Suweldo ng guro kahit semestral break

ni PAO Chief Persida Rueda-Acosta @Magtanong Kay Attorney | September 9, 2026

Dear Chief Acosta,

Mayroon lamang po akong katanungan tungkol sa aking tatay na isang regular na guro sa pribadong paaralan. Sinabi niya sa akin na magkakaroon ng semestral break ang kanilang paaralan, at siya ay nag-aalala kung makatatanggap siya ng anumang kompensasyon sa panahong iyon. Maaari ko po bang malaman kung ang aking tatay ay may karapatan sa kanyang suweldo sa panahon ng semestral break? Salamat po.

– Rosalya

---

Dear Rosalya,

Nakasaad sa Seksyon 4, Rule I, Book III ng Omnibus Rules Implementing the Labor Code ang mga prinsipyo sa pag-alam ng oras ng trabaho: 

“Section 4. Principles in determining hours worked. - The following general principles shall govern in determining whether the time spent by an employee is considered hours worked for purposes of this Rule:

(d) The time during which an employee is inactive by reason of interruptions in his work beyond his control shall be considered working time either if the imminence of the resumption of work requires the employee's presence at the place of work or if the interval is too brief to be utilized effectively and gainfully in the employee's own interest.”

Sa sitwasyon ng iyong tatay, napagdesisyunan ng Korte Suprema sa kasong University of Pangasinan Faculty Union vs. University of Pangasinan and National Labor Relations Commission and University of Pangasinan (G.R. No. L-63122, ika-20 ng Pebrero 1984, isinulat ni Kagalang-galang na Kasamang Mahistrado Hugo E. Gutierrez, Jr.), ipinaliwanag na ang semestral break ay isang pagkaantala sa trabaho na lampas sa kontrol ng guro. Ito ay itinuturing na kasama sa “oras na nagtrabaho”. Partikular na nakasaad sa kaso na:

“The semestral break scheduled is an interruption beyond petitioner’s control, and it cannot be used effectively nor gainfully in the employee’s interest. Thus, the semestral break may also be considered as "hours worked." For this, the teachers are paid regular salaries and, for this, they should be entitled to ECOLA. Not only do the teachers continue to work during this short recess but much less do they cease to live, for which the cost of living allowance is intended.”

Nakasulat sa Artikulo 84, Chapter I, Title I of Book III ng Labor Code of the Philippines, as amended, ang mga oras na kasama sa trabaho:

“Article 84. Hours Worked. — Hours worked shall include (a) all time during which an employee is required to be on duty or to be at a prescribed workplace; and (b) all time during which an employee is suffered or permitted to work.”

Batay sa mga nabanggit na probisyon at jurisprudence, mahihinuha na ang mga regular na guro sa pribadong paaralan ay may karapatan sa kanilang regular na suweldo tuwing semestral break, kapag ang nasabing break ay itinuturing na interruption sa trabaho na lampas sa kanilang kontrol.

Sana ay nabigyan namin ng linaw ang iyong katanungan. Ang payong aming ibinigay ay base lamang sa impormasyong iyong inilahad at maaaring magbago kung mababawasan o madaragdagan ang mga detalye ng iyong salaysay. 

Maraming salamat sa iyong patuloy na pagtitiwala.