Walang "K" humingi ng sustento sa nakabuntis kapag hindi kasal

ni Atty. Persida Rueda-Acosta - @Magtanong Kay Attorney | September 25, 2021

Dear Chief Acosta,

Kasalukuyan akong nagdadalang-tao at ang ama nito ay ang aking dating kinakasama. Bigla na lamang siyang nakipaghiwalay sa akin noong nakaraang buwan. Sa ngayon ay wala akong trabaho at hirap na hirap na tustusan ang aking mga check-up at gamot. Nais ko lamang malaman kung mayroon ba akong karapatang humingi ng suporta sa aking dating kinakasama para sa akin at sa aming magiging anak kahit hindi kami kasal? – Marie

Dear Marie,

Para sa inyong kaalaman, walang obligasyon ang inyong dating kinakasama na kayo ay bigyang-suporta sapagkat kayo ay hindi kasal sa kanya. Ayon sa Article 195 ng Family Code of the Philippines, ang mga sumusunod lamang ang mayroong obligasyon na suportahan ang isa’t isa:

“Art. 195. Subject to the provisions of the succeeding articles, the following are obliged to support each other to the whole extent set forth in the preceding article:

(1) The spouses;

(2) Legitimate ascendants and descendants;

(3) Parents and their legitimate children and the legitimate and illegitimate children of the latter;

(4) Parents and their illegitimate children and the legitimate and illegitimate children of the latter; and

(5) Legitimate brothers and sisters, whether of full or half- blood. (Binigyang-diin)”

Tungkol naman sa karapatan sa suporta ng inyong ipinagbubuntis na anak, sapagkat siya ay hindi pa ipinapanganak, siya ay wala pang tinatawag na “legal personality.” Ayon sa Article 40 ng Family Code of the Philippines:

“Art. 40. Birth determines personality; but the conceived child shall be considered born for all purposes that are favorable to it, provided it be born later with the conditions specified in the following article.

Art. 41. For civil purposes, the fetus is considered born if it is alive at the time it is completely delivered from the mother's womb. However, if the fetus had an intra-uterine life of less than seven months, it is not deemed born if it dies within twenty-four hours after its complete delivery from the maternal womb.”

Samakatwid, sapagkat ang inyong ipinagbubuntis ay wala pang legal personality, siya ay wala pang karapatan upang humingi ng suporta sa kanyang ama. Ito ay magbabago lamang sa oras na siya ay maipanganak na alinsunod sa mga nabanggit na batayan sa itaas.

Nawa ay nasagot namin ang inyong mga katanungan. Nais naming ipaalala sa inyo na ang opinyon na ito ay nakabase sa inyong mga naisalaysay sa inyong liham at sa pagkakaintindi namin dito. Maaaring maiba ang opinyon kung mayroong karagdagang impormasyon na ibibigay. Mas mainam kung personal kayong sasangguni sa isang abogado.

Maraming salamat sa inyong patuloy na pagtitiwala.