Umiinit ang walang pasmang kamay ni Curry sa Warriors

ni Anthony Servinio @Sports | November 7, 2026

Photo: Nagbibirong itinuturo ni Stephen Curry ang dating kakampi sa Golden State Warriors na si Klay Thompson na kahapon ay kalaban na nila sa Miami Heat.  “It’s still surreal playing against him. It’s always gonna be that way cause we’ve gone through so many battles together. And it’s kind of cool even at this stage to guard him.” Tumapos si Curry na may 29 puntos at 4 assists upang pangunahan ang Warriors laban sa Heat. (hooptalk)

Uminit sa tres si Stephen Curry para ihatak ang rumaragasang Golden State Warriors sa bisitang Miami Heat, 120-100 sa NBA sa Chase Center. 

Wagi rin ang Phoenix Suns sa Orlando Magic, 117-104. Ang ika-anim at huling three-points ni Curry ang nagtayo ng 103-85 bentahe at umupo na siya sa nalalabing 7 minuto. 

Bago niyan, nagbagsak si Curry ng 14 sa pangatlong quarter para lumayo ang GSW, 91-76.

Nagtapos si Curry na may 29 buhat sa anim na tres para sa ika-anim na sunod nilang tagumpay matapos matalo sa unang tatlo. Sumuporta si rookie Yaxel Lendeborg na may 17 at reserba Georges Niang na may 13.

 Nanguna sa Miami sina Davion Mitchell na may 22 at Giannis Antetokounmpo na may 20. Gumawa ng 11 si Klay Thompson sa nag-iisang pagdalaw ng Heat sa GSW ngayong taon.

Unang quarter pa lang ay pumutok para sa 12 si Devin Booker upang humataw ang Suns, 33-26. Hindi na sila lumingon at pinalaki ito sa 105-75 maaga sa huling quarter.

Nagtapos na may 30 si Booker at sinundan ni Dillon Brooks na may 24. Gumawa ng 27 si Wendell Carter Jr. para sa Magic na wala pa rin ang napilay na si Paolo Banchero.