Walang bisang donasyon

ni Atty. Persida Rueda-Acosta @Magtanong Kay Attorney | January 15, 2026

Dear Chief Acosta,

Maaari bang magbigay ng donasyon ang taong may asawa na sa kanyang bagong karelasyon? – Farr

---

Dear Farr,

Una sa lahat, ang donasyon (donation) ay isang kasunduan sa pagitan ng donor at donee kung saan ibinibigay ng donor nang walang bayad o kapalit ang kanyang ari-arian o karapatan sa isang bagay sa donee na tumatanggap nito. Dahil ito ay kasunduan, kinakailangan ang mga sumusunod: (1) consent of the contracting parties o pahintulot ng mga partido; (2) object certain o tumutukoy sa tiyak na bagay/ari-arian; at (3) cause of the obligation o dahilan ng obligasyon, alinsunod sa Article 1318 ng New Civil Code (NCC).

Sa kabilang banda, malinaw na nakasaad sa NCC na walang-bisa ang donasyon na nagmumula sa illicit relationships o relasyong labag sa batas:

“Art. 739. The following donations shall be void:

(1) Those made between persons who were guilty of adultery or concubinage at the time of the donation; 

In the case referred to in No. 1, the action for declaration of nullity may be brought by the spouse of the donor or donee; and the guilt of the donor and donee may be proved by preponderance of evidence in the same action.”

Kaugnay nito, sa kasong The Insular Life Assurance Company, Ltd. vs. Carponia T. Ebrado and Pascuala Vda. De Ebrado, G.R. No. L-44059, 28 Oktubre 1977, sa panulat ni Honorable Associate Justice Ruperto G. Martin, ipinaliwanag ng ating Korte Suprema ang katwiran sa patakaran na pinagbabatayan ng nasabing probisyon. Pinagbabawalan ang taong nasa relasyong labag sa batas na tumanggap ng mga donasyon mula sa isa’t isa dahil nilalayon ng ating batas na protektahan ang mga karapatan ng lehitimong pamilya:

“Policy considerations and dictates of morality rightly justify the institution of a barrier between common-law spouses in regard to property relations since such relationship ultimately encroaches upon the nuptial and filial rights of the legitimate family. There is every reason to hold that the bar in donations between legitimate spouses and those between illegitimate ones should be enforced in life insurance policies since the same are based on similar consideration. As above pointed out, a beneficiary in a life insurance policy is no different from a donee. Both are recipients of pure beneficence. So long as marriage remains the threshold of family laws, reason and morality dictate that the impediments imposed upon married couple should likewise be imposed upon extra-marital relationship. If legitimate relationship is circumscribed by these legal disabilities, with more reason should an illicit relationship be restricted by these disabilities.”

Samakatuwid, hindi maaaring magkaroon ng donasyon ng ari-arian sa pagitan ng dalawang taong nasa ilegal na relasyon. 

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay.

Maraming salamat sa iyong patuloy na pagtitiwala.