Ebola alert, huwag magpakampante

ni Leonida Bonifacio-Sison @Boses | November 5, 2026

Delikado ang pagpapabaya sa mga hakbang pangkalusugan sa gitna ng banta ng Ebola outbreak sa ibang bansa. 

Bagama’t wala pang naitatalang kaso ng naturang virus sa Pilipinas, hindi nangangahulugang maaari nang maging kampante ang publiko. Sa panahon ng mabilis na paglalakbay at pagpasok-labas ng mga tao sa iba’t ibang bansa, mahalagang tiyakin na handa ang mga awtoridad na pigilan ang anumang posibleng pagkalat ng nakahahawang sakit.

Dahil sa Ebola outbreak sa Republic of the Congo, nagpatupad ang US Centers for Disease Control and Prevention (CDC) ng karagdagang travel requirements para sa mga biyahero patungong Estados Unidos. Ayon sa Bureau of Quarantine (BOQ), kailangang kumpletuhin ng mga pasaherong bibiyahe sa pamamagitan ng eroplano ang isang mandatory attestation o deklarasyon na nagpapatunay na hindi sila bumiyahe sa Republic of the Congo sa nakalipas na 21 araw.

Saklaw din ng patakaran ang mga pasaherong dumaan o nag-transit sa anumang paliparan sa Democratic Republic of the Congo, kahit hindi sila bumaba ng eroplano o lumabas sa loob ng paliparan. Ibig sabihin, kailangang isama sa deklarasyon ang buong travel history, kabilang ang mga bansang binisita at dinaanan sa loob ng itinakdang panahon.

Iniulat din ng BOQ na naglabas na ng mga abiso ang mga airline na may biyaheng patungong Estados Unidos at inaayos ang kanilang mga proseso upang makasunod sa bagong patakaran. Pinayuhan ang mga pasahero na direktang makipag-ugnayan sa kanilang airline upang malaman ang mga kinakailangang dokumento at deklarasyon bago bumiyahe.

Samantala, tiniyak ng Department of Health (DOH) na nananatiling walang naitatalang kaso ng Ebola sa bansa. Gayunman, patuloy na nakatutok ang mga awtoridad sa pandaigdigang sitwasyon upang maagapan ang anumang panganib. Noong Mayo, idineklara ng World Health Organization (WHO) ang Public Health Emergency of International Concern kaugnay ng Bundibugyo strain ng Ebola virus sa ilang bahagi ng Africa.

Mahalagang maunawaan ng publiko na hindi lamang responsibilidad ng pamahalaan ang pagpigil sa pagpasok ng mga nakahahawang sakit. May tungkulin din ang bawat biyahero na maging tapat sa pagsisiwalat ng kanilang pinanggalingan at mga bansang dinaanan. Ang pagtatago ng impormasyon ay maaaring maglagay sa panganib hindi lamang sa sarili kundi maging sa ibang pasahero at komunidad.

Sa ganitong sitwasyon, nararapat na palakasin ang pagbabantay sa mga paliparan, tiyakin ang maayos na koordinasyon ng mga ahensiya at magbigay ng malinaw na impormasyon sa publiko. Hindi kailangang hintayin pang magkaroon ng unang kaso bago kumilos nang mas mahigpit. Mas mabuting maging handa ngayon kaysa magsisi kapag huli na ang lahat.

Ang kaligtasan ng taumbayan ay nakasalalay sa maagap na pagkilos, tamang impormasyon at disiplina. Sa harap ng banta ng Ebola, ang pagiging alerto ay hindi dapat mauwi sa takot, kundi magsilbing paalala na ang pag-iingat ay isang pananagutang hindi dapat ipagwalang-bahala.