CTG Pilipinas, abangan sa FIBA 3X3 World Tour Doha

ni Anthony E. Servinio - @Sports | March 1, 2021

Nakatanggap ng imbitasyon ang Chooks To Go Pilipinas 3X3, ang unang ligang propesyonal ng 3X3 sa bansa, sa magpadala ng kinatawan sa pagbubukas ng prestihiyosong 2021 FIBA 3X3 World Tour Doha Masters ngayong Marso 26 at 27 sa Al Gharafa Sports Club. Determinado ang FIBA na magdaos ng pinalawak na World Tour ngayong taon at baka idaos ang laro sa Pilipinas.

Kasunod nito ay ipinakilala ang unang 11 team tulad ng defending champion Riga ng Latvia. Hahamunin ang mga Latvian ng malakas na beteranong team na Liman, Ub at Novi Sad ng Serbia, NY Harlem at Princeton ng U.S. Amsterdam ng Netherlands, Piran ng Slovenia, Sakiai Gulbele ng Lithuania at ang nagbabalik na Beijing at Edmonton na parehong lumiban sa buong 2020.

Kasama rin sa listahan ang dalawang puwesto para sa host Qatar upang makabuo ng 14. Kung matutuloy, ito ang magiging unang sabak ni Coach Aldin Ayo matapos italaga bilang bagong head coach ng Chooks 3X3 noong Nobyembre subalit haharapin ang matinding hamon na maghanap ng manlalaro.

Kasama sa 2021 PBA Draft ang mga pambato ng Manila Chooks TM na sina Joshua Munzon, Alvin Pasaol, Leonard Santillan at Troy Rike at malakas ang posibilidad na makukuha silang lahat sa Marso 14. Kasama rin sa draft si Franky Johnson ng Uling Roasters-Butuan habang pumirma ng kontrata sa Alaska Aces si Gab Banal ng Nueva Ecija Rice Vanguards.

Ihahayag ng FIBA sa mga susunod na linggo ang mga dagdag petsa sa kalendaryo ng World Tour. Nitong Pebrero ay pinatibay ng FIBA at CTG 3X3 ang kanilang samahan at nangako si FIBA 3X3 Events and Partnerships Head Ignacio Soriano na itutuloy ang naudlot na Manila Masters na gaganapin dapat noong Agosto sa SM Megamall at ilan pang mga pandaigdigang palaro sa Pilipinas.

Cuarto, bagong IBF mini champ, Taduran tinilad

ni Gerard Peter - @Sports | March 1, 2021

Nahirang na bagong International Boxing Federation (IBF) minimumweight champion ang Zamboanga-native na si “Mighty Mouse” Rene Mark Cuarto matapos maagaw ang titulo laban kay “Kid Pedro Heneral” Pedro Taduran via unanimous decision, Sabado ng hapon sa Bula Gym sa General Santos City.

Nakamit ng 24-anyos mula Jose Dalman (Ponot), Zamboanga del Norte ang pagpabor ng tatlong hurado sa paggawad sa kanya ng pare-parehong 115-113 na madikitang puntos upang makuha ang kauna-unahang world title laban sa nagdedepensang kababayan.

Ipinamalas ni Cuarto (19-2-2, 11KOs) ang mga counter-punching skills, kontra sa agresibong atake ni Taduran (14-3-1, 11KOs), bagamat matipid sa mga bitaw, ngunit malinis ang mga patama ay siyang nakita at pinaboran ng mga hurado.

Naitala ng Zamboangeno angikatlong sunod na panalo, na huling lumaban noon pang Disyembre 15, 2019 laban kay Jayson Francisco sa pamamagitan ng 5th round TKO sa Robinsons Mall Atrium, General Santos City. “Maganda yung laban namin ni Pedro, Matibay si Pedro,” pahayag ni Cuarto matapos ang laban sa panayam sa kanya ng Powcast Sports. “Sure na sure na ako kase pinag-aralan namin 'yung style niya, kaya ‘yung mga pinag-aralan namin ang talagang lumabas sa fight. Happy naman ako na naging ganun ang desisyon, matagal ko rin itong pinaghirapan ang lahat ng ito at dininig ng Panginoon 'yung mga panalangin ko, natupad 'yung mga pangarap ko,” dagdag nito hinggil sa ginawang preparasyon at paghahanda sa naturang laban.

Derozan, Garland, Doncic at Jokic, pawang matitinik

ni Anthony E. Servinio - @Sports | March 1, 2021

Nagising ang numero unong Utah Jazz mula sa mapait na talo noong isang araw at bumalik sa panalo kontra sa Orlando Magic, 124-109, sa NBA kahapon mula sa Amway Center. Inihatid ni kabayang Jordan Clarkson ang maagang knockout matapos ang free throw na may pitong minuto pa, 104-85, at mula roon ay inalagaan ng kanyang kakampi ang lamang.

Nagtapos na may 18 puntos si Clarkson upang suportahan ang 31 puntos ni All-Star Donovan Mitchell. Samantala sa ibang laro, kumapit ang San Antonio Spurs sa 4th quarter upang mabitin ang paghabol ng Pelicans, 117-114. Namuno sa Spurs (17-12) sina DeMar DeRozan na may 32 puntos at LaMarcus Aldridge na may 21 puntos.

Ginulat ng Cleveland Cavaliers ang numero uno sa EastCon ang 76ers sa overtime, 112-109. Nagsama ng lakas sina Darius Garland na may 25 puntos hanggang overtime at Collin Sexton na may 28 para ibigay sa Cavs (13-21) ang ikatlong sunod na panalo.

Kahit natalo, nanatili sa tuktok ang 76ers dahil tinalo ng Dallas Mavericks ang segundang Brooklyn Nets, 115-98. Umabot ng 22 puntos ang lamang ng Mavs (16-16) sa fourth quarter, 106-104, sa likod nina All-Star Luka Doncic na nagtapos na may 27 puntos at Kristaps Porzingis na may 18 at wakasan ang walong sunod na panalo ng Nets (22-13) na naglaro na wala ang mga All-Star na sina Kevin Durant at Kyrie Irving.

Naging sorpresang bayani si Frank Ntilikina matapos ang agaw at free throw na nagsigurado sa 110-107 tagumpay ng New York Knicks sa Indiana Pacers. Namuno sa Knicks (17-17) si All-Star Julius Randle na may 28 puntos at RJ Barrett na may 24.

Sinigurado ng Washington Wizards na hindi sila mapapahiya sa kulelat na Minnesota Timberwolves, 128-112. Bumuhos ng 34 puntos si All-Star Bradley Beal at triple double si Russell Westbrook na 19 puntos. Triple double din na may 19 puntos si All-Star Nikola Jokic sa 126-96 sa tagumpay ng Denver Nuggets sa Oklahoma City Thunder.