Nanalo sa kasong illegal dismissal, may backwages ba?

ni PAO Chief Persida Rueda-Acosta @Magtanong Kay Attorney | August 21, 2026

Dear Chief Acosta,

May nagsabi po sa akin na kung magsasampa ako ng kasong illegal dismissal, kahit manalo pa ako ay maaaring matagalan bago magkaroon ng pinal na desisyon. Maaari pa rin diumano akong hindi makatanggap ng backwages. Totoo po ba ito? Kailan po maaaring hindi ipagkaloob ang backwages? — Keano

---

Dear Keano, 

Ang sagot sa iyong katanungan ay matatagpuan sa ating mga batas paggawa at sa mga pasya ng Korte Suprema.

Sa ilalim ng Article 294 ng Labor Code of the Philippines, ang isang empleyadong tinanggal nang walang makatarungan o legal na dahilan ay may karapatan sa pagbabalik sa dating tungkulin (reinstatement) at full backwages. Nakasaad sa nasabing probisyon:

“An employee who is unjustly dismissed from work shall be entitled to reinstatement without loss of seniority rights and other privileges and to his full backwages, inclusive of allowances, and to his other benefits or their monetary equivalent computed from the time his compensation was withheld from him up to the time of his actual reinstatement.”

Hinggil sa nabanggit, full backwages ang pangkalahatang tuntunin kapag napatunayang ilegal ang pagtanggal. Saklaw nito ang sahod, allowances, at iba pang benepisyo o ang katumbas na halaga ng mga ito na dapat sana ay natanggap ng empleyado kung hindi siya ilegal na tinanggal.

Sa kasong Holcim Inc. vs. Obra (G.R. No. 220998, August 8, 2016), sa panulat ni Honorable Associate Justice Estela M. Perlas-Bernabe, sinabi ng Korte Suprema:

“As a general rule, an illegally dismissed employee is entitled to: (a) reinstatement (or separation pay, if reinstatement is not viable); and (b) payment of full backwages.”

Samakatuwid, kung mapatutunayang ilegal ang pagtanggal, karaniwang may karapatan ang empleyado sa reinstatement o separation pay kung hindi na praktikal ang pagbabalik sa trabaho, at sa full backwages. Bilang tuntunin, kinukuwenta ito mula nang ipagkait ang kanyang sahod hanggang sa aktuwal na reinstatement. Kung separation pay ang ipagkakaloob sa halip na reinstatement, karaniwang kinukuwenta ang backwages hanggang sa maging pinal ang desisyon.

Gayunman, kinikilala ng jurisprudence ang limitadong pagkakataon kung saan maaaring iutos ang reinstatement nang walang backwages. Ipinaliwanag din sa Holcim case ang sumusunod:

“In certain cases, however, the Court has ordered the reinstatement of the employee without backwages[,] considering the fact that: (1) the dismissal of the employee would be too harsh a penalty; and (2) the employer was in good faith in terminating the employee.” 

Ibig sabihin, maaaring hindi ipagkaloob ang backwages kung napatunayang may nagawang paglabag (infraction) ang empleyado, ngunit ang dismissal ay masyadong mabigat na kaparusahan para rito. Kailangan ding mapatunayan na kumilos nang may good faith ang employer nang ipataw nito ang dismissal.

Sa ganitong sitwasyon, ang pagkawala ng backwages ang nagsisilbing kaparusahan sa napatunayang pagkakamali ng empleyado, sa halip na tuluyan siyang tanggalin sa trabaho. Sa kasong Coca-Cola FEMSA Philippines, Inc. vs. Alpuerto (G.R. No. 226089, March 4, 2020), sa panulat ni Honorable Associate Justice Jose Calayag Reyes Jr., nilinaw ng Korte Suprema:

“However, it must be emphasized that under the parameters set forth in Integrated Microelectronics, the denial of backwages was deemed to be the penalty sufficient for the infraction committed by the employee instead of dismissal from employment.” 

Samakatuwid, hindi sapat na sabihin lamang ng employer na kumilos ito nang may good faith upang mawala ang backwages. Kailangang may napatunayang pagkakamali ang empleyado at ang pagtanggal ng backwages ang itinuring na angkop na kaparusahan sa halip na dismissal.

Sa kabuuan, maaaring hindi tama ang sinabi sa iyo na kahit manalo sa kasong illegal dismissal ay wala ka nang matatanggap na backwages, lalo na kung matagal ang naging pagdinig sa kaso. Ang full backwages ang pangkalahatang tuntunin. Ang hindi pagbibigay nito ay isang limitadong eksepsyon lamang kung may napatunayang paglabag ang empleyado, masyadong mabigat ang parusang dismissal, at kumilos nang may good faith ang employer.

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay. 

Maraming salamat sa iyong patuloy na pagtitiwala.

Bentahan sa ilalim ng SPA matapos pumanaw ang principal

ni PAO Chief Persida Rueda-Acosta @Magtanong Kay Attorney | August 20, 2026

Dear Chief Acosta,

Itinalaga ako ng kaibigan ko bilang kanyang ahente sa pamamagitan ng isang special power of attorney (SPA) na nagpapahintulot sa aking ibenta ang kanyang lupa. Pagkalipas ng isang linggo, naibenta ko ang lote. Subalit, hindi ko alam na biglang pumanaw ang kaibigan ko dalawang araw bago ang bentahan. May bisa ba ang bentahan kung isasaalang-alang na pumanaw ang kaibigan ko bago pa man ito maganap? — Joey Boy

---

Dear Joey Boy,

Ayon sa Articles 1868 at 1919 ng New Civil Code, “[b]y the contract of agency, a person binds himself to render some service or to do something in representation or on behalf of another, with the consent or authority of the latter and as a general rule, the death of the principal extinguishes the contract of agency. Nevertheless, the transactions made by an agent after the death of the principal may be considered valid subject to certain conditions set forth in Article 1931 of the New Civil Code.”

Ayon naman sa Article 1931 ng parehong batas, “[a]nything done by the agent, without knowledge of the death of the principal or of any other cause which extinguishes the agency, is valid and shall be fully effective with respect to third persons who may have contracted with him in good faith.”

Ibig sabihin, bagama’t karaniwang nagwawakas ang kapangyarihan ng isang ahente kapag pumanaw na ang kanyang principal, maaaring manatiling may bisa at epektibo ang transaksyong ginawa ng ahente kung wala siyang kaalaman sa pagpanaw ng kanyang principal, basta't ang ikatlong taong nakipagtransaksyon sa kanya ay nakipagkasundo nang may good faith.

Tinalakay ng Korte Suprema ang probisyon ng Article 1931 sa isa sa mga nadesisyunan nitong kaso, kung saan sinabi na: “Under this provision, an act done by the agent after the death of his principal is valid and effective only under two conditions, viz: (1) that the agent acted without knowledge of the death of the principal and (2) that the third person who contracted with the agent himself acted in good faith. Good faith here means that the third person was not aware of the death of the principal at the time he contracted with said agent. These two requisites must concur the absence of one will render the act of the agent invalid and unenforceable.” (Ramon Rallos vs. Felix GoChan, G.R. No. L-24332 January 31, 1978, Honorable Associate Justice Cecilia Muñoz-Palma)

Samakatuwid, maaaring ituring na may bisa ang pagbebenta mo ng lupa ng iyong kaibigan kahit pa naganap ito matapos siyang pumanaw, basta't kumilos ka nang walang kaalaman sa kanyang pagkamatay at ang bumili ay maituturing na in good faith. Ibig sabihin nito, wala rin dapat kaalaman ang bumili sa pagpanaw ng iyong kaibigan sa oras ng bentahan.

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay.

Maraming salamat sa iyong patuloy na pagtitiwala.

Pagkakaiba ng contract of sale at contract to sell

ni PAO Chief Persida Rueda-Acosta @Magtanong Kay Attorney | August 19, 2026

Dear Chief Acosta,

Kaming mag-asawa ay kasalukuyang naghahanap ng mabibili na lupa at sa aming pakikipag-usap sa mga nagbebenta ng lupa ay madalas na nababanggit ang contract of sale at kung minsan naman ay contract to sell. Ano ba ang pinagkaiba ng mga ito?

— Allan

---

Dear Allan,

Nakasaad sa Artikulo 1458 ng New Civil Code of the Philippines ang mga sumusunod: 

“Art. 1458. By the contract of sale, one of the contracting parties obligates himself to transfer the ownership of and to deliver a determinate thing, and the other to pay therefore a price certain in money or its equivalent. A contract of sale may be absolute or conditional.''

Ang contract to sell sa kabilang banda ay hindi tulad ng isang contract of sale. Ito ang ipinaliwanag ng Kataas-taasang Hukuman sa kaso na Raquel Estipona, et al. vs. Estate of Anacleto Aquino, et al. (G.R. No. 207407, September 29, 2021, Ponente: Honorable Associate Justice Alfredo Benjamin Caguioa): 

“A contract to sell may thus be defined as a bilateral contract whereby the prospective seller, while expressly reserving the ownership of the subject property despite delivery thereof to the prospective buyer, binds himself to sell the said property exclusively to the prospective buyer upon fulfillment of the condition agreed upon, that is, full payment of the purchase price.

A contract to sell as defined hereinabove, may not even be considered as a conditional contract of sale where the seller may likewise reserve title to the property subject of the sale until the fulfillment of a suspensive condition, because in a conditional contract of sale, the first element of consent is present, although it is conditioned upon the happening of a contingent event which may or may not occur.”

Sang-ayon sa nabanggit, ang malinaw na pagkakaiba ng dalawa ay ang obligasyon na nalilikha ng mga nasabing kasunduan. Sa contract of sale ang dalawang partido ay nagkasundo upang isalin ang pagmamay-ari ng isang bagay kapalit ng kabayaran ng halaga nito. Habang sa contract to sell naman, ang isang partido ay mayroong obligasyon na ekslusibong ibenta ang isang bagay sa kabilang partido makaraan na matupad ang kondisyon hinggil dito na kadalasan ay ang pagbabayad ng halaga nito. Wala pang obligasyon na magsalin ng pagmamay-ari ang nagbebenta at kailangan pa na panibagong kontrata para rito matapos mabayaran ang halaga ng bagay na binili.

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay.

Maraming salamat sa iyong patuloy na pagtitiwala.