Band-aid solution, hindi makapipigil sa susunod na trahedya

ni Leonida Sison @Boses | June 29, 2026

Kung ipagbabawal ba ang social media sa mga menor-de-edad, mababawasan kaya ang karahasan at iba pang suliraning kinakaharap ng kabataan, o isa lamang itong mabilis ngunit pansamantalang lunas sa mas malalim na problema ng lipunan? 

Ito ngayon ang sentro ng diskusyon matapos ang nakagigimbal na pamamaril sa isang paaralan na kinasasangkutan ng dalawang menor-de-edad.

Kasunod ng insidente, muling nabuhay ang panawagan para higpitan ang paggamit ng social media at online platforms ng mga bata. Kabilang sa mga tinitingnang anggulo ng mga imbestigador ang posibleng impluwensya ng mararahas na video game at online content sa mga suspek. Dahil dito, nagpahayag ang Malacañang ng kahandaang pag-aralan ang mga panukalang magbabawal sa mga application na naglalaman ng marahas na tema para sa mga kabataan.

Suportado rin ni Senate President Sherwin Gatchalian ang mga hakbang na maglilimita sa access ng mga batang wala pang 16 taong gulang sa social media. Aniya, maraming pag-aaral ang nagpapakita na may epekto ang labis na paggamit ng social media at violent games sa mental health ng kabataan, kasabay ng pagtaas ng mga kaso ng mental health concerns sa bansa.

Sa Hulyo 1, magsasagawa ng pagdinig ang Senado upang alamin kung may papel ang online platforms sa paglaganap ng mararahas na ideolohiya at kung paano nagagamit ang mga ito sa pag-impluwensya sa mga kabataan.

Hindi naman bago ang panukalang ito. Noong Abril, inihain ang Senate Bill No. 2066 o Social Media Safety for Children Bill na naglalayong pagbawalan ang mga batang wala pang 16 taong gulang na magkaroon ng social media accounts. Kasama rin dito ang pagpapatupad ng age-verification system upang masiguro ang pagsunod sa batas.

Samantala, hinikayat din ng Department of Information and Communications Technology (DICT) ang Kongreso na maipasa ang isang digital safety law bago matapos ang 2026, kabilang ang pagtatakda ng minimum age requirement sa paggamit ng social media.

Gayunman, maraming sektor ang naniniwalang hindi sapat ang simpleng pagbabawal. Ayon sa Council for the Welfare of Children, hindi makabubuti sa mga bata ang isang total ban dahil hindi nito tinutugunan ang tunay na ugat ng problema. Para naman sa isang sociologist, hindi praktikal ang ganitong polisiya dahil maging ang mga nasa hustong gulang ay nakararanas din ng parehong panganib sa online world.

Iginiit niya na mas mahalagang gawing ligtas ang digital environment para sa lahat kaysa basta pagbawalan ang isang partikular na sektor. May pangamba rin na kapag pinagbawalan ang mga bata sa mga pangunahing platform, maaari silang lumipat sa mas mahirap bantayan at mas mapanganib na online spaces. Ganito rin ang babala ng CitizenWatch Philippines na nagsabing maaaring mailipat lamang ang panganib sa ibang lugar sa halip na tuluyang mabawasan.

Isa pang usapin ang karapatan ng kabataan sa impormasyon at pakikilahok sa mga usaping panlipunan. Maaari ring magkaroon ng banta sa privacy kung kakailanganing magsumite ng sensitibong personal na impormasyon para sa age verification. Dagdag pa rito, may posibilidad na gumamit lamang ang mga menor-de-edad ng pekeng detalye o account ng ibang tao upang makalusot sa mga restriksyon.

Para sa maraming pamilyang Pilipino, lalo na sa mga may magulang na nagtatrabaho sa ibang bansa, mahalagang kasangkapan ang social media sa komunikasyon at pagpapanatili ng ugnayan. Kaya naman hindi maaaring balewalain ang positibong papel nito sa pang-araw-araw na buhay.

Sa halip na band-aid solution, mas mainam na ituon ang mga hakbang sa pagpigil sa mga tunay na pinagmumulan ng online harm, kabilang ang mga grupong nagpapakalat ng karahasan, pang-aabuso, at mapanlinlang na impormasyon. Katulad ito ng layunin ng Child Online Safety and Protection Bill na pinagtibay na ng Kamara, na nakatuon sa mas mahigpit na proteksyon laban sa online sexual abuse at exploitation ng mga bata.

Sa ganang akin, mahalagang kumilos ang pamahalaan upang protektahan ang kabataan, ngunit hindi sapat ang simpleng pagbabawal upang maresolba ang isang komplikadong suliranin. Ang tunay na hamon ay kung paano bubuo ng isang ligtas, responsable, at makataong digital environment para sa lahat. Hindi lamang teknolohiya ang dapat bantayan kundi pati ang edukasyon, paggabay ng magulang, kalusugang pangkaisipan, at kultura ng paggamit ng internet.

Ang usapin ay hindi lamang tungkol sa social media kundi tungkol sa kinabukasan ng kabataang Pilipino. Kung nais nating maiwasan ang mga trahedyang tulad ng mga nangyayaring insidente ngayon sa mga kabataan, kailangan na magkaroon ng mas malalim, mas matalino, at mas pangmatagalan ang mga solusyong ating isusulong para sa kapakanan ng buong sambayanan.