinal at executory na hatol ay maaaring ipatupad sa pamamagitan ng motion sa loob ng limang (5) taon mula sa date of entry nito. Pagkalipas ng nasabing panahon, maaari itong ipatupad sa pamamagitan ng action, basta't hindi pa ito nahahadlangan ng prescription.

Kaugnay nito, nakasaad sa Article 1144 ng nasabing Code:

“The following actions must be brought within ten years from the time the right of action accrues: (3) Upon a judgment.”

Nakasaad naman sa Article 1152 ng New Civil Code of the Philippines:

“The period for prescription of actions to demand the fulfillment of obligation declared by a judgment commences from the time the judgment became final.”

Sa kasong Zabarte vs. Puyat (G.R. No. 234636, ika-13 ng Pebrero 2023, isinulat ni Kagalang-galang na Kasamang Mahistrado Rodil V. Zalameda), ipinaliwanag ng Korte Suprema:

“Once a judgment becomes final and executory, the prevailing party can have it executed as a matter of right by mere motion within five years from the date of entry of judgment. If the prevailing party fails to have the decision enforced by a motion after the lapse of five years, the said judgment is reduced to a right of action which must be enforced by the institution of a complaint in a regular court within ten years from the time the judgment becomes final.”

Samakatuwid, bilang pangkalahatang tuntunin, maaaring ipatupad ang pinal na hatol sa pamamagitan ng motion sa loob ng limang taon. Pagkalipas nito, maaari itong ipatupad sa pamamagitan ng kaukulang action, na dapat maisampa bago lumampas ang 10-taong prescriptive period.

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyong iyong inilahad at maaaring magbago kung mababawasan o madaragdagan ang mga detalye ng iyong salaysay.

Maraming salamat sa iyong patuloy na pagtitiwala.