Taumbayan, maging alerto: Laganap ang panloloko at estafa

ni Ka Ambo @Bistado | February 4, 2026

Kapansin-pansin ang sunud-sunod na pagkakasangkot ng mga aktibong pulis sa iba’t ibang krimen.

Signos din ito ng matinding pagdarahop.

----$$$--

DAPAT nating maunawaan na ang mga pulis at sundalo ay ordinaryong mamamayan din.

Nagugutom din sila, may pamilya na dapat tustusan.

Sa gitna ng paghihirap, hindi maiiwasan “gumawa”sila ng paraan.

-----$$$--

MAY ilang pagkakataon na wala nang masulingan ang ilan na nagigipit sa pangangailangan.

Kapag nag-iisip sila nang malalim, mapapansin nila na sila ay may “baril”.

-----$$$--

Hindi sinasadya, nawawala sila sa sarili—at gagamitin ang kanilang “kapangyarihan” para madelihensiya.

Madalas silang makalusot, at ito ang dahilan kaya’t umaabuso at nawawalan ng disiplina sa sarili.

-----$$$--

Dapat ay yakapin ng pambansang pulisya ang “internal cleansing” na sinimulan ni dating PNP chief Guillermo Eleazar.

May periodic at palagiang pagbabantay sa sariling hanay.

-----$$$--

NAKAKALUNGKOT ito at isang malaking kahihiyan.

Pero, bakit kaya hindi gumagawa ng “kakaibang diskarte” para maresolba ang delikadong iskemang ito.

----$$$--

Sa bagay, gaya-gaya lang iyan.

Kung ere ngang mga buwaya ay bilyon-bilyong piso ang kulimbat, at hindi nabibisto—siyempre, kokopyahin ‘yan.

-----$$$--

Kahit sa pribadong sektor ay kaliwa’t kanan din ang sikwat.

Mag-ingat tayo dahil laganap ang sikwat at estafa.

Signos ‘yan ng panahon.

----$$$--

PAHIRAP nang pahirap ang buhay.

Alalahanin natin na malayo pa ang Hulyo at Agosto—ng panahon ng matinding pagdarahop taon-taon.

-----$$$--

SA gitna ng krisis, asahan ang pagdami ng pagpapatiwakal, pagkabaliw at malalagim na krimen.

Wala tayong nakikitang solusyon dito kundi ang magdasal nang walang patid!

---

Kung may reaksyon, sumbong o katanungan, sumulat sa ASINTADO ni Judith Sto. Domingo sa BULGAR Bldg., 538 Quezon Ave., Quezon City o mag-email sa asintado.bulgar@gmail.com.