Gilas Women silver, Australia gold sa FIBA 3x3 Asia Cup

ni Anthony E. Servinio @Sports | April 6, 2026

Photo: FIBA 3x3

Umulit ang defending champion Australia sa palaban na Gilas Pilipinas, 18-9, sa pagtatapos ng FIBA3x3 Asia Cup Singapore 2026 Linggo ng gabi sa OCBC Square. Ito ang ika-apat na sunod na kampeonato ng Aussies at kabuuang pang-anim subalit makasaysayan ang unang medalya ng mga Pinay sa torneo mula 2019.

Umarangkada ang Australia, 6-0, at inabot ng halos apat na minuto nang nakapuntos si Kacey dela Rosa. Lumaki ito sa 18-7 bago humabol ng dalawang buslo si Cheska Apag sa huling 30 segundo para sa huling talaan. Hinirang na MVP si Kristy Wallace na beterana rin ng WNBA.

Sinamahan siya sa Team of the Tournament nina Afril Bernardino ng Gilas at Zhang Zhiting ng Tsina. Sa elimination noong Biyernes binigo ng Australia ang Gilas, 21-10, at walisin ang Grupo D.

Pasok pa rin sa playoffs ang Pilipinas sa bisa ng 19-10 tagumpay sa qualifier Tonga sa nauna nilang laro. Ibang bangis ang ipinamalas ng Gilas at pinauwi ang paborito Mongolia sa quarterfinals, 15-12.

Sinundan ito ng mas nakakapanabik na 21-19 pagtakas sa Japan sa semifinals at itakda ang pangalawang sa sagupaan sa Australia. Nabawi ng Tsina ang pangatlong puwesto sa 20-15 panalo sa Japan.

Sa panig ng kalalakihan, kampeon sa unang pagkakataon ang Aotearoa New Zealand na sinundan ng Timog Korea at Tsina.

Nagtapos na pang-anim ang Gilas Men nang matalo sa mga Koreano sa quarterfinals, 15-18. Malaking angat pa rin ito kumpara sa ika-15 noong 2025 kung saan hindi lumampas sa qualifier ang mga Pinoy.

Tatum at Barrett binalikat panalo ng Celtics at Raptors

ni Anthony E. Servinio @Sports | March 31, 2026

Photo: Jayson Tatum vs Celtics - Boston Celtics

Nadagdagan ang mayaman na kasaysayan ng Boston Celtics sa 114-99 panalo nila sa Charlotte Hornets sa NBA kahapon sa Spectrum Center. Nagtala rin ng bagong marka sa puntusan ang Toronto Raptors laban sa Orlando Magic, 139-87.

Kahit sabay lumiban sina Jaylen Brown at Derrick White pero itinuloy ni Jayson Tatum ang kanyang milagrong paghilom ng pilay sa sakong at nagbagsak ng 32 puntos. Inakyat sa unang lima si reserba Payton Pritchard at nag-ambag ng 28.

Ang Celtics na ang pangalawang koponan sa Eastern Conference na may 50 panalo sa likod lang ng nangungunang 54-20 Detroit Pistons. Ito na rin ang kanilang ika-limang sunod na torneo na may 50 o higit at nakakatiyak na sila sa playoffs sa ika-12 sunod na taon.

Lamang ang Magic ng maaga, 20-14, at mula doon ay hindi sila pumuntos hanggang kalagitnaan ng pangalawang quarter at bumuhos ng nakakahilong walang sagot na 31 puntos ang Raptors na bagong marka sa NBA. 

Bumida sa Toronto si RJ Barrett na may 25 puntos. Sa ibang laro, nagpasilip ng isang maaaring magtapatan sa NBA Finals at nilampasan ng World Champion Oklahoma City Thunder ang hamon ng New York Knicks, 111-100. Nagpasok ng 10 ng kanyang 30 sa huling quarter si MVP Shai Gilgeous-Alexander. 

Best-of-7 na ang MPBL Nat'l finals sa Solar Sports

by Gerard Arce @Sports News | March 29, 2026

Photo: Ni-renew ni MPBL Founder at Chairman Manny Pacquiao at Solar Sports President Wilson Tieng ang kanilang broadcast partnership para sa MPBL Eighth Season simula sa Abril 10. Kasama sa mga hanay ng dumalo sina MPBL Commissioner Emmer Oreta, CEO Joe Ramos at Legal Counsel Glenn Gacal, Solar Sports Chairman William Tieng, CFO/COO Kenneth Yumand at Chief Legal Counsel Valerie Grace Domantay. (Gerard Arce)

Maspalalawigin sa best-of-seven ang championship match sa pagitan ng North at South Division para sa National Finals sa  8th season ng Maharlika Pilipinas Basketball League kasunod na rin ng panibagong broadcast partnership sa Solar Sports.

Optimistiko si league owner at chairman Manny Pacquiao sa panibagong season na magbibigay ng mas magagandang mga laro at mapapanood ng mga lokal na manonood matapos ang matagumpay na pag-ere ng mga laro noong 2025.

Inaabangan ang mga bagong manlalaro na lalong magpapatatag at magpapakita ng matinding aksyon at kalidad ng mga laro, lalo na’t maraming players ang manggagaling sa collegiate league na inaasahang magpapakitang-gilas pa.

"Fans can expect better, more competitive games this year," wika ni Pacquiao, na pumirma ng panibagong kasunduan kasama si Solar Sports president Wilson Tieng sa Solar Century Tower sa Makati kasama rin sina MPBL Commissioner Emmer Oreta, CEO Joe Ramos and Legal Counsel Glenn Gacal, Solar chairman William Tieng, CFO/COO Kenneth Yumang at Chief Legal Counsel Valerie Grace Domantay. "With Solar as an integral partner, we can look forward to an even more comprehensive coverage not only of the games, but the league's other activities," pahayag ni Ramos na aniya lalo pang pinalawig ng Solar Sports ang MPBL coverages mula sa anim na live games kada linggo patungo sa 12 sa ika-8 season.

Nakatakdang simulan ang mga aksyon sa Abril 10 na matutunghayan ang inaugural ceremonies sa Caloocan Sports Complex para sa North Division at Alonte Sports Arena sa Binan, Laguna para  sa South Division.

Mula sa regular na best-of-5 serye sa championship ay iniangat na sa dikdikang winner-take-all Game 7 ang mga bakbakan.  Mga dumalo sa signing sina MPBL players Kymani Ladi (Caloocan), Tucker Molina (Abra), Nicko Elorde (Abra), Mike Are (Zamboanga), Paeng Are (Zamboanga) at Inno Comboy (Batangas).