Oftana bumawi sa Game 2, Tropang 5G nanaig sa Gin Kings

ni Anthony E. Servinio @Sports | June 6, 2026

Photo: Mabilisang iniwasan ni Talk 'N Text Tropang 5G Calvin Oftana ang dobleng depensa nila Stephen Holt at Japeth Aguilar ng Ginebra San Miguel sa kanilang bakbakan sa Game 2 ng PBA Commissioner's Cup Finals match sa Mall of Asia Arena, Pasay City. (Reymundo Nillama)

Laro sa Linggo - MOA 7:30 PM Ginebra vs. TNT

Umiwas sa kontrobersiya ang defending champion TNT Tropang 5G at malinaw na nanaig sa Barangay Ginebra, 101-94, sa Game Two ng 2026 PBA Commissioner's Cup Finals kagabi sa punong Araneta Coliseum.

Pantay na ang seryeng best-of-seven sa 1-1 at walong tanong sa resulta. Kalmadong ipinasok ni Calvin Oftana ang dalawang free throw, 100-94, para makahinga ang TNT na may 18 segundo sa orasan.

Ito ay sa gitna ng matinding huling hirit ng Barangay na kinapos lang ng panahon m Sinayang ng Tropa ang 81-59 lamang sa simula ng huling quarter. Ginagamit na ng Ginebra ang kanilang bihirang gamitin na manlalaro subalit nagawa nilang tapyasan ang bentahe, 78-90.

Ibinalik sina Justin Brownlee at ibang mga bituin at lalong lumapit sa mga shoot ni John Abis at Brownlee, 94-98, at isang minuto sa orasan. Hindi na pumuntos ang Gin Kings at kumapit ang Tropa na kinalimutan ang kanilang 100-102 pagkabigo sa unang laro noong Miyerkules.

Best Player si Oftana na nagtala ng 31 puntos kumpara sa kanyang 12 lang noong Miyerkules. Sumunod sina Chris McCullough na may 19 at Jordan Heading na may 14.

Ayon kay Coach Chot Reyes, mahirap mag-relax kapag Ginebra ang kalaro. Iyan ang aayusin nila para sa Game Three sa Linggo sa MOA Arena. Nanguna sa Gin Kings si Brownlee na may 24. Nag-ambag ng 21 si RJ Abarrientos habang 13 si Jeremiah Gray.

Gilas Women U-18 biniktima ang Singapore at Vietnam

ni Anthony E. Servinio @Sports | June 4, 2026

Photo: SBP

Laro ngayong Huwebes - STI-WNU 

4 PM Indonesia vs. Vietnam 

7 PM Pilipinas vs. Thailand 

Nagtala ng dalawang pinaghirapang panalo ang Gilas Pilipinas upang simulan ang FIBA Under-18 Women's Asia Cup SEABA Qualifiers sa STI West Negros University, Bacolod. Dinaig ng mga Pinay ang Singapore kagabi, 83-53, upang sundan ang 93-42 tagumpay sa Vietnam noong Martes. 

Kinalimutan ng Gilas ang malambot na unang quarter kung saan maitakas nila ang 18-17 bentahe sa palaban na Singapore. Bumanat sina Audry Duma at Tiffany Reyes sa simula pangalawa hanggang lumayo bago ang pangatlo, 42-37. 

Nanguna sa Gilas si Reyes na may 18 puntos at pitong rebound. Sumuporta si Sophia Dignadice na may 16 at pitong assist. Malamya rin ang simula kontra Vietnam at bumira ng dalawang three-points ni Lucienne Ralph Le Chi sa unang apat na minuto, 6-2. 

Ginising ng shoot ni Dignadice ang mga kakampi at mula doon ay nagtulungan sina Riri Perez, Zuzzane Singson, Naima Navarro at Zaydhen Rosano para kunin ang unang quarter, 19-14. Ipinasok ng Gilas ang unang 10 puntos ng pangalawang quarter, 29-14, at inabot ng anim na minuto bago nakasagot ang Vietnam. Hindi na lumingon ang mga Pinay at ang huling talaan ay siya ring pinakamalaking lamang. Nanguna sa atake si Perez na may 16 puntos sa 19 minuto.

Brownlee sumiklab sa Game 1 Finals, Kings inunahan ang Tropang 5G

ni Anthony E. Servinio @Sports | June 3, 2026

Photo: Inaasinta ni Justin Brownlee ng Ginebra ang basket sa harapan ni Roger Pogoy ng TNT sa Game 1 finals sa PBA Commissioners Cup sa Big Dome Miyerkules ng gabi. (Reymundo Nillama)

Laro sa Biyernes - Araneta 7:30 PM TNT vs. Ginebra

Nagising sa tamang panahon si Justin Brownlee at Barangay Ginebra upang maukit ang 102-100 panalo sa defending champion TNT Tropang 5G Miyerkules ng gabi sa simula ng 2026 PBA Commissioner's Cup Finals sa siksikang Araneta Coliseum. 

Ipinasok ng beterano ang nagpapanalong buslo na may 0.6 segundo sa orasan. Bago noon ay itinabla ng three-points ni Roger Pogoy ang laban, 100-100, at 10 segundo ang nalalabi. Galing sa timeout, tumanggap ng bola si Brownlee at pinalipas ang oras bago umarangkada at tumalon laban sa depensa ni Chris McCullough.

Lamang ang Gin Kings sa pangatlong quarter, 64-46, subalit matiyagang humabol ang Tropa. Nagbagsak ng 12 sunod-sunod na puntos ang Tropa para maagaw ang lamang, 91-88, upang ilatag ang nakakahilong huling limang minuto. Bumomba ng four-points si Best Player RJ Abarrientos para sa 100-97 iskor. 

Nagmintis ng four-points si Pogoy pero nakuha pa rin ang rebound at ipinasok ang nagpatablang tres. Uminit si Abarrientos para sa 24 habang 23 si Brownlee. 

Nag-ambag sina Troy Rosario ng 16 at Scottie Thompson na may 15. Nanguna sa TNT si McCollough na may 25 at 14 rebounds. 

Sumunod sina Pogoy na may 22 at 19 para kay Nambatac. Ang Game 2 ay ngayong Biyernes sa parehong palaruan. 

Samantala, pinadala ng San Miguel Beermen si Juami Tiongson at rookie Chris Miller sa Terrafirma Dyip kapalit sina Jerrick Ahanmisi at Paolo Hernandez.