Dumalaw lang, umandar ang pagka-OC… SHARON, NAKIALAM SA OPISINA NI SEN. KIKO, MUNTIK MAKABASAG

ni Reggee Bonoan @Sheet Matters | October 19, 2026

Photo: IG _reallysharoncuneta

Umandar ang pagka-OC (obsessive-compulsive disorder) ng Megastar na si Sharon Cuneta dahil nang dumalaw siya sa opisina ng asawang si Sen. Francis ‘Kiko’ Pangilinan sa Senado ay napansin niyang tabingi ang picture frame ng senador na nakasabit sa pader kasama ang iba pa.

Pinilit ni Sharon na abutin ang picture frame para isaayos, pero natanggal ito sa pagkakasabit. 

Mabuti na lang at nasalo niya at ng staff ni Sen. Kiko, or else, basag ang salamin nito. 

Ang nasabing staff na ang nag-ayos ng pagkakasabit. 

Makikita rin sa video na inilalarawan ni Sharon na bothered siya nang makitang tabingi ang picture frame.

---

Lagi namang magkasama…

MALE CELEB, TODO-DISPLEY SA AKTRES PERO ‘DI MAAMING DYOWA, EX-GF, MAY BAGO NA KASING KA-DATE

BLIND ITEM 1:

Nagtataka ang katsikahan naming kaibigan ng kilalang male personality kung bakit hindi nito inaaming girlfriend na niya ang aktres gayung parati naman silang nakikitang magkasama sa mga showbiz events.

At kahit walang kinalaman sa showbiz ay nagkikita rin ang aktres at kilalang male personality, kaya ano ang dahilan kung bakit hindi ito maamin ng huli?

“Ewan ko sa dalawang ‘yan, wala namang sasagasaang tao if ever na aminin nila. Mas pangit pang tingnan na laging magkasama, tapos ‘di magdyowa. Ano ‘yun, fubu (fuck buddy)?” seryosong sabi ng kausap namin.

Mayroon naman kasing ganoon talaga na laging magkasama sa lahat ng okasyon pero magkaibigan lang.

“So, display lang si ateng (actress)? Bakit need ni (male personality) ng pang-display? Para masabing may dyowa? Kasi ‘yung ex (girlfriend), may idine-date na? Aysus, ego na naman ba ‘to?” katwiran ng aming source.

Sa kasalukuyan ay maraming projects ang aktres dahil bukod sa maganda ito at may personalidad ay marunong siyang umarte, kaya itinuturing siyang isa sa prime talents ng network na pinaglilingkuran niya.

Si male personality ay abala naman sa kanyang itinayong negosyo, at sitsit sa amin ng aming source ay kapos ngayon sa pinansiyal dahil sumabit ito sa isang transaksiyon na malaki ang nawala sa kanya.

---

TF NG MGA ARTISTA NG NETWORK, ‘DI BUO ANG BAYAD, WAITING PA SA MGA ADVERTISERS

BLIND ITEM 2:

TRULILI kaya na kaya naka-indefinite leave ngayon ang kilalang bossing ng network ay dahil hindi nito kinakaya ang stress ng kumpanya?

Sa kanya kasi ipinamahala ng big boss ang kumpanya simula nang tanggalin ang dating boss dahil sa mga palpak na desisyon nito na ikinalugi nang malaki at lahat ng projects ay hindi bumalik ang puhunan.

Nang tanggalin ang dating boss ay binago na rin ang structure ng kumpanya para hindi na kung sinu-sino ang kakausapin, kaya nagkasundo naman ang lahat.

“Eh, ‘di pa pala tapos ang problema. Maraming nadiskubre, baon sa utang, naubos ang pondong bilyones, ayaw nang maglabas ni (big boss), kung ano’ng meron, pagkasyahin at paikutin,” tsika ng aming source.

May mga artista raw ang network na hindi nabayaran nang buo dahil malalaki ang talent fees (TF) nila at hinahati raw. Ang inuunang bayaran ay ang gastos sa production para may maipalabas.

Natigil nga raw ang shooting ng ilang programa ng network dahil sa kakulangan ng budget, pero kapag nakasingil naman daw sa mga advertisers ay nagbabayad ang network.

“‘Di lang naman ang (network) ang may sablay, pati rin naman ang (dalawang network), ganyan din, mahina talaga ngayon, itinatawid lang,” sabi pa.

Ang mataas daw magbayad ngayon ay ang mga streaming platforms, kaya karamihan sa mga isinu-shoot ngayong shows at pelikula ay doon na ibinebenta at saka ipapalabas sa network para mapanood ng publiko na hindi subscribers ng mga nasabing platforms.

Going back sa bossing na naka-indefinite leave, may tsikang mas gusto na lang daw nitong mag-early retirement pero mukhang hindi pabor ang big boss.

Tumanggap ng almost P500K… RIA MOVIE NINA NOUR HOOSHMAND AT SYLVIA, WAGI SA 31ST BUSAN INTERNATIONAL FILMFEST

ni Reggee Bonoan @Sheet Matters | October 18, 2026

Photo: RIa - Heart of EuroAsia Awards

Winner ang pelikulang Ria ng Heart of Eurasia Award sa katatapos na 31st Busan International Film Festival, na ginanap nitong October 15 sa Busan Cinema Center.

Kinilala ang Ria bilang natatanging pelikulang Asyano na itinampok sa seksiyong Vision ng festival, na nagbibigay-diin sa mga independent movies at sa umuusbong na cinema mula sa iba’t ibang rehiyon.

Ang Ria ay co-produced ng limang bansa tulad ng Pilipinas, Netherlands, Norway, Saudi Arabia at Japan. Ang kuwento ay tungkol sa buhay ni Ria na isang musikero ng folk-punk, na pinagbibidahan ni Nour Hooshmand. Humaharap siya sa mga hamon tulad ng sapilitang pagpapaalis sa komunidad, kahirapan, karahasang dulot ng estado at ang lumalalang kalusugan ng babaeng nagpalaki sa kanya, na ginampanan ni Sylvia Sanchez as Olga.

May gantimpalang natanggap ang Ria na nagkakahalaga ng 10 milyong South Korean won (humigit-kumulang $7,300 USD o P469,000) para sa pelikulang ito ni Arvin Belarmino.

Congratulations, Nathan Studios!

---

Ang BL o boy’s love movie na The Boy Foretold by the Stars (TBFBTS) na napanood noong 2020 Metro Manila Film Festival (MMFF), ay isa sa mga finalists ng first Puregold Teatro Panalo.

Mga baguhang artista ang bumida sa pelikulang isinulat at idinirek ni Dolly Dulu. Ito’y sina Keann Johnson as Luke at Adrian Lindayag bilang si Dominic.

Bagama’t panahon ito ng COVID-19 pandemic, maganda ang naging resulta nito sa box office, considering na ang mga kasabayan nito ay ang mga pelikulang Fan Girl, Magikland, Mang Kepweng: Ang Lihim ng Bandanang Itim, Pakboys Takusa, Tagpuan, Suarez: The Healing Priest, Coming Home, The Missing at Isa Pang Bahaghari.

Kaya ang saya-saya ng buong cast at Team Brianstormers ni Direk Dolly at Clever Minds nina Omar Sortijas at Derick Cabrido as producers.

Ayon sa direktor, nagsimula ang TBFBTS bilang play bago ito naging pelikula. Kaya nang mag-anunsiyo para sa 1st Puregold Teatro Panalo ay isinali na ito ni Direk Dolly, na masuwerteng napasama as finalist. May premyo siyang P100,000 at dahil siya ang magdidirek ay may panibagong P100,000 kaya sumatotal ay P200,000, sey ni Chris Cahilig, festival director ng CinePanalo Film Festival at publicist ng Puregold Teatro Panalo.

Sey ni Direk Dolly, “Actually, nagsimula ang Boy Foretold sa teatro at ‘tong play na ‘to ay original form of the movie, which I wrote noong college pa ako na ru’n talaga nagsimula.

“Recently kasi, ‘di ba, may surge ang mga film na ginagawang play, kaya naisip ko na baka it’s time na ibalik ‘yung film sa original form, which is ‘yung play, at sakto, nagkaroon ng Teatro Panalo at talagang hinalungkat ko ‘yung baul ko (matagal nang nakatago). At s’yempre, kinabahan ako kasi 26 years ago na ‘yung play, so inisip ko kung relevant pa rin ba.”

Walang pressure na nararamdaman ang direktor sa gagawing play ng TBFBTS.

“‘Di naman ako nape-pressure in that sense kasi nag-stage na ‘to sa Ateneo (University) nu’ng college kami at sobrang ganda ng reception. So feeling ko, ngayon ay mas nag-mature na ‘ko as director, nag-mature naman na ako sa life, kaya feeling ko, mas magagawa ko pa ng mas maganda o feeling ko, mas mapapabongga natin kasi s’yempre, wala pa kaming budget nu’ng theater play pa lang nu’ng college. So ngayon, with the support of Teatro Panalo, I’m sure it will level up,” esplika ni Direk Dolly.

Hindi rin dapat ikinukumpara sa pelikula ang TBFBTS.

“‘Wag i-compare sa movie kasi iba ‘yung pinag-uusapan at iba ‘yung form. Feeling ko, if you like or love the movie ay mae-enjoy mo rin ‘tong Teatro version kasi it’s the same but it’s different at iba rin ang kilig ‘pag napanood mo sila nang live,” diin nito.

Sa kasalukuyan ay wala pang naisip na gaganap si Direk Dolly dahil sina Keann at Adrian ay hindi na babagay sa karakter nilang high school students.

“‘Yung role ni Dominic ay for auditions po, at ‘yung Luke, ‘pag ‘di pumayag, magiging for auditions din. Sana umoo ‘yung iniisip namin.

“‘Yung Luke (by Kean Johnson), ngayon mayroon na akong naiisip na cast. ‘Yung Dominic, played by Adrian Lindayag, ang galing ni Adrian, kaso nasa States s’ya.

“Saka ang kailangan ngayon ay young kasi high school students, kaya ‘di na rin sina Keann at Adrian dahil tumanda na sila. Baka mahirap na ring ibalik. But I really thought about them, about it, but I think deserve na rin ng play ng different cast na ‘di pa nakakagawa nito, and I think, baka they will bring a different form of magic,” esplika ni Direk Dolly.

‘Di raw expected na papasok sa 8 movies… YASSI AT PEPE, NO SHOW SA MMFF ANNOUNCEMENT OF ENTRIES

ni Reggee Bonoan @Sheet Matters | October 14, 2026

Photo: IG _yassipressman & _jose_nikolas_emmanuel

Sure na masaya ang lahat sa 52nd Metro Manila Film Festival (MMFF) ngayong 2026 dahil tiyak na marami na ang makakapanood ng sine sa darating na Disyembre 25 dahil P299 na lang ang bayad kumpara sa dati na umaabot pa ng P500 sa mga sinehang may libreng popcorn at bottled water.

Ito ang muling ipinaalala ni Metropolitan Manila Development Authority (MMDA) Chairman Atty. Don Artes sa ginanap na announcement ng 2nd batch of official film entries sa MMFF 2026.

Aniya, “Nagkasundo kami ng Cinema Exhibitors Association of the Philippines na ang presyo ng tickets sa sinehan ay ‘di dapat lalagpas ng P299.

“Ito po ay during festival period lamang, at ‘yung P299 ay maximum. Puwede pang bumaba, lalo na sa mga probinsiya.”

Kaya optimistic kaming muling makita ang mga malls na may sinehan na marami uling nakapila para mapanood ang 8 entries.

Anyway, inihayag na rin ang apat sa second batch ng 8 entries sa ginanap na announcement ng MMFF Executive Committee nu’ng Lunes nang hapon. 

Ang A Perfect Marriage nina Kim Chiu at Paulo Avelino ay mula sa direksiyon ni Dan Villegas at produced ng Quantum Films at WASD Films na pag-aari ni Paulo.

Pasok ang Los Salvajes Bravos na pagbibidahan nina Romnick Sarmenta at Ruru Madrid, produced ng JesCom Films at idinirek ni Paolo Dy.

Unexpected naman para kay Benedict Mique, direktor at writer ng pelikulang Little Hope, na mapapasama ito kaya hindi raw sila dumalo sa nasabing event. Ang pelikula ay pagbibidahan nina Yassi Pressman, Pepe Herrera at ng batang si Cailey Magno. Produced ito ng Lonewolf Productions at ni Yassi mismo.

Malaking challenge kay Zaijian Jaranilla bilang bida sa Seeds of Peace: The Life of Fr. Rhoel D. Gallardo, CMF dahil sa kanya nakatutok ang kuwento. Kasama niya ang indie actresses na sina Angeli Sanoy at Elora Españo. Isa itong documentary na directed by Rommel Galapia Ruiz.

Samantala, nauna nang inianunsiyo noong Hulyo 7 ang unang apat na official entries sa 52nd MMFF sa kick-off event ng taunang festival sa Greenhills Mall sa San Juan City.

Sa 2nd Miracle in Cell No. 7 ng Viva Films ay starring sina Aga Muhlach, Xia Vigor at Jodi Sta. Maria. Ito ang prequel sa 2019 Filipino adaptation ng hit Korean drama (K-Drama) na Miracle in Cell No. 7.

Itsa-challenge na naman ni Direk Zig Dulay ang sarili sa ikatlong taon ngayong 2026 para sa pelikulang Amir ng GMA Pictures, na pagbibidahan nina Argus Aspiras (Baby Argus), Dennis Trillo, Will Ashley at Glaiza de Castro.

Laging blockbuster ang pelikula ni Direk Zig simula sa Firefly noong 2023, na nasundan ng Green Bones noong 2024, at ngayong 2026, inaasahan ngang kikita rin nang malaki ang Amir. Absent lang siya noong 2025.

Pasok ang Haunted Carnival ng Regal Entertainment, directed by Joey De Guzman, starring Julia Barretto, Fyang Smith, James Reid, John Arcilla at Maricel Soriano, na base sa trailer na ipinakita ay hawig sa US film na Funhouse na ipinalabas noong 1981.

Nandiyan din ang The Greatest Showdown ni Direk Jun Robles-Lana, na pinagbibidahan nina Vice Ganda at Vic Sotto mula sa APT Entertainment, M-Zet Productions, IdeaFirst Company, Star Cinema at ABS-CBN Studios.

Well, obvious na mahal ang pelikula nina Bossing Vic at Meme Vice dahil sa talent fees (TFs) pa lang nila ay baka abutin na ng kalahati ng total cost ng production kaya siguro maraming producers.