Walong buwan na proyekto, mahabang sakit ng ulo ng motorista

ni Ka Ambo @Bistado | December 18, 2025

Sisimulan na ang rehabilitasyon ng EDSA.

Isasarado ang malaking bahagi ng EDSA, epektibo sa Disyembre 24.

-----$$$--

MALINAW na sobrang trapik ang mararanasan ng Metro Manila ngayong Pasko.

Walang kinalaman ang inyong mga ninong at ninang sakaling hindi n’yo sila matagpuan sa kanilang mga bahay sa katuwirang “traffic kasi.”

-----$$$--

IMBES na dalawang taon, magiging walong buwan ang itatagal ng rekonstruksiyon.

Mahabang away ng mga motoristo ang mararanasan.

-----$$$--

TALIWAS sa mungkahi ng ilan na magsagawa muna ng dry run sa traffic reroute, hindi ito isinagawa.

Walang duda, maraming isisisi at magmumura laban sa DPWH, MMDA at Malacañang.

-----$$$--

MAAARING matuwa ang mga tao sakaling matapos ang EDSA rehab, pero habang ginagawa ito sa loob ng walong buwan—katakut-takot na galit ang ating masasaksihan.

Dagdag-konsume ito sa Malacañang na pumapasan ng kaliwa’t kanang batikos.

-----$$$--

MAGKATUWANG na pinaparusahan ng United States at Russia ang mga huwes at prosecutor ng International Criminal Court (ICC).

Lihim na natutuwa si Sen. Bato.

-----$$$--

MISTULANG nagdeklara ng giyera kontra-ICC ang kapwa sina US President Donald Trump at Russia strongman Vladimir Putin.

Parehong BFF ni Digong sina Trump at Putin.

-----$$$--

IGINAGANTI nina Trump at Putin ang sinapit na kaapihan ni Digong sa kamay ng ICC.

Binabastos kasi ng ICC ang soberanya, Konstitusyon, kultura at tradisyon ng ibang bansa.

----$$$--

NAGBABALAT-KAYO ang ICC na sila ang nagtatakda ng moralidad sa buong daigdig—gayung ang moral standard ay nakapundasyon dapat sa kultura at tradisyon ng bawat isang bansa, na may soberanya at malaya sa panghihimasok na “foreign” influence.

----$$$--

DAPAT ay magkaroon ng parallel international court para litisin naman ang mga “lider” o “tao” na nagtatraydor o bumabastos sa soberanya ng kani-kanyang bansa.

Guilty ang ICC sa panghihimasok sa “internal law” ng isang independent country tulad ng Pilipinas.

----$$$--

BINABASTOS ng ICC ang US at Russia kaya’t sila ay pinarurusahan.

Pero, dapat ay parusahan din ng US at Russia ang sinumang lider at bansa na kakuntsaba ng ICC.

-----$$$--

MAPAPARALISADO ang operasyon ng ICC dahil sa sanctions ng US at Russia.

Sa malaon at madali ay titiklop ito dahil sa pambabastos sa soberanya ng ibang bansa at pagpapapagamit bilang “political tool” ng mga makasariling mga pulitiko sa dikta ng mga dambuhalang negosyante.

-----$$$--

MAGHIHINTAY tayo sa mga kasunod na kabanata kung popostura pa rin ang ICC bilang “moral leader” ng daigdig.

Nakasusuka, nakahihiya, nakasusulasok ang pagpapagamit nila bilang kasangkapan sa pulitika at umaastang negosyo ang kanilang institusyon—sa pagkolekta ng pondo mula sa iba’t ibang bansa!

---

Kung may reaksyon, sumbong o katanungan, sumulat sa ASINTADO ni Judith Sto. Domingo sa BULGAR Bldg., 538 Quezon Ave., Quezon City o mag-email sa asintado.bulgar@gmail.com.