Suspensyon ng buwis sa langis, binasura sa ngalan ng kita ng pamahalaan

ni Pablo Hernandez @Prangkahan | April 7, 2026

STL-CON JUETENG AT LOTTENG, TULOY PA RIN DAW SA MUNTINLUPA CITY, CALOOCAN CITY AT RIZAL PROVINCE KAHIT PANAHON NG SEMANA SANTA – Nitong nakalipas na Semana Santa, hindi umano tumigil ang ilegal na operasyon ng STL-con jueteng at lotteng nina “Jojo” at “Touche” sa Muntinlupa City; “Carlo” at “Oye” sa Caloocan City; at “Kits” sa Rizal province.

Sa kabila ng banal na panahon, nagpatuloy ang kanilang umano’y pambibiktima sa mga residente sa pamamagitan ng pagpapataya sa mga larong wala namang katiyakan ng panalo.

Kaugnay nito, umuusbong ang tanong: paano naaatim ng mga lokal na opisyal—sina Muntinlupa City Mayor Ruffy Biazon, Caloocan City Mayor Along Malapitan, at Rizal Governor Nina Ynares—ang ganitong gawain sa kanilang nasasakupan?

Kung nanaisin, may kapangyarihan ang mga ito na ipahinto ang naturang ilegal na operasyon sa pamamagitan ng agarang utos sa kapulisan upang aksyunan at dakpin ang mga sangkot. Period!

XXX

SEN. LACSON, KONTRA SA PAGSUSPINDE NG VAT AT EXCISE TAX SA LANGIS – Ayon kay Ping Lacson, aabot umano sa mahigit ₱320 bilyon ang mawawala sa kita ng pamahalaan kung ipatutupad ang suspensyon ng VAT value-added tax (VAT) at excise tax sa produktong petrolyo sa gitna ng krisis dulot ng tensyon sa Middle East.

Binigyang-diin niya na malaking bahagi ito ng kita ng gobyerno na ginagamit sa mga pangunahing serbisyo at programa ng estado.

Gayunman, kaugnay ng kanyang pahayag, may mga nagsasabi na tila salungat ito sa panawagan ng ilang sektor na pansamantalang ibaba o ipatigil muna ang naturang buwis upang maibsan ang epekto ng mataas na presyo ng langis.

Patuloy na pinagdedebatehan ang isyu sa pagitan ng pangangailangan ng taumbayan para sa agarang ginhawa at ng pangamba ng pamahalaan sa malaking posibleng bawas sa kita. Tsk!

XXX

'SUNTOK SA BUWAN' NA MAKAPAGBIGAY NG TRABAHO ANG MARCOS ADMIN SA MGA JOBLESS PINOY DAHIL WALA NANG FOREIGN INVESTORS NA NAGTAYO NG NEGOSYO SA ‘PINAS – Tinawag na “suntok sa buwan” ang mungkahi ni Gloria Macapagal-Arroyo na sa halip na ayuda sa panahon ng krisis, trabaho ang dapat ibigay ng administrasyon ni Ferdinand Marcos Jr. sa mga Pilipinong walang hanapbuhay.

Ayon sa pananaw na ito, mahirap umanong maisakatuparan ang naturang mungkahi dahil sa kakulangan ng pumapasok na pamumuhunan sa bansa. Kung walang sapat na negosyo at investor, limitado rin ang malilikhang trabaho para sa mga jobless na Pilipino.

Dahil dito, nananatiling malaking hamon kung paano mababalanse ang agarang tulong tulad ng ayuda at ang pangmatagalang solusyon gaya ng paglikha ng mas maraming trabaho. Period!

XXX

LAGOT ANG MGA NAGPAPAKALAT NG FAKE NEWS TUNGKOL SA “ENERGY LOCKDOWN” – Tiniyak ni Jose Melencio Nartatez Jr., hepe ng Philippine National Police, na mananagot ang sinumang mapapatunayang nagpapakalat ng fake news kaugnay ng umano’y “energy lockdown.”

Ayon sa kanya, paiigtingin ang imbestigasyon upang matukoy at makasuhan ang mga nasa likod ng maling impormasyon na maaaring magdulot ng kalituhan at pangamba sa publiko.

Gayunman, may ilang pananaw na agad itinuturo ang isang partikular na grupo bilang responsable sa ganitong gawain. Mahalagang tandaan na ang pananagutan ay dapat ibatay sa ebidensya at tamang proseso, at hindi sa pangkalahatang pagbibintang lamang. Boom!