Toneladang shabu sa barko, bakit wala pang detalye ang PNP?

ni Ka Ambo @Bistado | October 14, 2026

Kinumpirma na ng PNP na dawit ang dalawang Pinoy sa tangkang pagpuslit ng epektos ng shabu papasok sa Maynila.

Kinumpirma nila ang private jet na tinangkang magbiyahe patungo sa Maynila.

----$$$--

Tinukoy na ng PNP ang dalawang Pinoy na sangkot sa private jet na magbibiyahe ng shabu.

Pero, wala silang inilalabas na detalye hinggil sa higit na isang toneladong shabu na sakay naman ng isang barko mula Thailand patungo rin Maynila.

-----$$$--

Tapos na ang presentasyon ng ebidensiya at testigo ng prosekusyon sa impeachment trial laban kay VP Sara.

Lilipat naman ang eksena sa depensa ng Bise Presidente.

Meaning, puwede nang ipatawag si ex-Sen. Antonio Trillanes.

Marami ang nag-aabang!

---$$$--

BIDANG-BIDA talaga ang Senado.

Kumbaga sa carnaval, marami ring “side events” na puwedeng pagpiyestahan.

----$$$--

TRIPLE whammy daw si Sen. Ping Lacson na ayaw tantanan si Sen. Alan Peter Cayetano.

Pinag-tatlo pa niya ang akusasyon.

Isa sa ghost project; ikalawa sa reclamation; at ikatlo ang fake titles.

----$$$--

DINADAAN na lang ni Lacson sa “paramihan ng bilang”.

Ganyan din kasi ang sitwasyon  ni Digong sa ICC, tinambakan ng akusasyon para magmukhang totoo.

Ang problema, awtentikado ba o sapat ba ang mga ebidensiya?

----$$$--

SA totoo lang, sa impeachment trial, nagkusa ang prosekusyon na magbawas ng “articles” at akusasyon partikular ang “bribery.”

Namulat sila na hindi ito “paramihan,” bagkus ay dapat na de-kalidad at malinaw ang ebidensiya.

----$$$--

IMBES na ebidensya, “wento-wento” lang ang estilo at bahala na ang “trolls” na mag-share nang mag-share para magmukhang totoo sa paningin ng mga taga-socmed!

Inilabas ang mga larawan at listahan sa media, pero nasira ang hilatsa ng baraha nang mismong si DPWH Secretary Vince Hizon ang nagsabi na walang “ghost project” sa Taguig.

----$$$--

NATAPOS ang ‘wento nang sumegunda si Undersecretary Ricardo Bernabe III at nag-ulat na may 107 na proyekto sa lungsod.

At lahat ng ito ay may aktuwal na accomplishment. 

-----$$$--

INILIPAT ang ‘wento sa illegal reclamation kuno sa Laguna de Bay.

Tinukoy ni Lacson ang 30 ektarya  na binubuo ng pitong lote na dumaan daw sa reclamation nang walang pahintulot ng Philippine Reclamation Authority.

----$$$--

GUSTONG palabasin na si Cayetano ang nag-apruba ng naturang reclamation.

Isang mala-imposibleng bagay lalo na kung ang akusasyon ay may personal na papel para sa senador.

----$$$--

PINAKAHULI ay ang “fake titles” kuno.

Apat na parcel ng lupa na may 38.83 ektarya raw ang peke at walang kaukulang record sa LRA. 

----$$$--

Pero sa pagdinig noong Setyembre 22, malinaw din ang pahayag ng PRA, hindi idineklara ng PRA na peke ang mga titulong iyon. 

Magkaiba kasi ang titulong may usapin sa registration kaysa sa titulong sadyang pineke. 

-----$$$--

NAGTATAKA ang marami kung bakit nakapokus lang si Lacson sa Taguig, paano ang ibang kaso ng katiwalian, bakit wala siyang binabanggit?

Bilang dating PNP Chief, alam niya dapat na ang tunay na hustisya ay hindi puwedeng “wento-wento” lang.

Napakahalaga ng matitibay na ebidensiya  at beripikadong impormasyon upang lumutang ang “katotohanan” na  siyang hinahanap nating lahat.

---

Kung may reaksyon, sumbong o katanungan, sumulat sa ASINTADO ni Judith Sto. Domingo sa BULGAR Bldg., 538 Quezon Ave., Quezon City o mag-email sa asintado.bulgar@gmail.com.

Ekonomiya, bumubulusok na, Malacañang kampante pa rin?!

ni Ka Ambo @Bistado | October 13, 2026

Diretso ang pagbagsak ng ekonomiya.

Bakit, kampante pa rin ang Malacañang?

-----$$$--

Hindi na makakaasa ang ordinaryong Pinoy na maisasalba pa ang ekonomiya, dahil ang El Niño at La Niña ay isang global phenomenon.

Nauunawaan kaya ito ng gobyerno at pribadong sektor?

Hindi na maiiwasan na maging P70 kada palitan sa isang dolyar—pustahan tayo!

-----$$$--

Ang malalaking bansa at higit na maunlad kaysa Pilipinas ay nasa “panic mode,” pero ang mga Pinoy pakuya-kuyakoy lang.

Dalawa lang ang posibleng dahilan:

Una, alam nilang walang solusyon kaya’t “Bathala na, o Bahala na!”

Ikalawa, ay maaring bunga ng kamangmangan, katangahan o kawalan ng kaalaman sa naturalesa ng krisis na ito.

-----$$$--

Nagtataka tayo kung bakit napagdidiskitahan ng matatanda ang kabataan.

Lumang kahon, molde, hulmahan o template ang ginagamit ng gobyerno.

----$$$--

Ang edukasyon, batas at pag-aanalisa sa sitwasyon ay nagmula sa naunang modernisasyon sa Europe o mula Western civilization.

Ito po ay sa nagdaang higit nang 2,000 taon, lipas at na-expired na ito, hindi na ito epektibo ngayon pero ‘yan pa rin ang pundasyon at batayan ng maseselang desisyon.

-----$$$--

Ang lumang konsepto dito ay ang pagkambal ng talino, karunungan o wisdom sa matatanda o mga may edad na, kaysa sa mga kabataan tulad ng mga binatilyo, liyebo-beinte o liyebo-trenta.

Gustong palabasin at isinisiksik na ang “mga kabataan ay mangmang at walang muwang.”

Isang maling konsepto na nakabatay sa sinaunang paniniwala.

----$$$--

Mas matatalino ngayon ang mga kabataan kaysa sa mga matatanda dahil sa teknolohiya na “mangmang” at bopol ang mga matatanda.

Imbes na pagbawalan ang mga kabataan na gumamit ng gadgets at social media mas dapat na i-encourage sila at  mamulat.

-----$$$--

Sa paghahari ng AI sa buong mundo, hindi ito kayang unawain  ng mga matatanda, tanging ang mga kabataan lamang ang pwedeng dumaig at mag-neutralised nito.

Bukod d’yan, walang bahid ng corruption ang mga kabataan, kumpara sa mga makasarili, mandarambong at tulisan sa pondo ng pamahalaan.

------$$$--

Ang mga kabataan ang dapat mamuno sa gobyerno at maging sa pribadong sektor upang masugpo ang malawakan, sistematiko at orkestradong pagnanakaw sa pamahalaan at panloloko ng pribadong sektor.

Bigyan-daan natin ngayon pa lamang ang mga kabataan, ipagbawal ang matatanda na humawak ng tungkulin sa gobyerno dahil ang kanilang karanasan ay naghahasik ng korupsyon at katiwalian.

-----$$$--

Sa panahon ng rebolusyon, walang matatanda na namuno sa pag-agaw sa poder maliban kay Tandang Sora na nagkasya sa paggamot at pagluluto ng pagkain.

Nakahanda ang mga kabataan na ibuwis ang buhay para sa pagbabago ng Lipunan, magagawa ba iyan ng mga duwag na buwayang kumokontrol sa resulta ng halalan gamit ang kinukurakot na “campaign fund?”

---

Kung may reaksyon, sumbong o katanungan, sumulat sa ASINTADO ni Judith Sto. Domingo sa BULGAR Bldg., 538 Quezon Ave., Quezon City o mag-email sa asintado.bulgar@gmail.com.

PDEA, sa socmed lang daw nalaman ang tangkang pagpupuslit ng tone-toneladang droga, jusko po!

ni Ka Ambo @Bistado | October 12, 2026

Usap-usapan ang tone-toneladang shabu na tinangkang ipuslit papasok sa Maynila. Hindi motorsiklo, hindi dyip, hindi trak at hindi container van ang gamit, bagkus ay barko mula sa Thailand at jet mula sa Laos.

Sosyal, hindi bagahe sa eroplano—isang charter jet!

----$$$--

Ayon sa PDEA, nalaman lang daw nila sa “news at social media” at wala silang detalye.

Jusko po! Ngayon lamang ba ipinanganak ang mga Pinoy?

Malinaw na nawalan na ng kredibilidad ang mismong PDEA, dahil sa kaduda-dudang pahayag sa media at kawalan ng aksiyon.

-----$$$--

Magkakambal na aksyon ang isinampal sa ICC kapwa ng US at Russia.

May financial sanctions ang US laban sa  ICC.

May hatol at may warrant of arrest mula sa Russia ang matataas na opisyal ng ICC.

Tulad ni Sen. Bato, kailangang magtago ang mga ICC officials dahil puwede silang maaresto ng mga kaalyado ng Russia.

----$$$--

NAKABABAD pa rin sa eksena si Sen. Ping Lacson.

Ngayon, saan naman kaya siya patungo?

-----$$$--

MARAMI ang nanghihinayang kay Lacson.

Imbes na magkaroon ng disposisyon tulad ng sa pinakamagagaling na senador, hindi siya maaaring ihanay sa mga ito, kahit magretiro, nawawalan siya ng direksiyon.

-----$$$--

GUMIMIK pa siya na tumanggi siya sa pork barrel o hindi siya pabor.

Pero, hindi kinagat ng publiko, dahil hindi naman niya nai-expose at kinalaban ang kapwa niya senador na inaakusahan ng bilyones na pork barrel.

----$$$--

HIGIT  sa pork barrel, ang kabulastugan ngayon, mismo ang annual budget ang nilantakan ng mga loko.

Nasaan si Lacson habang pinagpipiyestahan ang annual budget sa mga nagdaang administrasyon?

-----$$$--

HINDI natin alam kung ano ang agenda ng kanyang mga expose.

Pinakahuli ay nang magpalabas si Lacson ng video ukol sa ginagawang inspeksyon ng Ombudsman, PRA, LRA at DPWH sa sinasabing ilegal na reclamation. 

-----$$$--

IKINABIT niya agad ang “impunity” sa Taguig City, gayung hindi pa tapos ang imbestigasyon.

Eh, baket may hatol na?

----$$$-

LUMILITAW ngayon na may evidentiary gap o kulang-kulang na ebidensya si Ping. 

Malinaw ang pahayag ng lungsod: hindi sa kanila ang lupang nasa video, wala silang inilabas na permit sa mga sinasabing pribadong indibidwal, at hindi nila pagmamay-ari ang aktibidad. 

------$$$--

DAPAT manindigan ang lahat: “The fight against corruption must always be a fight for truth, not a contest of accusations.” 

Dapat lang na tandaan ito ni Lacson. 

Siya mismo ay ilang beses nang nabaha ng mabibigat na akusasyon sa nagdaang panahon.

-----$$$--

MAALALA sana ni Lacson nang tabunan siya ng kaliwa’t kanang akusasyon hanggang sa maging pugante siya.

Inakusahan siya sa “Kuratong Baleleng,” Dacer-Corbito murder case at maging ang pagiging miyembro niya ng MISG sa panahon ng matandang Marcos.

-----$$$--

MABIBIGAT ang akusasyon kay Lacson, pero binigyan siya ng due process at napatunayang wala siyang kasalanan.

Pero, sa gitna ng proseso, inilalarawan siyang “guilty,” kahit tuluyan siyang maabsuwelto.

-----$$$---

SA totoo lang, tulad sa iba pang opisyal ng gobyerno, pinagdududahan din ang datos sa kanyang SALN.

Siyempre, tulad din ng katwiran ng iba, nagmula sa lehitimong income ang halaga nito, hiwalay sa kanyang suweldo.

-----$$$--

SA hukuman, mas malinaw ang proseso.

Lulutang dito ang espesipikong transaksyon: sinu-sino ang nagbenta at bumili, magkano, petsa  at anong bangko, iyan ang pagbabayaran ng huwes!

----$$$--

SA totoong laban sa korupsiyon, walang sacred cow, hindi si Cayetano, hindi ang Taguig, at lalong hindi si Ping Lacson.

Mulat na ang taumbayan, sila ang huhusga!

---

Kung may reaksyon, sumbong o katanungan, sumulat sa ASINTADO ni Judith Sto. Domingo sa BULGAR Bldg., 538 Quezon Ave., Quezon City o mag-email sa asintado.bulgar@gmail.com.