Foxies sinakmal ang Thunderbelles kakapit sa agawan ng PVL semis

by Gerard Arce @Sports News | November 6, 2026

Photo: Umatake ng hataw si Riza Nogales ng Zus Thunderbelles pero mabilis na na-block ni Frances Molina ng Farm Fresh Foxies sa PVL game kahapon. (pvlpix) 

Mga laro sa Sabado

(Philsports Arena)

1 pm – NXLed vs Capital1

6 pm – Choco Mucho vs Akari 

Muling nagpamalas ng katatagan ang Farm Fresh Foxies upang matakasan ang pagpalag ng utol na Zus Coffee Thunderbelles na nagtapos sa 25-21, 16-25, 21-25, 25-19, 15-10, upang manatiling nakakapit para sa agawan sa semifinal seat ng Premier Volleyball League (PVL) All-Filipino Conference Siklab Series kahapon sa Philsports Arena sa Pasig City.

Umangat sa 3-2 kartada sa solo 4th place ang Farm Fresh na pinagbidahan ni Honey Royse Tubino sa 20 puntos. Nagawang bumuhos ng husto sa 4th set ang Foxies na kanilang nabitbit patungo sa deciding set. 

Sumegunda sa scoring ang beteranong outside hitter na si Ces Molina sa 18 puntos habang pumalo rin si Trisha Tubu sa 17 puntos. “Mas mahirap ang panalong ito kumpara sa mga nauna naming victories dahil pride ang nakataya, at alam naming ibinigay talaga ng ZUS Coffee ang best nila,” wika ng dating conference MVP.

“Alam namin kung gaano kahalaga ang larong ito as we move forward to our next games. Mas mabibigat pa ang mga susunod naming laban, kaya kailangan talaga naming makuha ang panalong ito.”

Bumagsak sa 0-5 rekord ang Thunderbelles na pinagbidahan ng game-high ni Alex Miner sa 21 puntos.