Popularidad ni Alex Eala, pang-instant senador

ni Ka Ambo @Bistado | September 2, 2026

Tumigil na ulan.

Pero ang batikusan hindi pa.

--$$$---

Sumasakay ang lahat sa popularidad ni Alex Eala.

Puwede na siyang maging instant senador.

--$$$---

Biglang nawala sa Eat Bulaga si Bimby Aquino.

Baka nakipag-Taguan-Pung.

---$$$---

Nasapawan ng baha ang Impeachment Court.

Nalunod ang mga isyu.

---$$$--

Mayroon palang nagaganap na “steel war” sa Pilipinas.

Hindi pala ito away ng Pilipinas versus China.

Bagkus ay maniobra lamang ng mga dambuhalang negosyante.

-----$$$--

Kumakampi raw kasi sa iisang panig ang ilang opisyal ng pamahalaan o awtoridad.

Dapat ay maging patas sila—sa “galawan” sa industriya.

Iyan mismo ang sagwil sa kaunlaran.

Lalayas at mandidiri sa Pilipinas ang mga  foreign investor kapag ganyan.

-----$$$--

Sinasabing may matinding banggaan ng dalawang grupo: ang Philippine Iron and Steel Institute (PISI); at ang Philippine Induction Smelting Industry Association (PISIA).

ANG “PISI” ay kasama ang dambuhalang SteelAsia.

Ang “PISIA” naman ay binubuo ng kontrobersiyal ngayong Davao Mighty Steel, Phil Sanjia, Chuangxing, Keim Hing, Lian Sheng, Melters Steel, Metrodragon, Phil. Koktai, South Luzon Steel, at Wan Chiong.

----$$$--

NOON pang 2018 pa nang hilingin ng PISI sa gobyerno na ipagbawal ang paggawa ng bakal gamit ang induction furnace.

Isang proseso ng pagtunaw ng lumang bakal gamit ang electromagnetic induction sa halip na ang nakasanayang electric arc.

----$$$--

PERO  noong panahong iyon, nagpasya ang Department of Trade and Industry (DTI) na huwag itong i-ban, basta sumusunod ang mga produkto sa tamang pamantayan o Philippine National Standards (PNS). 

Dahil dito, nagpatuloy nang legal ang operasyon ng mga plantang gumagamit ng nasabing sistema.

----$$$--

KINUKUWESTIYUN ngayon ang pagsawsaw ng DND na nagpapasalimuot sa sitwasyon.

Nasasapawan tuloy ang tunay na isyu –-ang “matinding kumpetensiyahan” sa industriya ng bakal.

----$$$--

SUMASALIMUOT dahil dinakip sa isinagawang raid ang 69 na banyagang manggagawa sa akusasyong may kinalaman sa ilegal na operasyon at iba pang paratang, at sapilitang ipinasara ang planta.

Pero inutos ng Department of Justice (DOJ) na palayain ang lahat ng mga naarestong empleyado dahil sa kawalan ng sapat na ebidensiya.

----$$$--

KAHIT nakalaya na ang mga naaresto, nanatiling sarado ang operasyon ng Sanjia.

Nawalan ng trabaho ang mga obrero.

----$$$--

SA kabilang panig, ang kakumpitensiyang Keim Hing Steel sa parehong lalawigan ay ininspeksiyon lamang ng mga tauhan ng lokal na pamahalaan at environmental officers.

At natuklasang sumusunod naman sila sa batas.

Ganun lang kasimple ang sitwasyon.

-----$$$--

DAPAT nang silipin ng Philippine Competition Commission (PCC) ang sitwasyon para malaman kung may nilabag na batas sa merkado.

Kung may lumalabag sa batas o nagbebenta ng substandard, parusahan nang patas anuman ang pangalan ng kumpanya.

---

Kung may reaksyon, sumbong o katanungan, sumulat sa ASINTADO ni Judith Sto. Domingo sa BULGAR Bldg., 538 Quezon Ave., Quezon City o mag-email sa asintado.bulgar@gmail.com.

Taumbayan, umay na sa impeachment trial ni VP Sara

ni Ka Ambo @Bistado | September 1, 2026

Wala nang interest ang taumbayan sa impeachment trial laban kay VP Sara.

Mistulang propaganda kontra-propaganda ang mga lumalabas na impormasyon.

-----$$$--

HINDI lang ang ordinaryong Pinoy ang biktima, bagkus ay ang mismong mainstream at social media players.

Nagagamit ang media at socmed sa “dispalinghadong konteksto.”

-----$$$--

HIGIT sa 50% ng oras, espasyo, resources at enerhiya ay nilalamon ng “konteksto” na iniayos pabor sa magkakasalungat na panig.

Hindi totoo at kaduda-duda ang opinyon at impormasyon.

-----$$$--

PAANO ka magtitiwala sa isang hukuman na ang akusado at mga huwes ay pawang inaakusahan ng garapalang korupsiyon o pandarambong?

Sa ibang bansa, sa ilalim ng parliamentary form of government, biglaang binubuwag ang kabuuan ng parliyamento at sabay-sabay na nagbibitiw ang mga inaakusahan.

----$$$--

SA Pilipinas, sobrang kapal ng mukha ng mga pulitiko—halos lahat ay naglilinis-linisan.

Pero ang katotohanan, silang lahat ay halos itim ang bituka at halang ang kaluluwa.

-----$$$--

KAHIT mahatulan si VP Sara ng pagkatanggal—ang Kongreso ay ilalarawan pa rin bilang pugad ng mga pusakal na buwaya.

Iyan mismo ang matatanim sa mata at kaisipan ng mga kabataan.

----$$$--

WALANG konsensya ang mga pulitiko sa Pilipinas.

Dahil halos negatibo ang impresyon sa mga mambabatas—‘yan na rin ang impresyon sa impeachment court—hindi sila kapani-paniwala!

----$$$--

HABANG pinupukol nila ng putik at sinasabuyan ng burak ng alegasyon si VP Sara, nananatili itong popular sa mayorya ng mga botante.

Kung ang impeachment process ay isang klase o anyo ng “political exercise”—malinaw na ito ay walang kabuluhan!

------$$$--

ANG ibig sabihin ng political process ay hindi merito ang iiral, bagkus ay aktuwal na pulitika.

Pulitika sa hanay ng mga mambabatas at pulitika sa hanay ng mga botante.

----$$$---

SA gitna ng walang patid na pagbaha at panganib sa pananakop ng AI sa buong mundo, ang Pilipinas ay mistulang entablado ng sinaunang “Moro-moro” at Komedya.

Habang pinanonood ang proseso—hagalpak ng tawa at bulyaw ang nakatutulig na maririnig sa lahat ng sulok.

---

Kung may reaksyon, sumbong o katanungan, sumulat sa ASINTADO ni Judith Sto. Domingo sa BULGAR Bldg., 538 Quezon Ave., Quezon City o mag-email sa asintado.bulgar@gmail.com.

Hindi kalikasan ang may sala, tao ang nagkakalat ng sakuna

ni Ka Ambo @Bistado | August 31, 2026

Laganap ang baha.

Epekto ito ng El Niño.

Sobrang init sa ibang bahagi ng mundo, at batay sa water cycle, ang tubig na hinigop mula sa maiinit na lugar ay naiipon bilang ulap. 

Ibinabagsak naman ito sa Pilipinas at karatig-bansa.

----$$$--

Kapos sa pagpapaliwanag ang mga awtoridad at maging ang media.

Normal palagi ang kalikasan—constant cycle ’yan.

----$$$--

Ang abnormal ay ang mga tao!

Halimbawa, ang disenyo ng bahay-kubo at maging ang sinaunang bahay-kastila ay elevated house.

----$$$--

IBIG sabihin, ang sinaunang sibilisasyon sa Pilipinas ay naka-adapt sa klima ng panahon—inihahanda nila ang “ground floor” bilang pahingahan at lugar ng kuwentuhan, imbes na tirahan.

Natutulog at nananahan ang mga sinaunang Pinoy sa “second floor” o elevated floor.

----$$$--

PERO, dahil ang edukasyon sa Pilipinas ay isinupalpal ng Westerners o mga taga-Europe at America, ang elevated house ay naging “bungalow.”

Single-floor na mas tipid.

Kapag bumaha, wala nang matitirhan.

----$$$--

ANG bahay-kastila tulad ng Bahay na Tisa sa Bigaa, Bulacan (ngayon ay Balagtas) ay isang elevated house din.

Ang ground floor nito ay hindi tinitirhan at ang disenyo ay nakapokus sa second floor—mga materyales-fuertes na muwebles.

----$$$--

ANG ground floor sa bahay-kubo at bahay-kastila ay tambayan o lugar ng tsismisan, pulong o pagtanggap sa mga estranghero.

Ang tawag d’yan ay “silong.”

----$$$--

MAGING ang matandang bahay ng mag-amang dating mayor ng Bigaa na sina Kasyo at Goying Atienza ay may “silong,” kung saan labas-at-pasok ang kanilang mga ayudante sa pulitika.

Tuwing kampanyahan sa eleksyon, ibubulong sa iyo ng kapitbahay, nakapasyal ka na ba sa “silong”?

Ibig sabihin, nakausap mo na ba si Mayor Atienza kung saan ang pag-uusap ay ginaganap sa “silong” o ground floor ng bahay-kastila?

----$$$--

ANG Maynila, Bulacan, Pampanga, Pasay, Parañaque, Las Piñas at Bacoor ay nasa dalampasigan ng Manila Bay.

Ang malaking bahagi nito ay tubigan, palaisdaan o tirahan ng mga isda, ibon at iba pang hayop—hindi ito tirahan ng mga tao!

----$$$--

MATAGAL nang lumulubog ang malalapit sa dalampasigan, pero tinambakan ito ng lupa o na-reclaim para tayuan ng mga bahay at gusali.

Ang tawag d’yan ay kangkugan, latian o marshland.

----$$$--

ANG dalampasigan sa Pampanga, Bulacan, Malabon, Navotas, Maynila, Parañaque at Pasay ay mga taniman ng bakawan, nipa plants, tambo—tubigan.

Matagal nang lubog sa tubig ang mga lugar na iyan. Meaning, ’yan ang normal.

----$$$--

Dahil abnormal o may saltik o bopol ang mga tao, tinambakan at tinirahan ang mga dating tubigan.

Ang elevated house ay ginawang bungalow.

Isang kawalang-muwang, katangahan at kawalanghiyaan ng mga tao ang kanilang nararanasan.

----$$$--

Inuulit natin—palaging normal ang kalikasan!

Ang tao ang hindi normal!

---

Kung may reaksyon, sumbong o katanungan, sumulat sa ASINTADO ni Judith Sto. Domingo sa BULGAR Bldg., 538 Quezon Ave., Quezon City o mag-email sa asintado.bulgar@gmail.com.