Nagastos sa kampanya, masasayang kung ipagpapaliban ang BSKE election

ni Pablo Hernandez @Prangkahan | April 20, 2026

MALAKING KAHIHIYAN SA ‘PINAS KAPAG TOTOO ANG SINABI NI HARRY ROQUE NA HINDI ARESTADO SI ZALDY CO – Matapos i-vlog ni dating presidential spokesman Harry Roque na fake news umano ang pahayag ni Pangulong Ferdinand “Bongbong” Marcos Jr. (PBBM) na nahuli na si dating Cong. Zaldy Co sa Czech Republic, tila nanahimik ang Malacañang sa isyu ng umano’y pagkakaaresto sa dating kongresista.

Kung mapatutunayang tama ang pahayag ni Roque na hindi pa talaga nahuhuli si Zaldy Co, posibleng magdulot ito ng kahihiyan sa administrasyon, lalo na kung ang opisyal na anunsiyo ng gobyerno ay hindi tumutugma sa aktwal na sitwasyon. Boom!

XXX

KUNG TOTOONG ARESTADO NA SI ZALDY CO, DAPAT GAWIN NG MARCOS ADMIN LAHAT NG PARAAN PARA MAIBALIK ITO SA ‘PINAS – Kung totoo na naaresto na sa Czech Republic si Zaldy Co, dapat gawin ng Marcos administration ang lahat ng makakaya upang maibalik ang kongresista sa Pilipinas.

Kapag nasa bansa na siya, mas magiging posible na masusing maimbestigahan ang mga alegasyon at malaman ng taumbayan kung sino ang posibleng nasa likod ng tinutukoy na flood control scandal.

Gayunman, kung magpasya ang Czech Republic na i-deport siya sa Portugal at hindi sa Pilipinas, maaaring magdulot ito ng pagdududa sa publiko at hinala na may pagtatangkang itago o protektahan ang mga sangkot sa isyu. Period!

XXX

VP SARA MAKALUSOT MAN SA IMPEACHMENT SA SENADO, MALAMANG SA OMBUDSMAN WALA SIYANG LUSOT SA KASONG PLUNDER – Sa Senado na tatayong impeachment court, posibleng maapektuhan ang magiging resulta dahil sa bilang ng mga pro-Duterte senators, kaya may mga nagsasabing maaaring maabsuwelto si Vice President Sara Duterte sakaling doon ito umusad.

Gayunman, sa usapin sa Office of the Ombudsman at iba pang legal na proseso, mas nakatuon ito sa ebidensya at dokumento, kaya mas bukas ang posibilidad ng masusing pagbusisi sa kanyang mga isyu.

Isa sa mga tinutukoy dito ay ang naging desisyon ng Commission on Audit (COA) na inaatasan si VP Sara na isauli sa kaban ng bayan ang mahigit P75 milyon na confidential funds, matapos umanong hindi sapat na maipaliwanag kung paano ito ginastos o nagamit.

Dahil dito, lumilitaw na kung mapapatunayang may iregularidad sa paggamit ng naturang pondo at may kasong maisasampa, maaari itong umabot sa kasong plunder. Ngunit sa ngayon, nananatiling isyu ito na nakabatay sa mga ulat at proseso pa ng pagdinig at imbestigasyon. Period!

XXX

MALAMANG NAGNGINGITNGIT SA GALIT ANG MGA 'CHALLENGER' SA BSKE, KASI ANG LAKI NA NG GASTOS NILA, TAPOS MAY PLANO ULI NA IPAGPALIBAN ANG HALALAN – Ayon kay Presidential Communications Office (PCO) Undersecretary Atty. Claire Castro, pabor umano si Pangulong Ferdinand “Bongbong” Marcos Jr. sa posibleng pagpapaliban ng nakatakdang Barangay at Sangguniang Kabataan Elections (BSKE) sa Nobyembre 2026. Layunin umano nito na mailaan muna sa ayuda sa mga mamamayang apektado ng krisis sa langis ang pondong nakalaan para sa naturang halalan.

Inaasahang magdudulot ito ng iba’t ibang reaksyon, lalo na mula sa mga kandidatong naghahanda na para sa BSKE, dahil maaaring maapektuhan ang kanilang mga plano at ginastos sa kampanya at pakikipag-ugnayan sa kanilang mga nasasakupan sakaling muling maantala ang halalan. He-he-he!

Lagot ang mga sangkot ‘pag nagtugma ang mga salaysay nina Zaldy Co, Orly Guteza at 18 ex-marines

ni Pablo Hernandez @Prangkahan | April 19, 2026

MAMBU-BULLY LANG SI MAYOR BASTE KAYA 'SUNTOK SA BUWAN' NA MAKIPAGSUNTUKAN SIYA KAY RAMIL MADRIAGA – Tinanggap ng detenidong suspek sa kidnapping na si Ramil Madriaga ang hamon ni Davao City Mayor Sebastian “Baste” Duterte na mag-suntukan sila.

Gayunman, imbes na purihin ang alkalde, umani ito ng batikos at tawanan mula sa ilang netizens sa social media. Ayon sa kanila, malabong mangyari ang naturang sagupaan at wala itong kabuluhan, dahil tila patuloy lamang na nauuwi sa matitinding pahayag ang ganitong uri ng hamon.

May ilang netizens din ang nagpaalala sa naunang insidente kung saan naghamon din umano si Mayor Baste ng suntukan sa dating hepe ng PNP na si Gen. Nicolas Torre. Ayon sa mga komentaryo online, hindi umano natuloy ang naturang hamon matapos itong tanggapin, at hindi na rin ito nauwi sa aktuwal na pagharap ng magkabilang panig. Boom!

XXX

DAPAT SABAYAN NI PBBM NG SUSPENSYON SA OIL EXCISE TAX ANG SUNUD-SUNOD NA BIGTIME OIL ROLLBACK – May panibagong big-time rollback na naman sa mga produktong petrolyo sa susunod na linggo.

Sana ay samantalahin ito ni Pangulong Ferdinand “Bongbong” Marcos Jr. (PBBM) upang isabay ang pansamantalang suspensyon sa oil excise tax, upang kahit papaano ay maibsan ang hirap ng mga transport worker at motorista sa gitna ng patuloy na krisis sa langis. Period!

XXX

MALABONG PANAGUTIN NG COMELEC SINA PBBM AT VP SARA SA PAGLABAG SA OMNIBUS ELECTION CODE – Nagsampa ng kasong paglabag sa Omnibus Election Code ang iba’t ibang militanteng grupo laban kina PBBMat Bise Presidente Sara Duterte dahil sa pagtanggap umano nila ng campaign funds mula sa dalawang kontraktor noong 2022 election.

Ayon sa mga nagsampa ng reklamo, dapat umanong papanagutin ang mga opisyal dahil sa naturang alegasyon. Ngunit iginiit din ng ilang grupo na dapat maging pare-pareho ang pagtingin ng Commission on Elections (Comelec) sa lahat ng kahalintulad na kaso, anuman ang posisyon ng mga sangkot. Boom!

XXX

KAPAG NAGKATUGMA-TUGMA ANG STATEMENT NINA ZALDY CO, ORLY GUTEZA AT 18 EX-MARINES, LAGOT ANG MGA TUMANGGAP NG MALE-MALETANG PERA –Sakaling makabalik na sa bansa si dating Cong. Zaldy Co, ipapatawag umano siya kasama ang 18 ex-Marines at si retired Marines Sgt. Orly Guteza sa pagdinig ng Senate Blue Ribbon Committee, ayon kay Sen. Ping Lacson.

Ayon sa mga ulat, tatalakayin sa imbestigasyon ang mga pahayag hinggil sa umano’y “maleta” o malaking halaga ng pera. Kung magtutugma ang kanilang mga testimonya, posibleng malagay sa alanganin ang mga sangkot na tinutukoy. Ngunit kung magkakasalungat naman ang kanilang mga salaysay, aasahan ang matinding batikos mula sa publiko at pagdududa sa kredibilidad ng kanilang mga pahayag. Period!

Publiko, nananawagan na ilabas ang pangalan ng 26 cong-tractors

ni Pablo Hernandez @Prangkahan | April 18, 2026

YEAR 2000 O PANAHON NG NOO'Y PRES. GMA NAG-UMPISA ANG RAKET DAW NI ZALDY CO SA FLOOD CONTROL PROJECTS – Batay sa impormasyong nakasaad sa Wikipedia, noong taong 2000, sa panahon ng administrasyon ni dating Pangulong Gloria Macapagal-Arroyo, umano’y nagsimulang lumawak ang mga kontrata sa flood control projects na nakuha ng construction firm ni dating Ako Bicol party-list Rep. Zaldy Co na Sunwest Corporation.

Ayon sa mga ulat, kung mapapatunayan ang mga paratang na may kaugnayan sa kanya, mahalagang masuri ang buong saklaw ng mga proyektong naugnay sa kanya, hindi lamang ang mga isyung sumasaklaw sa taong 2023 hanggang 2025.

Nanawagan ang ilang sektor na kung magpapatuloy ang imbestigasyon ng Senate Blue Ribbon Committee sa pamumuno ni Sen. Lacson, dapat saklawin nito ang mas mahabang panahon mula 2000 hanggang 2025 upang matukoy kung may iregularidad sa mga flood control projects na naugnay sa kanya at kung may posibleng pinsalang nagawa sa pondo ng pamahalaan sa loob ng naturang panahon. Boom!

XXX

DAPAT IKANTA NA NI ZALDY CO LAHAT NG MGA KASABWAT NIYA SA FLOOD CONTROL SCAM PARA MABAWASAN GALIT SA KANYA NG TAUMBAYAN – Kapag naisalang si Zaldy Co sa Senate Blue Ribbon Committee, para mabawasan ang galit ng taumbayan sa kanya, inaasahan ng ilan na isiwalat na niya ang lahat ng mga umano’y kasabwat sa mga isyu ng flood control projects mula taong 2000 hanggang 2025.

Ayon sa ganitong pananaw, hindi lamang siya dapat managot kung mapatunayang may pagkakasala, kundi pati na rin ang iba umanong sangkot sa anumang iregularidad sa paggamit ng pondo ng bayan. Period!

XXX

26 CONG-TRACTORS, DAPAT HUBARAN NG MASKARA NI OMBUDSMAN BOYING REMULLA – Binigyang-linaw ni Deputy Ombudsman Mico Clavano na ang 26 na kongresistang iniimbestigahan ng Office of the Ombudsman ay tinaguriang “cong-tractors” o mga mambabatas na may kaugnayan umano sa mga kontraktor at sa kontrobersiya sa flood control projects.

Nanawagan ang ilang sektor na isapubliko ang pagkakakilanlan ng mga naturang kongresista upang malaman ng publiko kung sino-sino ang sangkot sa isyu. Boom!

XXX

KUNG HINDI HAHARAPIN NI VP SARA ANG KASO NIYANG IMPEACHMENT, BAKA ITO PA ANG IKATALO NIYA SA 2028 PRESIDENTIAL ELECTION – Matapos umanong hindi dumalo si Vice President Sara Duterte sa impeachment hearing ng House Justice Committee, nagsagawa ng survey ang OCTA Research.

Batay sa resulta, nasa 7 sa bawat 10 Pilipino ang nagsasabing mas mainam na harapin na ng Bise Presidente ang impeachment case na isinampa laban sa kanya sa Kamara.

Sa nakatakdang impeachment hearing sa Abril 22, 2026, inaasahan ng ilang sektor na personal siyang dadalo upang sagutin ang mga akusasyon. Period!