Unang NBA title ng Knicks si MVP Brunson ang bida

ni Anthony E. Servinio @Sports | June 15, 2026

Photo: Matapos ang 53 taon na walang kampeonato sa NBA, sa wakas ay nagawa na rin ng New York Knicks na masungkit ang Larry O'Brien trophy sa bisa ng husay ni Jalen Brunson sa Game 5 laban sa San Antonio Spurs. (Darren Abate/AP) 

Kinoronahan ang New York Knicks bilang bagong NBA World Champion matapos ang dikdikang 94-90 panalo sa San Antonio Spurs kahapon sa Frost Bank Center. Nagwakas ang seryeng best-of-seven, 4-1, at ang 53 taong paghihintay ng prangkisa at kanilang mga tagahanga.

Tulad ng ilang laro sa serye, kinailangang bumangon ang Knicks at walang pagkakaiba sa Game 5. Hawak ng Spurs ang 70-55 lamang sa huling 2 minuto ng pangatlong quarter subalit nagising bigla ang bisitang NY.

Mag-isang bumuhos si Jalen Brunson ng 10 walang sagot na puntos upang itabla ang laban, 83-83. Tuluyang naagaw ng NY ang bentahe sa free throw ni Brunson, 86-85, at 3:40 sa orasan.

Pumalag ang Spurs at nag-shoot si kabayan Dylan Harper para sa huling tabla, 88-88. Hindi na sila pumuntos sa nalalabing isang minuto at sumaksak si Brunson para lumamang muli at nagtala ng tig-isang free throw sina Mikal Bridges at OG Anunoby para maselyuhan ang pangatlong tropeo ng koponan kasama ang 1970 at 1973.

Walang duda sa pagpili kay Brunson bilang Finals MVP sa 15 ng kanyang 45 sa huling quarter. Sumunod sina Bridges na may 14 at Josh Hart na may 13.

Naging unang Pinoy NBA kampeon si Gilas Pilipinas Jordan Clarkson na kuya ng Knicks sa edad 34. Nagbunga ang kanyang desisyon na pumirma sa Knicks noong Hulyo upang hanapin ang singsing na hindi niya natamasa sa LA Lakers, Cleveland Cavaliers at Utah Jazz mula 2014 hanggang 2025.

Nanguna sa Spurs si Harper na may 25 habang 19 si Victor Wembanyama. Nakabawi ang Knicks sa Spurs na tumalo sa kanila noong 1999 Finals, 4-1.

Pumasok din ang NY sa kasaysayan bilang unang dobleng kampeon sa isang taon. Noong Disyembre ay wagi rin sila sa NBA Cup laban sa parehong Spurs sa winner-take-all finals sa Las Ve

Spurs binawian ang Knicks, kumilos sina Castle at Wemby

ni Anthony E. Servinio @Sports | June 10, 2026

Photo: San Antonio Spurs

Laro sa Huwebes - MSG

8:30 PM SA vs. NY

Umiwas sa walis ang bisitang San Antonio Spurs at bumangon laban sa New York Knicks, 115-111, sa pangatlong laro ng 2026 NBA Finals kahapon sa Madison Square Garden. Lamang pa rin ang Knicks sa seryeng best-of-seven, 2-1.

Kalmadong ipinasok ni Stephon Castle ang dalawang paniguradong free throw na may pitong segundo sa orasan upang mapigil ang paghahabol ng NY. Bago noon ay bumira ng tres si Castle para maging 111-104 sa huling dalawang minuto pero tinapyas ng mga three-points nina Jalen Brunson at OG Anunoby ang agwat sa 111-113 at 9 na segundo ang nalalabi.

Kumilos ang Spurs sa pangatlong quarter at binura ang 64-57 lamang ng Knicks. Nagwakas ang quarter sa palitan ng three-points nina Gilas Pilipinas Jordan Clarkson at kabayan Dylan Harper pero humabol ng buslo si Mikal Bridges para ibalik ang lamang sa NY at ihanda ang mahigpit na pagtatapos.

Nanguna na may 10 ng kanyang 32 puntos sa huling quarter si Victor Wembanyama. Sumunod si Castle na may 23 at Harper na may 14 bilang reserba.

Naputol ang 13 sunod-sunod na panalo ng Knicks sa playoffs. Nagtala ng 32 si Brunson habang 28 si Anunoby at 16 kay Josh Hart.

Dahil dito, tiyak na may Game 5 sa Linggo sa Frost Bank Center. Sa MSG pa rin ang Game Four sa Huwebes. Kabilang sa nanood si Pangulong Donald Trump na imbitado ng may-ari ng Knicks James Dolan. Siya ang unang nakaupong Pangulo sa NBA Finals subalit sinalubong siya ng pangungutya nang ipakilala sa tinatayang 19,812 tagahanga.

Huling ginanap ang NBA Finals sa "World's Most Famous Arena" noong 1999 at kinoronahan ang bisitang Spurs sa Game Five na kanilang una sa kasaysayan. World Champion din ang SA noong 2003, 2005, 2007 at 2014 habang kampeon ang NY noong 1970 at 1973.

Clarkson ng NY Knicks wagi vs. Harper ng Spurs

ni Anthony E. Servinio @Sports | June 5, 2026

Photo: Ang maaksiyong laban ni kabayan Jordan Clarkson ng New York Knicks kontra San Antonio Spurs sa game 1 NBA finals kahapon. (northjersey.com)

Laro sa Sabado - Frost Bank

8:30 AM NY vs. SA

Pinoy laban sa Pinoy! Nanaig si Gilas Pilipinas Jordan Clarkson at New York Knicks laban kay kabayan Dylan Harper at San Antonio Spurs, 105-95 sa simula ng 2026 NBA Finals Game 1 kahapon sa Frost Bank Center.

Lamang ang Spurs papasok sa huling dalawang minuto, 95-94, subalit hindi na sila pumuntos. Bumira ng three-points si Jalen Brunson upang maagaw ang bentahe at sinamahan nina Mikal Bridges at OG Anunoby para sa 10 walang sagot na puntos para wakasan ang unang laro sa seryeng best-of-seven.

Sinayang ng Spurs ang 65-51 lamang sa pangatlong quarter matapos ang tres ni Harper. Humabol ang NY sa pangunguna nina Brunson at Karl-Anthony Towns para tumabla, 76-76, at maghanda para sa matinding huling quarter.

Nagtala ng 13 ng kanyang 30 sa huling quarter si Brunson. Double-double si KAT na 18 at 12 rebounds habang sumuporta si Anunoby na may 12 ng kanyang 17 sa huling quarter din.

Nanguna sa Spurs sina Victor Wembanyama na 26 at 12 rebounds at Stephon Castle na may 17. Nagtapos na may 16 si Harper bilang reserba pero kahit walang puntos si Clarkson ay napunta sa kanyang koponan ang mahalagang tagumpay.

Ito ang pangatlong panalo ng NY sa SA ngayong taon. Nakamit ng Knicks ang 2025 NBA Cup kontra sa Spurs, 124-113, sa Las Vegas noong Disyembre 16.

Naghati sila sa dalawang laro sa regular season kung saan nanaig sa 133-132 ang Spurs noong Disyembre 31. Bumawi ang Knicks, 114-89 noong Marso 1.

Magpapatuloy ang serye sa Sabado sa Frost Bank muli. Lilipat ang mga laro sa Madison Square Garden para sa dalawang laro sa Hunyo 9 at 11.