Uwian kasi at 'di locked-in shooting… MGA ARTISTA AT STAFF NG MOVIE, PASAWAY SA HEALTH PROTOCOL,

NAGKAHAWAHAN NG COVID

ni Reggee Bonoan - @Sheet Matters | March 23, 2021

BLIND ITEM:

Kaya naman pala nagkahawa-hawa ang mga staff at ilang artistang kasama sa pelikulang natapos nang i-shoot ay dahil hindi sila sumusunod sa health protocols tulad ng locked-in shootings.

Uwian daw kasi ang lahat pagkatapos ng shooting, pero may service naman na maghahatid sa kani-kanilang bahay at ‘yung may sariling sasakyan ay kani-kanyang uwi na.

“Ang kaso, hindi namo-monitor kung may iba pang pinupuntahan ang staff pagkahatid sa bahay nila at gayun din ang mga artista na kani-kanyang alis ng location,” kuwento ng aming source na may alagang artista sa pelikula.

Dagdag pa, “Na-delay nga ang shoot kasi may nag-positive, so, quarantine lahat, kaya nahinto ang shooting.”

Nabanggit sa amin na walang hotel na puwedeng pag-stay-an ng buong staff at artista sa location kaya hindi sila locked-in.

Ang isa sa mga staff ng pelikula ay dalawang beses nang nag-positive sa COVID-19 testing at awa ng Diyos ay gumagaling naman.

Kilala ang direktor ng pelikula, pero ang mga bida ay bilang lang ang kilala dahil karamihan ay baguhan.