ni Erlinda Rapadas @Teka Nga | November 3, 2026
Photo: IG _itskylinealcantara
Mahigit isang taon na mula nang maghiwalay sina Kyline Alcantara at Kobe Paras. Hindi na rin sila nagkaroon ng komunikasyon sa isa’t isa. Bigla na lang naglaho si Kobe nang hindi nagpaparamdam o nagpapaliwanag.
Naiwan si Kyline na hindi alam kung bakit nauwi sa paghihiwalay ang dati nilang masayang relasyon.
Mula noon ay hindi na nag-entertain ng mga bagong manliligaw ang aktres at nanatiling single. Pag-amin niya, sobra siyang nasaktan nang mag-break sila ni Kobe. Minahal niya nang todo ang basketbolista at hindi niya inakalang maghihiwalay sila.
Ganunpaman, pinilit niyang mag-move on at ituon ang pansin sa kanyang showbiz career.
Sa tulong ng mga kaibigang artista tulad ni Barbie Forteza, at pagiging abala sa mga projects sa GMA-7 tulad ng Taskforce Firewall ay unti-unti siyang nakabawi sa kabiguan sa pag-ibig.
Wala sa plano niya ngayon ang pagkakaroon ng bagong karelasyon. Alam niyang darating iyon kapag handa na siyang muling umibig.
Partner ang DOT…
ALDEN, MAY BAGONG ADVOCACY PARA SA MGA KAPWA BIKERS
MAY bagong advocacy ngayon si Alden Richards at magiging partner niya rito ang Department of Tourism (DOT).
Isusulong niya ang road safety para sa mga bikers at cyclists sa pamamagitan ng Fun Ride PH, na layuning itaguyod ang ligtas na pagbibisikleta.
Sa launching ay iikot ang mga siklista mula Luneta hanggang sa paligid ng Intramuros.
Nangako naman ng suporta sa Fun Ride PH ang pamunuan ng DOT.
Naging bahagi na ng buhay ni Alden ang pagbibisikleta tuwing may libre siyang oras. Hindi lamang ito nakatutulong upang mapanatili ang kanyang malusog na pangangatawan kundi maging sa healing ng kanyang mental health.
Kaya nagpapasalamat siya sa DOT sa kanilang partnership para sa Fun Ride PH, na layuning magkaroon ng ligtas na lugar para sa mga siklista.
Aktres, volunteer sa kampanya niya noon… SEN. BAM, NAGPA-BLOCK SCREENING NG MOVIE NINA BEA AT WILBERT
LABIS na nagpapasalamat si Bea Binene kay Sen. Bam Aquino sa suportang ibinigay nito sa pelikulang Pee Mak (Philippine adaptation) na kanyang pinagbibidahan kasama si Wilbert Ross.
Nagpa-block screening si Sen. Bam upang mas maraming makapanood ng nasabing pelikula. Hindi man siya nakarating sa premiere night dahil sa kanyang busy schedule, bumawi naman siya sa pamamagitan ng block screening.
Malapit si Bea kay Sen. Bam dahil madalas siyang mag-volunteer sa mga projects nito. Noong nag-file ng candidacy ang senador, isa ang aktres sa mga sumama at sumuporta sa kanya.
Bukod sa pag-arte, isa sa mga pangarap ngayon ni Bea ay maging isang reporter o newscaster.
