Spence vs. Pacman pagkatapos ni Ugas; Sultan, pinabagsak si Carter

ni Gerard Arce / M.C - @Sports | August 16, 2021

Payag umano si eight division boxing champion Manny Pacquiao na makaharap si US undefeated boxer Errol Spence Jr kapag gumaling na ang injury nito sa mata.

Matatandaang umatras sa laban si Spence dahil sa eye injury at nakatakda itong sumailalim sa operasyon. Ayon kay Pacquioa, walang problema na magkaharap silang muli ni Spence, basta lang nasa tamang kalagayan ang kalusugan nito. Dahil sa torn retina ng kanang mata ni Spence, ipinalit bilang kalaban ni Pacquiao si Yordenis Ugas para sa WBA welterweight super championship.

Siniguro naman ni Pacquiao na hindi nito mamaliitin si Ugas at ikokonsidera niyang malaki itong banta sa kanyang career bilang boksingero.

Samantala, matagumpay ang naging pagbabalik sa ring ni Jonas Sultan matapos itong umiskor ng knockout sa 7th round kontra sa kasagupang si Sharone Carter kahapon sa Carson, California.

Tinapos ng Filipino bantamweight si Carter nang paulanan ito ng suntok at tamaan ng solidong kanan sa mukha sa tiyempong 2:29 sa 7th round sa Dignity Health and Sports Park.

Ito ang unang laban ni Sultan mula noong 2019 nang talunin nito ang kababayang si Salatiel Amit via seventh round technical knockout. Ang laban ni Sultan at Carter ay undercard sa Johnriel Casimero-Guillermo Rigondeaux bantamweight title bout.

Nauwi naman sa No Decision ang co-main event para sa WBA bantamweight title eliminator sa pagitan nina Gary Antonio Russell at Emmanuel Rodriguez ng Puerto Rico dahil sa accidental headbutt sa unang round.

Pinatumba naman ni Rau’Shee Warren si Damien Vazquez sa 3rd ng 12 round fight sa isa sa mga undercard matches.