Dugyot, trapik at delikadong Divisoria, no more!

ni Leonida Bonifacio-Sison @Boses | August 7, 2026

Ang sarap makita na unti-unting bumabalik ang kaayusan sa isa sa pinakakilalang pamilihan sa bansa. Kapag malinis ang paligid, maayos ang daloy ng publiko at sasakyan, at mas komportable ang pamimili, mas nararamdaman ng mga mamamayan na may direksyon at malasakit ang pamahalaan. 

Ang pagbabago sa Divisoria ay isang paalala na posible pa ring maibalik ang disiplina at kaayusan kung may malinaw na pamumuno at pagtutulungan.

Nang dahil kay Manila Mayor Isko Moreno, agad na nagbunga ang resulta ng kanyang pangakong tutukan ang paglilinis ng lungsod. Ang Divisoria at mga kalapit na lansangan ay naging mas malinis, mas maayos at mas ligtas matapos ang serye ng cleaning at clearing operations na isinagawa ng pamahalaang lungsod sa pamamagitan ng Special Mayor’s Reaction Team (SMaRT).

Naalis ang maraming sagabal sa bangketa at kalsada kaya naging mas magaan ang daloy ng trapiko at mas ligtas ang paglalakad ng mga mamimili, residente at motorista. Bahagi ito ng patuloy na kampanya ng lokal na pamahalaan upang maibalik ang disiplina sa lansangan at mapanatili ang kalinisan at kaayusan sa Maynila.

Kapansin-pansin ang mas kaaya-ayang karanasan sa pamamalengke. Mas malinis ang paligid, mas organisado ang mga puwesto, at maraming panindang gulay, prutas at iba pang sangkap sa pagluluto ang mukhang sariwa at maayos ang pagkakaayos. Nakadadagdag din sa magandang karanasan ang magalang at magiliw na pakikitungo ng maraming tindero at tindera na nagbibigay ng mas magaan na pakiramdam sa mga bumibili.

Hindi maikakaila na ang ganitong pagbabago ay bunga ng maayos na pamamahala at mahigpit na pagpapatupad ng mga ordinansa. Ngunit mahalagang tandaan na ang kalinisan ng Divisoria ay hindi lamang responsibilidad ng alkalde o ng mga kawani ng lungsod. Nakasalalay rin ito sa pakikiisa ng mga vendor, motorista, mamimili at bawat mamamayan sa tamang pagtatapon ng basura, pagsunod sa mga alituntunin at paggalang sa pampublikong espasyo.

Karapat-dapat pasalamatan si Mayor Isko Moreno sa pagsisimula ng mga hakbang na nagbigay ng bagong mukha sa Divisoria. Ang isang pamilihang dati ay madalas iugnay sa matinding siksikan at kalat ay nagiging mas maayos at mas kaaya-ayang puntahan.

Gayunman, ang tunay na sukatan ng tagumpay ay kung mapananatili ang kaayusang ito sa paglipas ng panahon. Kapag nagpatuloy ang mahusay na pamumuno at nanatiling katuwang ang taumbayan, mas marami pang pampublikong lugar ang maaaring maging malinis, ligtas at maipagmamalaki ng bawat Manileño at ng buong bansa.